KʼUTUNEM 56
Chayaʼ ri atobʼanik rech kkʼojiʼ jamaril pa ri congregación
Are chiʼ oj kʼo kukʼ ri qachalal, kqanaʼ ri xunaʼ ri qʼatal tzij David. Che xubʼij: «¡Chiwilaʼ chi sibʼalaj utz xuqujeʼ jeʼlik chi ri achalaxik kejeqiʼ junam!» (Salmo 133:1). Rajawaxik qonojel kqakoj qachuqʼabʼ rech kkʼojiʼ utzilal chqaxoʼl.
1. ¿Jas más utz kkil ri winaq pa ri utinamit ri Dios?
We katbʼe pa jun congregación re jun chi tinamit, weneʼ kachʼobʼ ta ri kichʼabʼal ri winaq che e kʼo chilaʼ; are kʼu kanaʼo che jetaneʼ kachʼobʼ chi kiwach ri qachalal. ¿Jasche? Rumal che apastaneʼ ri lugar che katbʼe wi, ri oj testigos rech Jehová junam wuj kqanikʼoj uwach cho ronojel ri uwach Ulew. Xuqujeʼ kqakoj qachuqʼabʼ che ukʼutik loqʼoqʼebʼal chbʼil taq qibʼ. Apastaneʼ ri lugar che oj kʼo wi, qonojel kqaj che pa junamam kqaya uqʼij ri ubʼiʼ ri Jehová (Sofonías 3:9).
2. ¿Jas rajawaxik kabʼano rech kʼo utzilal pa ri congregación?
«Chiloqʼoqʼela bʼaʼ iwibʼ rukʼ ronojel iwanimaʼ» (1 Pedro 1:22). ¿Jas kabʼan che unimaxik wajun pixabʼ riʼ? Are ta kawil ri mak che kkibʼan ri nikʼaj chik, xaneʼ are chawilaʼ ri utz taq kibʼantajik. Xaq xiw ta katkʼojiʼ kukʼ winaq che junam ri kichomanik awukʼ; xaneʼ chatkʼol kukʼ nikʼaj chik che jalajoj kitinamit y kibʼantajik. Xuqujeʼ, chawesaj pa awanimaʼ ronojel uwach itzelal (chasikʼij 1 Pedro 2:17).a
3. ¿Jas kabʼano we kkʼulmataj jun chʼoj chixoʼl rukʼ jun chi cristiano?
Qastzij che kʼo jun utzalaj achilanik chqaxoʼl; are kʼu, rumal che xa oj ajmakibʼ, jujun taq mul kqabʼano o kqabʼij jun jastaq che kubʼan kʼax che jun chik. Rumal laʼ ri uTzij ri Dios kubʼij: «Chisachalaʼ imak chbʼil taq iwibʼ [...]. Jas ri Ajawaxel xusach ri imak ix, je chibʼanaʼ ix xuqujeʼ» (chasikʼij Colosenses 3:13). Kʼi mul kqabʼan kʼax che ri Jehová, are kʼu ri areʼ amaqʼel kukuy ri qamak. Rumal laʼ kraj che oj xuqujeʼ kqakuy kimak ri qachalal. We kawilo che xabʼan kʼax che jun winaq, chataʼ sachbʼal amak che (chasikʼij Mateo 5:23, 24).b
CHANIMARISAJ RI AWETAʼMANIK
Chqilaʼ jas rajawaxik kqabʼano rech kʼo jamaril y utzilal pa ri congregación.
¿Jas rajawaxik kabʼano rech kasukʼumaj jun chʼoj rukʼ jun winaq?
4. Cheʼaloqʼoqʼej konojel ri winaq
Kqaj kqakʼut loqʼoqʼebʼal chke konojel ri qachalal. Are kʼu weneʼ jujun taq mul kʼax kqabʼan che ukʼutik are chiʼ junam ta ri qabʼanik kukʼ. ¿Jas kojtoʼwik rech kqakʼut loqʼoqʼebʼal chke konojel? Chisikʼij Hechos 10:34, 35 y chixtzijon chrij wariʼ:
Jehová kraj che jalajoj kiwach winaq keʼux uTestigos. ¿Jas rajawaxik kqabʼano rech nim keqil ri winaq che junam ta kibʼanik qukʼ?
¿La kʼo itzelal pa kanimaʼ ri winaq che katel wi? ¿Jasche utz taj itzel kqil jun winaq che junam ta qukʼ?
Chisikʼij 2 Corintios 6:11-13 y chixtzijon chrij wariʼ:
¿Jas rajawaxik kabʼano rech keʼaloqʼoqʼej konojel ri qachalal?
5. Chqakuyuʼ makaj y chqasukʼumaj ri chʼoj che kʼo chqaxoʼl
Ri Jehová kʼo ta jumul kmakunik rumal laʼ rajawaxik taj kqakuy umak. Are kʼu ri areʼ kraj kukuy qamak. Chisikʼij Salmo 86:5 y chixtzijon chrij wariʼ:
Junam rukʼ ri xqil pa ri versículo, ¿jas kubʼan ri Jehová che ukuyik qamak?
¿La kamaltyoxij at che ri Jehová kukuy qamak? ¿Jasche?
¿Jas kbʼanowik che utz ta kqanaʼo kojkʼojiʼ kukʼ nikʼaj chik?
¿Jas kqabʼan che resaxik uwach ri Jehová we kqaj kojkʼojiʼ pa junamam kukʼ ri qachalal? Chisikʼij Proverbios 19:11 y chixtzijon chrij wariʼ:
Are chiʼ jun winaq kubʼano o kubʼij jun jastaq che kʼax kanaʼo, ¿jas kabʼano rech knimataj ta ri chʼoj?
Jujun taq mul oj kojbʼanow kʼax chke ri nikʼaj chik. ¿Jas kqabʼan riʼ are chiʼ kkʼulmataj wariʼ? Chiwilaʼ ri VIDEO y chixtzijon chrij wariʼ:
¿Jas xubʼan ri qachalal rech xusukʼumaj ri chʼoj che kʼo chkixoʼl?
6. Chawilaʼ ri utz taq kibʼantajik ri qachalal
Are chiʼ más kqetaʼmaj kiwach ri qachalal, kqil ri utz taq kibʼantajik y ri nikʼaj chi jastaq che utz ta kkibʼano. ¿Jas rajawaxik kqabʼano rech are kqil ri utz taq kibʼantajik? Chiwilaʼ ri VIDEO y chixtzijon chrij wariʼ:
¿Jas kattoʼwik rech are kawil ri utz kibʼantajik ri qachalal?
Ri Jehová are kril ri utz qabʼantajik. Chisikʼij 2 Crónicas 16:9a y chixtzijon chrij wariʼ:
¿Jas kanaʼo are chiʼ kawetaʼmaj che ri Jehová are kril ri utz taq abʼantajik?
Paneʼ jun jeʼlalaj diamante uriqom kʼax, are kʼu kʼa paqal na rajil. Xuqujeʼ je kkʼulmataj kukʼ ri qachalal: man e tzʼaqat taj, are kʼu chuwach ri Jehová sibʼalaj nim kibʼanik.
RI KKICHOMAJ JUJUN WINAQ: «We aninaq kinkuyulaʼ umak kril ta riʼ che sibʼalaj xubʼan kʼax chwe».
¿Jasche rajawaxik amaqʼel kqakuy kimak ri nikʼaj chik?
RI XQETAʼMAJ
We kakuy kimak ri qachalal y kakʼut loqʼoqʼebʼal chke konojel, kattobʼanik rech kʼo utzilal pa ri congregación.
¿La knaʼtaj chawe?
¿Jas kabʼano rech itzel ta kawil jun winaq?
¿Jas kabʼano are chiʼ kʼo jun chʼoj chixoʼl rukʼ jun qachalal?
¿La kawaj kakuy kimak ri nikʼaj chik junam rukʼ ri kubʼan ri Jehová? ¿Jasche?
CHAWILAʼ CHI NIKʼAJ
Chawilaʼ jas kʼutbʼal xukoj ri Jesús rech kqaqʼat ta tzij pa kiwiʼ nikʼaj chik.
Rajawaxik kqataʼ sachbʼal qamak paneʼ kʼo ta jun kʼax qabʼanom.
«Utaʼik sachbʼal makaj, kubʼano che kʼo utzilal chqaxoʼl» (La Atalaya, 1 re noviembre 2002)
Chqilaʼ ri kibʼanom jujun winaq rech jalan ta kkibʼan che kilik ri e nikʼaj chik.
Ri kqetaʼmaj pa «Ri Chajinel»: Kqaqʼat ta tzij pa kiwiʼ e nikʼaj chik xa rumal ri kibʼantajik (5:06)
Chawilaʼ ri kbʼan che usukʼumaxik jun chʼoj rukʼ jun qachalal rech kʼo jamaril pa ri congregación.
«Rukʼ loqʼoqʼebʼal chqasukʼumaj jun chʼoj» (La Atalaya, mayo 2016)