Bʼantajik 114

Kkʼis na ri itzelal

¿SULAʼ kawil pa ri wachbʼäl? Jeʼ, are ri ajchʼoj e petinäq chirij täq saq kej. Chawilaʼ jachiʼ tijan kepe wi. ¡Ri täq kej tijan keqaj lo pa ri kaj puwiʼ ri sutzʼ! ¿La qastzij e kʼo täq kej pa ri kaj?

E kʼo täj, wariʼ qastzij täj e kej. Qetaʼm rumal che ri täq kej kekun täj kebʼin puwiʼ ri sutzʼ, ¿la jewaʼ? Ri Loqʼalaj Pixabʼ kubʼij chupam chirij täq kej e kʼo pa ri kaj. ¿La awetaʼm suche?

Rumal che ojer xekoj ri täq kej pa ri chʼoj. Rumal laʼ ri Loqʼalaj Pixabʼ kubʼij che nikʼaj winaq keqaj lo pa ri kaj puwiʼ täq kej rech kkekʼutu che ri Ajawaxel kukʼam lo jun nimalaj chʼoj chike ri winaq e kʼo cho ruwäch Ulew. ¿Su ubʼiʼ wajun chʼoj riʼ? Armagedón ubʼiʼ, xuqujeʼ kusach na uwäch ronojel ri itzelal kʼo cho ruwäch Ulew.

Ri Jesús are kukʼam bʼe che ri chʼoj pa Armagedón. Masach pa ajolom che ri Jehová xuchaʼ ri Jesús rech kubʼan ajawinel rech ri Uqʼatbʼaltzij. Rumal laʼ Jesús ukojom jun corona. Ri chʼichʼ kʼo pa uqʼabʼ are kraj kubʼij che kukamsaj konojel ri täq ukʼulel ri Ajawaxel. ¿La kʼateʼ nabʼe kqata wariʼ, che ri Ajawaxel kusach kiwäch konojel ri itzel winaq?

Chatzukuj ri bʼantajik 10. ¿Su kawil chilaʼ? Jeʼ, are ri nimalaj jabʼ xusach kiwäch konojel ri itzel täq winaq. ¿Jachin laʼ xutaq lo ri nimalaj jabʼ? Are ri Ajawaxel Jehová. Chawilaʼ ri bʼantajik 15. ¿Su tijan kbʼan chilaʼ? Jehová xusach kiwäch rukʼ qʼaqʼ ri tinamit Sodoma rukʼ Gomorra.

Chatqʼax chi pa ri bʼantajik 33. Chawilampeʼ su tijan kkeriq ri täq kikej xuqujeʼ ri täq kicarro ri egipcios. ¿Jachin laʼ xbʼanowik che xtzaq lo ri jaʼ chikij? Are Jehová. Xubʼan wariʼ rumal che xeʼuchajej ri utinamit. Chatzukuj ri bʼantajik 36 xuqujeʼ 76. Chilaʼ kawilo che ri Jehová xuyaʼo che ri utinamit xsachisax uwäch rumal che xubʼan itzel.

Rumal laʼ xaq maqaxibʼij qibʼ, chiʼ kqato che ri Jehová kutaq na täq rajchʼoj ajkaj rech kresaj ri itzelal cho ruwäch Ulew. ¿Su kbʼan na? Chqilaʼ pa jun chik uxaq wuj.

Apocalipsis 16:16; 19:11-16.