Kipreguntas ri sikʼinelabʼ

Are chiʼ ri Jesús xubʼan ri Cena del Señor, ¿jawchiʼ e kʼo wi ri 70 u discípulos che nabʼe kanoq xeʼutaq che utzijoxik ri utzij ri Dios? ¿La xa xkiya kanoq?

Maqachomaj che ri 70 discípulos xa xkiya kan ri Jesús o ri areʼ xa kraj ta chik kekʼojiʼ rukʼ y rumal laʼ xekʼojiʼ ta pa ri Cena del Señor. Pa ri chaqʼabʼ riʼ ri Jesús xaq xiw kukʼ ri u apóstoles xraj xkʼojiʼ wi.

Ri Jesús sibʼalaj keʼuloqʼoqʼej ri e 12 y ri 70. Nabʼe xeʼuchaʼ 12 achijabʼ chkixoʼl ri u discípulos y xubʼij apóstoles chke (Luc. 6:12-16). E kʼo pa Galilea are chiʼ «xeʼusikʼij ri kabʼlajuj utijoxelab» y «xeʼutaq bʼik che utzijoxik ri rajawibʼal ri Dios, che kunanik» (Luc. 9:1-6). Tekʼuriʼ pa ri sur re Judea, xeʼuchaʼ chi 70 y «pa kakabʼil xeʼutaq bʼik rech kenabʼej bʼik chuwach» (Luc. 9:51; 10:1). Rumal laʼ pa taq ri lugares che xkitzijoj wi ri utzij ri Dios e kʼo discípulos chilaʼ.

Ri judíos che xkibʼan utijoxelabʼ ri Jesús kkibʼan ri Pascua kukʼ ri ki familias ronojel taq junabʼ (Éx. 12:6-11, 17-20). Are chiʼ xa jubʼiqʼ chi kraj che kkamik, ri Jesús xbʼe kukʼ ri u apóstoles pa Jerusalén. Are kʼu xebʼe ta ri u discípulos re Judea, Galilea y Perea rukʼ che ubʼanik ri Pascua. Ri Jesús xaq xiw kukʼ ri u apóstoles xraj xkʼojiʼ wi. Rumal laʼ xubʼij chke: «Sibʼalaj nurayim utijik we waʼim riʼ re ri Okʼowem iwukʼ kʼa majoq kinriq kʼax» (Luc. 22:15).

¿Jasche xaq xiw kukʼ ri e areʼ xraj xkʼojiʼ wi? Rumal che ri areʼ are «ri Alaj uChij ri Dios, ri kresaj ri kimak ri winaq» y rumal che xa jubʼiqʼ chi kraj kkamik (Juan 1:29). Pa Jerusalén kkam wi, ri tinamit jawiʼ kyaʼ wi ri sacrificios che ri Dios. Rumal ri ukamikal ri Jesús, ri winaq kesax na chuxeʼ ri kamikal, wariʼ más nim na ubʼanik chuwach ri alaj chij che xkitij ri israelitas pa ri chaqʼabʼ che xeʼel lo pa Egipto (1 Cor. 5:7, 8). Rumal che ri Jesús xuya ri ukʼaslemal, ri 12 apóstoles xekunik xetobʼanik rech xmajtaj ri nabʼe congregación cristiana (Efes. 2:20-22). Nim ubʼanik che pa ri Jerusalén ajchikaj «e kʼo kabʼlajuj [12] utakʼalibʼal» y chilaʼ e tzʼibʼam «ri kabʼlajuj kibʼiʼ ri kabʼlajuj taqom ri e rech ri Alaj Chij» o ri apóstoles (Apoc. 21:10-14). Rumal laʼ ri nimalaj eqeleʼn che yaʼom chke ri apóstoles kubʼano che ktzʼaqat ri urayibʼal ri Dios. Rumal laʼ ri Jesús xaq xiw kukʼ ri u apóstoles xraj xkʼojiʼ pa ri chaqʼabʼ are chiʼ xubʼan ri kʼisbʼal Pascua y xuya ri taqanik rech kbʼan ri Cena del Señor.

Ri nikʼaj chi u discípulos y ri 70 xekʼojiʼ ta rukʼ ri Jesús pa wajun chaqʼabʼ riʼ. Pero konojel ri u discípulos che kkiya ta kan unimaxik kkiriq na utzilal rumal ri Cena del Señor. ¿Jasche? Rumal che ri Jesús xubʼan jun pacto kukʼ ri u apóstoles pa wajun chaqʼabʼ riʼ y konojel ri cristianos che kechaʼ na rech kebʼe pa ri kaj kekunik kkiqʼat tzij kukʼ (Luc. 22:29, 30).