¡Naqaj kʼo wi ri kotzʼiʼjalaj ulew!

Ri itzel täq jastaq e kʼo kimik cho ruwäch Ulew, kukʼutu che naqaj kʼo wi ri Kotzʼiʼjalaj Ulew. Ri Loqʼalaj Pixabʼ xubʼij ojer, che kqil na kʼäx täq qʼij jachiʼ naqaj kʼo wi ri upetik ri Kotzʼiʼjalaj Ulew. Kimik ojkʼo pa täq qʼij riʼ. Are wariʼ jujun täq jastaq che xubʼij ri Loqʼalaj Pixabʼ che keqʼax na:

Nim täq chʼoj. «Kawalaj jun nim tinamit chirij jun tinamit chik xuqujeʼ jun Ajawbʼäl chuwäch jun chik Ajawbʼäl.» (Mateo 24:7.) We etal riʼ, jewaʼ xbʼantajik. Pa ri junabʼ 1914 xmajtaj lo kebʼ nimaʼq täq chʼoj xuqujeʼ nikʼaj chik täq chʼoj cho ruwäch Ulew. Chupam we nikʼaj chʼoj, sibʼalaj kʼi täq winaq e kamnäq.

Nim täq yabʼil. Ke kʼojiʼ na «nim täq yabʼil pa jalojoj täq kʼolbʼal» (Lucas 21:11). ¿La bʼantajnäq we etal riʼ? Jelaʼ. Ri qʼayinaq täq yabʼil (cáncer), yabʼil rech animaʼ, itzel täq yabʼil, jeqʼnaq täq öj xuqujeʼ nikʼaj chik yabʼil, kkamisan sibʼalaj kʼi täq winaq.

Nim täq wiʼjal. Cho ronojel Uwäch Ulew e kʼo winaq che kʼot pwäq kukʼ rech kewaʼik. Sibʼalaj kʼi täq winaq kekam ronojel täq junabʼ rumal ri wiʼjal. Wariʼ jun chik etal chaqe, che naqaj kʼo wi ri Kotzʼiʼjalaj Ulew. Ri Loqʼalaj Pixabʼ kubʼij: «Kpe na wiʼjal» (Marcos 13:8).

Nim täq kabʼraqan. «Kepe na nim täq kabʼraqan chupam jalojoj täq kʼolbʼal.» (Mateo 24:7.) Xuqujeʼ wariʼ qilom kimik cho ruwäch Ulew. Umajomla chupam ri junabʼ 1914 sibʼalaj kʼi täq winaq e kamnäq rumal täq kabʼraqan.

Itzel täq winaq. Ri winaq ‹kkeloqʼoqʼej na kibʼ› xuqujeʼ ‹kkeloqʼoqʼej na ri pwäq›. Utz kekil ri itzel täq rayinik chuwäch ri Ajawaxel. Ri alkʼwalibʼ «keniman täj» (2 Timoteo 3:1-5). ¿La awilom che e kʼo kʼi winaq jewaʼ riʼ kkebʼan kimik? nim täj kekil ri Ajawaxel xuqujeʼ kkebʼan kʼäx chike jachin täq kketijosaj kibʼ chirij ri Ajawaxel.

Elaqʼ xuqujeʼ kamisanik. Xuqujeʼ kʼo na «ukʼiyirik ri itzelal» (Mateo 24:12). Weneʼ awilom che wa kʼisbʼäl täq junabʼ, ri itzelal sibʼalaj xekʼiyik. Pa ronojel täq kʼolbʼal, kqareq itzel täq winaq che kkebʼan elaqʼ, kkebʼan kʼäx xuqujeʼ kkebʼij ta ri saqalaj tzij.

Ronojel wariʼ kukʼutuʼ che naqaj kʼo wi ri Ajawbʼäl rech ri Ajawaxel. Ri Loqʼalaj Pixabʼ kubʼij: «Jeriʼ xuqujeʼ ri ix, are täq kiwilo che [. . .] kbʼantaj we jastaq riʼ, chichʼobʼo che ri Ajawbʼäl rech ri Ajawaxel naqaj chik kʼo wi» (Lucas 21:31). ¿ Jas waʼ ri Ajawbʼäl rech ri Ajawaxel? Are ri qʼatbʼaltzij che kʼo chikaj rech ri Ajawaxel, che kubʼan na jun kotzʼiʼjalaj uwäch che ri Ulew xuqujeʼ kok pa kikʼolbʼal ri qʼatbʼaltzij kech ri winaq (Daniel 2:44).