Rebeca kraj kukikotemaj ri Jehová

Chqilaʼ chrij jun ixoq ubʼiʼ Rebeca che sibʼalaj xuloqʼoqʼej ri Jehová. Ri rachajil, Isaac ubʼiʼ, xuqujeʼ xuloqʼoqʼej ri Jehová. Pa wajun bʼantajik riʼ kqil ri xbʼantajik chiʼ xkichʼobʼ kiwach. Xuqujeʼ kqetaʼmaj jasche Jehová utz xril ri xubʼan ri Rebeca.

Ri utat ri Isaac ubʼiʼ Abrahán ri unan ubʼiʼ Sara. Ri Abrahán kraj che ri ukʼojol kkʼuleʼ rukʼ jun ali che kuloqʼoqʼej ri Jehová. Are kʼu e areʼ e kʼo pa Canaán, ri winaq chilaʼ kʼot nijun chke kunimaj ri Jehová. Rumal laʼ xutaq bʼi jun upatanel (weneʼ are Eliezer) rech kbʼe pa ri tinamit Harán. ¿Jasche xutaq bʼi jelaʼ? Rumal che jelaʼ kʼo wi ri ufamilia ri Abrahán, rech Eliezer kukʼamaʼ lo jun utzalaj ali che ri Isaac.

Ri Eliezer e rachilam bʼi nikʼaj chi rajpataninelabʼ ri Abrahán xkibʼan bʼi jun nimalaj bʼe. Xkikʼam bʼi kʼi sipanik xuqujeʼ kʼi jastaq che ktijowik chkij 10 camellos. Are kʼu ¿jas kubʼan ri Eliezer che uriqik ri ali che kux rixoqil ri Isaac? Areʼ retaʼm che ri ixoqibʼ re ri tinamit kekikʼamaʼ kijoron pa jun kʼwaʼ. Rumal laʼ, chiʼ xopan pa Harán, xbʼe chuchiʼ ri kʼwaʼ. Xuqujeʼ xubʼij waʼ pa jun chʼawem che ri Jehová: «Kintaʼ nujoron che jun ali. We ri ali kuya nujoron xuqujeʼ kuya kijoron nucamellos, are riʼ ri achaʼom che rixoqil ri Isaac».

Rebeca xbʼe chuchiʼ ri kʼwaʼ. Ri Biblia kubʼij che sibʼalaj utz kkaʼy ri ali. Eliezer xutaʼ ujoron che, ri areʼ xubʼij: «Utz bʼaʼ kinya ajoron xuqujeʼ ke ri acamellos». Rumal che ri camellos kkitij sibʼalaj kʼi joron, Rebeca xrerej kʼi joron. ¡Kʼi mul xbʼe che resaxik ri joron! Chawilaʼ ri wachbʼal che kʼo pa ri uxaq 6. ¿Jas tajin kubʼan ri Rebeca?... Rumal che sibʼalaj kchakunik, Eliezer sibʼalaj xkikotik xubʼij: ¡Jehová xuta ri nuchʼawem!

Eliezer xuya utz taq sipanik che Rebeca, ri Rebeca xukʼam bʼi ri Eliezer xuqujeʼ ri nikʼaj chik ajpataninelabʼ pa rachoch rukʼ ri ufamilia. Ri Eliezer xubʼij ri rumal che xtaq bʼi rumal ri Abrahán pa Harán. Xuqujeʼ xubʼij chke che Jehová xuta ri uchʼawem. Chiʼ xkita wariʼ ri ufamilia ri Rebeca sibʼalaj xekikotik. Xkibʼij che ri Eliezer: «Utz che kkʼuleʼ ri Rebeca rukʼ ri Isaac».

¿Jas kachomaj at, la kraj ri Rebeca kkʼuleʼ rukʼ ri Isaac?... Chiʼ ri ufamilia xkitaʼ che we kraj, areʼ xubʼij che kraj. ¿Jasche xubʼij che kraj? Rumal che Rebeca retaʼm che are Jehová xtaqow bʼi ri Eliezer. Rumal laʼ xraj xbʼe pa Canaán, chiʼ xeʼopan chilaʼ, Rebeca xkʼuleʼ rukʼ Isaac.

Rebeca sibʼalaj xunimaj ri Jehová, rumal laʼ Jehová xutoʼ. Xuqujeʼ: pa ri ufamilia ri Rebeca xalax wi ri Jesús. Ri Jehová xuqujeʼ katutoʼ we katnimanik junam rukʼ ri xubʼan Rebeca. Xuqujeʼ sibʼalaj kkikot riʼ ri Jehová awukʼ.