Jujun taq pixabʼ rech utz kel ri riqbʼal ibʼ kbʼanik are chiʼ kojbʼe che utzijoxik ri utzij ri Dios

Ri e riqbʼal ibʼ kbʼanik are chiʼ kojbʼe che utzijoxik utzij ri Dios e junam rukʼ ri riqbʼal ibʼ re congregación, e usipanik ri Jehová che kojkitoʼ che uloqʼoqʼexik qibʼ y kqatoʼlaʼ qibʼ che ubʼanik utz taq chak (Heb 10:24, 25). Weneʼ 5 o 7 minutos kkoj che ubʼanik ri alaj taq jupuq, ubʼixik jawiʼ kqatzijoj wi ri utzij ri Dios y ri ubʼanik ri chʼawem. Are kʼu weneʼ kukʼam ta bʼi 5 minutos we kʼateʼ xkʼis jun riqbʼal ibʼ re congregación. Ri kʼamal bʼe che utzijoxik utzij ri Dios pa riʼ ri qʼij rajawaxik kchʼaw chrij jun kʼutunem che keʼutoʼ konojel ri e qachalal. Jun kʼutbʼal, pa taq sábado, are chiʼ e kʼi qachalal kekunik kebʼe che utzijoxik ri utzij ri Dios rumal che e kunaq ta pa taq ri qʼij chuxoʼl semana, weneʼ utz are kbʼix chke jas kkibʼij chuchiʼ taq ja. ¿Jas taq kʼutunem kojkunik kqakoj pa ri riqbʼal ibʼ kbʼanik are chiʼ kojbʼe che utzijoxik utzij ri Dios?

• Ri e kʼutbʼal re tzijonem re ri Qachak xuqujeʼ Qakʼaslemal ri oj Cristianos: Wuj re chak.

• Jun jastaq che kʼateʼ xkʼulmataj pa ri tinamit oj kʼo wi rech kqamaj tzijonem rukʼ ri winaq.

• Jun kʼutunem rech kojkunik kqataqej tzijonem paneʼ ri e winaq kkiqʼatej uwach ri qatzij.

• Jun kʼutunem che kojutoʼ rech kojkunik kojtzijon kukʼ ri e winaq che kkikoj taj che kʼo Dios, ri kkibʼij che xaq kʼateʼ xkʼulmataj ri kʼaslemal, ri kechʼaw pa jun chi chʼabʼal o ri e winaq re jun kojonem che qas ta kriqitaj pa ri qatinamit.

• Jun kʼutunem che kchʼaw chrij ri kqabʼan che ukojik ri jw.org, ri aplicación JW Library^® o ri Biblia.

• Ri kqabʼan che kikojik ri e wuj re ri chakubʼal re tijonik.

• Ri kbʼan che utzijoxik utzij ri Dios pa teléfono, rukʼ cartas, ri predicación pública, ri kbʼan che usolixik jun winaq o ri kbʼan che uyaʼik jun etaʼmanik re ri Biblia.

• Jun kʼutunem che kchʼaw chrij ri kqabʼan che uchajixik qibʼ, rilik jas rajawaxik chke ri winaq, ukʼutik utz taq bʼantajik, ukʼutik chkiwach ri winaq che kojkikot rukʼ ri chak tajin kqabʼano y nikʼaj chi jastaq.

• Jun kʼutunem o jun video re ri folleto Chojux utz taq sikʼil uwach wuj xuqujeʼ ajtijabʼ.

• Jun kʼutunem che kchʼaw chrij ri kqabʼan che uyaʼik kichuqʼabʼ o che kitoʼik ri e qachiʼl che utzijoxik ri utzij ri Dios.

• Jun texto o jun jastaq kʼulmatajinaq pa ukʼaslemal jun qachalal che kʼo ubʼanik rukʼ ri utzijoxik ri utzij ri Dios.