PREGUNTA 2

¿Jasche sibʼalaj kinchoman chrij ri ubʼanik ri nucuerpo?

JASCHE RAJAWAXIK

Kʼo nikʼaj chi jastaq che más nim ubʼanik chuwach ri kawil pa ri espejo.

¿AT JAS KABʼANO?

Chachomaj wajun jastaq riʼ: are chiʼ Julia kril ribʼ pa ri espejo, krilo che sibʼalaj chom. «Rajawaxik kinbʼaqir jubʼiqʼ», kuchomaj. Are kʼu ri utat unan xuqujeʼ ri e rachiʼl kkibʼij che sibʼalaj bʼaq junam rukʼ jun xikʼaʼy.

Kʼi chi qʼij Julia tajin kuchomaj che rajawaxik kuqasaj jobʼ libras che ri ralal. Ri xaq xiw kubʼano are che kwa ta chi pa kebʼ oxibʼ qʼij...

Wet at, at Julia, ¿jas kabʼan riʼ?

QAS CHACHOMAJ

Jun ali che weneʼ 12 o 14 ujunabʼ tajin kril ribʼ pa jun espejo xuqujeʼ ri kril chrij ri ucuerpo qastzij taj che kuchomaj che sibʼalaj chom — Weneʼ ri kawil che ri acuerpo are ta ri qastzij.

Are ta jun itzel jastaq che katchoman chrij ri ubʼanik ri acuerpo. Ri Biblia kchʼaw chkij kʼi achijabʼ xuqujeʼ ixoqibʼ che e jeʼlik, junam rukʼ Sara, Raquel, José, David xuqujeʼ Abigail. Jun kʼutbʼal, jun ixoq ubʼiʼ Abisag kbʼixik che «sibʼalaj jeʼlik» (1 Reyes 1:4).

Are kʼu, e kʼi chke ri alabʼom alitomabʼ sibʼalaj kechoman chrij ri ubʼanik ri kicuerpo. Wariʼ kubʼan chke che kkiriq kʼi kʼax. Chatchoman chrij wariʼ:

Xilitajik, che 58% chke ri alitomabʼ kkibʼij che sibʼalaj e chomaʼq are kʼu ri qastzij che xa 17% che qas e chomaʼq.
Jun chik che xbʼixik are che ri ixoqibʼ che keʼopan ta pa ri kalal 45% chke kkibʼij che sibʼalaj e chomaʼq.
Jujun chke ri alabʼom alitomabʼ che sibʼalaj kechoman chrij rech man e chomaʼq taj, kiriqom jun yabʼil ubʼiʼ anorexia. Wariʼ are jun yabʼil che kuya ri kʼaslemal pa kʼax xuqujeʼ kubʼano che kkitij ta chi kiwa.

We kanaʼo che tajin kariq wajun yabʼil ubʼiʼ anorexia o jun chi kʼax rukʼ ri katijo, chataʼ tobʼanik. Chabʼij chke ri anan atat o jun chi winaq che nim chi ujunabʼ che kakubʼsaj akʼuʼx chrij. Ri Biblia kubʼij: «Jun achiʼl amaqʼel kel ukʼuʼx, pa taq kʼu ri qʼijol re riqoj kʼax jachaʼ jun achalalaxik» (Proverbios 17:17).

RI UTZ KATKUNIK KABʼANO

Ri qastzij, ri jeʼlikalaj ukaʼyebʼal jun winaq are ri e ubʼantajik. Chatchoman chrij ri kubʼij ri Biblia chrij ri Absalón, ri ukʼojol ri ajawinel David:

«Pa ronojel ri Israel man kʼo ta jun achi ri sibʼalaj ta jeʼl ukaʼyebʼal jachaʼ ri Absalón, sibʼalaj kʼu nim kil wi rumal waʼ. Man kʼo ta jun uyabʼ ronojel ri ucuerpo» (2 Samuel 14:25).

Are kʼu are jun ala che sibʼalaj xubʼan nim che ribʼ, xurayij kʼi jastaq xuqujeʼ kʼayinel. Rumal laʼ, ri Biblia kubʼij ta utz jastaq chrij; xaneʼ, kubʼij che are jun achi che sukʼ taj xuqujeʼ kamisanel nojinaq che itzelal.

Rumal laʼ, ri Biblia kubʼij chqe:

«Iwatzʼiʼaqim chi iwibʼ rukʼ ri kʼakʼ ikʼaslemal» (Colosenses 3:10).

«Ri ijeʼlikal ix ma ta are ri usukʼumaxik ri iwiʼ, [...] xaneʼ chiwiqaʼ iwibʼ pa ri iwanimaʼ» (1 Pedro 3:3, 4).

Kʼo ta kubʼano che kawaj utz katkayik, are kʼu ri abʼantajik are más nim na ubʼanik chuwach ri acuerpo. Are qastzij, che ri winaq are kkil ri utzalaj abʼantajik are ta rilik ri acuerpo. «We jeʼl rilik ri acuerpo, chanim riʼ kekaʼy ri winaq chawe —xubʼij jun ali ubʼiʼ Phylicia—, are kʼu ri kubʼan chke ri winaq che katkinaʼtaj are ri abʼantajik, ri utzalaj taq abʼantajik».

CHAWILAʼ RI AWACHBʼAL

¿La utz kawil ri acuerpo?

¿La kʼo jumul achomam che kabʼan jun operación re cirugía estética o kawaj kachaʼ ri katijo rech kasukʼumaj ri ubʼanik ri acuerpo?

¿Jas jastaq kawaj kasukʼumaj? (Chachaʼ ronojel ri kawaj kabʼano).

UNIMAL RI AWAQAN
AWALAL
AWIʼ
UBʼANIK RI ACUERPO
APALAJ
ATZʼUMAL

We xatzʼibʼaj «jeʼ» pa ri nabʼe kebʼ preguntas xuqujeʼ xachaʼ oxibʼ o más pa ri urox sección, chachomaj wariʼ: weneʼ ri nikʼaj chi winaq junam ta ri kichomanik rukʼ ri kachomaj at chrij ri acuerpo. Chnaʼtaj chawe che kʼi mul utz ta ri qachomanik chrij ri qabʼantajik o kojbʼison chrij ri qacuerpo (1 Samuel 16:7).