¿E jachin xetzʼibʼan ri xubʼan ri Jesús?

Chawilaʼ ri achijabʼ che e kʼo pa ri wachbʼal. Are Mateo, Marcos, Lucas, Juan, Pedro, Santiago, Judas xuqujeʼ Pablo. Konojel e areʼ xekʼojiʼ pa taq uqʼij ri Jesús xuqujeʼ xkitzʼibʼaj chrij ri ukʼaslemal. Ri e bʼantajik xuqujeʼ ri e wuj che e areʼ xkitzʼibʼaj kʼo pa ri Biblia. ¿La kawaj kawetaʼmaj chkij ri achijabʼ riʼ?...

E oxibʼ e rachiʼl ri Jesús xuqujeʼ junam xkitzijoj ri utzij ri Dios. Are ri apóstol Mateo, Juan xuqujeʼ Pedro. ¿Chakʼutuʼ pa ri wachbʼal e jachin laʼ?... Ri Mateo xutzʼibʼaj jun wuj che kchʼaw chrij ri ukʼaslemal ri Jesús, xuqujeʼ Juan xutzʼibʼaj chrij ri ukʼaslemal ri Jesús. Xuqujeʼ are Juan xtzʼibʼan ri wuj ubʼiʼ Apocalipsis xuqujeʼ oxibʼ nikʼaj chik wuj, che kbʼix Primera, Segunda xuqujeʼ Tercera de Juan chke. Ri apóstol Pedro xutzʼibʼaj kebʼ wuj: che kbʼix Primera xuqujeʼ Segunda de Pedro chke. Pa ri ukabʼ wuj, Pedro xutzʼibʼaj jun bʼantajik che sibʼalaj nim ubʼanik. Areʼ xuta chiʼ xchʼaw lo ri Jehová pa ri kaj chiʼ xubʼij wariʼ chrij ri Jesús: «Are waʼ nukʼojol. In sibʼalaj kinloqʼoqʼej xuqujeʼ sibʼalaj kinkikot rumal».

Ri nikʼaj chik achijabʼ che e kʼo pa ri wachbʼal xuqujeʼ xetzʼibʼan chrij ri ukʼaslemal ri Jesús. Jun chike ubʼiʼ Marcos. Weneʼ, xrilo chiʼ xchap bʼi ri Jesús. Jun chik are Lucas. Areʼ ajkunanel, weneʼ xux cristiano, o ajtijoxel, chiʼ kaminaq chi ri Jesús.

Xuqujeʼ e kʼebʼ uchaqʼ ri Jesús xetzʼibʼan chrij ri ukʼaslemal. ¿La awetaʼm e jachin riʼ?... E kʼo pa ri wachbʼal, are Santiago xuqujeʼ Judas. Nabʼe xekojon ta chrij ri Jesús. ¡Xkichomaj che xa chʼuj! Are kʼu chiʼ xeqʼax ri qʼij xekojon chrij xuqujeʼ xeʼux ajtijoxelabʼ.

Chqilampeʼ chrij ri ukʼaslemal ri Pablo. ¿La kawil pa ri wachbʼal? Chiʼ majaʼ kux cristiano kbʼix Saulo che. Ri areʼ sibʼalaj itzel keril ri cristianos xuqujeʼ sibʼalaj xubʼan kʼax chke. ¿La kawaj kawetaʼmaj jasche xux cristiano?... Jun qʼij bʼenaq pa jun bʼe chiʼ xuta che tajin kchʼabʼex pa ri kaj. ¿Jachin ri xchʼabʼenik? ¡Are ri Jesús! Xubʼij wariʼ che: «¿Jasche kabʼan kʼax chke ri kekojon chwij?». Pablo xuchʼobʼo che rajawaxik kukʼex ri ukʼaslemal, rumal laʼ xux cristiano. Chiʼ xeqʼax ri e qʼij, xutzʼibʼaj 14 wuj rech ri Biblia, kumaj bʼi pa ri wuj ubʼiʼ Romanos kkʼis pa ri wuj ubʼiʼ Hebreos.

¿La amajim chi usik’ixik uwach ri e wuj rech ri Biblia che kech’aw chrij ri uk’aslemal ri Jesús, o la tajin ksiḱ’ix chawach?... Ri utz kab’ano are che kaweta’maj chrij ri Jesús. ¿La kawaj kab’ano?...