Wajxaqibʼ winaq kkimaj jun kʼakʼ uwach Ulew

Noé, ri ufamilia xuqujeʼ ri e chikop keʼok pa ri arca. Jehová xutzʼapij ri uchiʼja, tekʼuriʼ xumaj ri jabʼ. Sibʼalaj nim ri jabʼ che xubʼano che ri arca xpaqiʼ pa uwiʼ ri jaʼ. Nojimal, nojimal, ri uwach Ulew xnoj che joron. Konojel ri itzel taq winaq che xeʼok ta pa ri arca xekamik. Are kʼu ri Noé xuqujeʼ ri ufamilia kʼo ta xkiriqo rumal che e kʼo chupam ri arca. ¿La kachomaj ri kikotemal xkinaʼo rumal che xkinimaj ri Jehová?

Sibʼalaj nim ri jabʼ xubʼan pa 40 qʼij xuqujeʼ 40 chaqʼabʼ, tekʼuriʼ xtanik. Chiʼ xeqʼax ri tiempo, xqaj ri jaʼ. Kʼisbʼal re, ri arca xtakʼeʼ pa uwiʼ jun juyubʼ. Are kʼu rumal che kʼo na nim jaʼ pa ri Ulew, xqʼax jun tiempo che ri Noé xuqujeʼ ri familia xekun taj xeʼel pa ri arca.

Xeqʼax ri e qʼij, ri jaʼ xchaqijik. Ri tiempo, che Noé xuqujeʼ ri ufamilia xekʼojiʼ pa ri arca are más che jun junabʼ. Tekʼuriʼ, ri Jehová xubʼij chke che kekunik keʼel loq. ¡Kqʼalajinik che ronojel are jun kʼakʼ uwach Ulew! Sibʼalaj kemaltyoxinik rumal che ri Jehová xeʼukolo, rumal laʼ xkibʼan jun sipanik che.

Jehová utz xril ri sipanik, xuqujeʼ xutzujuj che kusachisaj ta chi ri kʼo cho ri uwach Ulew rukʼ jun nimalaj jabʼ junam rukʼ ri xkʼulmatajik. Jun etal rech ri tzujunik riʼ, xubʼano che nabʼe mul xel jun arcoíris pa ri kaj. ¿La kʼo jumul awilom jun arcoíris?

Xuqujeʼ, ri Jehová xubʼij che ri Noé xuqujeʼ ri ufamilia che kkʼojiʼ kalkʼwal xuqujeʼ kkinojisaj ri uwach Ulew.