Juan xril jun kʼutwachinik

Are chiʼ ri apóstol Juan tzʼapital pa cheʼ pa ri isla re Patmos, Jesús xukʼut 16 kʼutwachinik o wachbʼal rech ri petinaq. Pa ri e kʼutwachinik riʼ, Juan xril ri kbʼan che uchʼajchʼobʼisaxik ri ubʼiʼ ri Jehová, ri upetik ri Rajawbʼal xuqujeʼ ri kubʼan che ubʼanik ri urayibʼal waral pa ri uwach Ulew, junam pa ri kaj.

Pa jun kʼutwachinik, Juan kril ri Jehová pa ri utem re juluwem pa ri kaj. Chrij ri tem re ajawbʼal e kʼo 24 ajkʼamal taq bʼe. Kikojom saq taq atzʼyaq xuqujeʼ jun corona re qʼan pwaq. Pa ri tem rech ajawbʼal kel lo kaypaʼt xuqujeʼ kaqulja. Ri e 24 ajkʼamal taq bʼe kexukiʼ chuwach ri Jehová xuqujeʼ kkiqʼijilaj. Pa jun chi kʼutwachinik, Juan keril kʼiʼalaj winaq, o jun nimalaj jupuq winaq, re ronojel ri nimaʼq taq tinamit, alaj taq tinamit xuqujeʼ e chʼabʼal, che kkiqʼijilaj ri Jehová. Ri alaj Chij, che areʼ ri Jesús, areʼ ri kajyuqʼ xuqujeʼ kukʼam bʼi kibʼe jachiʼ kʼo wi ri jaʼ re kʼaslemal. Tekʼuriʼ, pa jun chi kʼutwachinik, Jesús kumaj ajawinik junam rukʼ jun ajawinel pa ri kaj kukʼ ri e 24 ajkʼamal taq bʼe. Pa ri jun chi kʼutwachinik, Juan kril ri Jesús tajin kchʼojin rukʼ ri Dragón, che are ri Satanás, xuqujeʼ ri itzel taq uxlabʼal. Jesús xeresaj lo pa ri kaj xuqujeʼ xeʼukʼaq lo cho ri uwach Ulew.

Tekʼuriʼ, Juan kril jun jeʼlikalaj kʼutwachinik rech ri alaj chij xuqujeʼ ri e 144.000 e takʼal pa ri juyubʼ Sion. Xuqujeʼ kril jun ángel che krapan pa uwiʼ ronojel ri uwach Ulew xuqujeʼ tajin kubʼij: «Nim chiwilaʼ ri Dios xuqujeʼ chiya uqʼij».

Pa jun chi kʼutwachinik, kril ri chʼoj re Armagedón. Pa wajun chʼoj riʼ, Jesús xuqujeʼ ri rajchʼojabʼ kkisachisaj uwach ri itzel taq winaq rech ri Satanás. Pa ri kʼisbʼal kʼutwachinik, Juan krilo che ri e kʼo pa ri kaj xuqujeʼ ri e kʼo pa ri uwach Ulew konojel junam kukʼam kibʼ xuqujeʼ e kʼo pa jamaril. Xuqujeʼ xril ri usachisaxik uwach ri Satanás xuqujeʼ ri rijaʼlil, kraj kubʼij, ri keteriʼ chrij. Pa ri kaj xuqujeʼ pa ri uwach Ulew, konojel kkil ri ubʼiʼ ri Jehová che chʼajchʼoj xuqujeʼ kkiqʼijilaj xaq xiw ri areʼ.