Kaya ta bʼe che kʼo katqʼaten che ubʼanik ri a bautismo

1. ¿Jasche (o suche) utz che kabʼan ri a bautismo?

¿LA KALOQʼOQʼEJ at ri Jehová, ri Dios che uyaʼom ri akʼaslemal y ronojel rech katkikotik? ¿La kawaj kakʼut ri aloqʼoqʼebʼal che? Kakʼut ri aloqʼoqʼebʼal che are chiʼ kajach ri akʼaslemal y kabʼan ri a bautismo. Are chiʼ kabʼan wariʼ katok pa ri u familia ri Jehová. Rumal che are chiʼ katok pa ri u familia jetaneʼ are ri atat y awamigo, rumal laʼ katuchajij na y kukʼam abʼe pa ri akʼaslemal (Sal. 73:24; Is. 43:1, 2). Xuqujeʼ are chiʼ kajach ri akʼaslemal che y kabʼan ri a bautismo, katkunik kariq ri kʼaslemal kʼo ta ukʼisik (1 Ped. 3:21).

2. ¿Jas kqil na pa wajun kʼutunem riʼ?

² Weneʼ kʼo tajin katqʼaten che ubʼanik ri a bautismo. Katbʼison taj xaq xiw ta at kakʼulmaj wariʼ. E kʼi winaq kikʼexom ri kibʼantajik y ri kichomanik rech kekunik kkibʼan ri ki bautismo. Pero kamik tajin kkipatanij ri Jehová rukʼ kikotemal. Pa wajun kʼutunem riʼ kojchʼaw na chkij jujun winaq che xkibʼan ki bautismo pa ri nabʼe siglo. Kqil na jas kʼax xkikʼulmaj y jas xetoʼwik. Chakojoʼ achuqʼabʼ che uchʼobʼik kiwach y chabʼanaʼ awe ri xkibʼano paneʼ at ala na o nim chi ri ajunabʼ.

RI SAMARITANOS XKIBʼAN KI BAUTISMO

3. ¿Jas rajawaxik xkibʼan na ri samaritanos rech xkibʼan ki bautismo?

³ Pa taq ri u tiempo ri Jesús, ri samaritanos e kʼo pa jun kojonem che kʼo naqaj che Siquem y Samaria, pa ri norte re Judea. Rech kekunik kkibʼan ki bautismo rajawaxik kketaʼmaj ri kukʼut ri Utzij ri Dios, rumal che kkichomaj che xaq xiw ri nabʼe cinco wuj re ri Biblia petinaq rukʼ ri Dios —ri wuj re Génesis kopan Deuteronomio— y weneʼ ri wuj re Josué. Rumal che ketaʼm ri utzujum ri Dios chke pa Deuteronomio 18:18, 19, kkikojo che kpe na ri Mesías (Juan 4:25). Rech kekunik kkibʼan ki bautismo rajawaxik qas kkikojo che ri Jesús are ri Mesías. Y e kʼi samaritanos xekojon chrij wariʼ (Juan 4:39). Weneʼ jujun xkikʼex ri kichomanik chkij ri judíos (Luc. 9:52-54).

4. Junam rukʼ ri kubʼij Hechos 8:5, 6, 14, ¿jas xkibʼan jujun samaritanos are chiʼ ri Felipe xutzijoj ri utzij ri Dios chke?

⁴ ¿Jas xeʼutoʼ ri samaritanos rech xkibʼan ki bautismo? Are chiʼ ri Felipe «xutzijoj ri Cristo chke» jujun chke xkinimaj «ri utzij ri Dios» (chasikʼij Hechos 8:5, 6, 14). Paneʼ ri Felipe are judío, ri samaritanos xkitatabʼej ri xubʼij chke. Weneʼ xpe pa kijolom ri kubʼij ri Biblia che ri Dios jalan ta keril ri winaq (Deut. 10:17-19). Apastaneʼ ri xkʼulmatajik «konojel kʼut junam kiwach kkitatabʼej ri kubʼij ri Felipe» chrij ri Cristo. Qas xkikojo che are ri Dios xtaqow lo ri Felipe, rumal che xuqujeʼ xubʼan kʼi milagros, xeʼukunaj ri yawabʼibʼ y xresaj ri demonios chke ri winaq (Hech. 8:7).

5. ¿Jas kawetaʼmaj chkij ri samaritanos?

⁵ Ri samaritanos kʼo ta jumul kitom ri xubʼij ri Felipe chke y rumal che judío, xekun ta riʼ xkibʼij che che kkaj taj kkitatabʼej ri kubʼij chke. Pero xkibʼan ta wariʼ. Are chiʼ xkichʼobʼo che ri xubʼij ri Felipe chke are ri qastzij, xkibʼan ki bautismo. Ri Biblia kubʼij: «Are taq kʼu xekojon chke ri e utzalaj taq tzijol rech ri rajawibʼal ri Dios xuqujeʼ ri rech ri Jesucristo ri xeʼutzijoj ri Felipe chke, xbʼan kʼut ri ki bautismo ri achijabʼ xuqujeʼ ri ixoqibʼ» (Hech. 8:12). ¿Y ri at? ¿La qas kakojo che ri kubʼij ri Biblia are ri qastzij y che ri testigos rech Jehová kkikoj kichuqʼabʼ che ukʼutik ri qastzij loqʼoqʼebʼal che xubʼij ri Jesús che kkikʼut ri upatanelabʼ ri Dios? (Juan 13:35). We awilom chi ronojel wariʼ, mayaʼ bʼe che kʼo katqʼaten che ubʼanik ri a bautismo. Qas chakojoʼ che ri Jehová katutewchiʼj na.

6. ¿Jas kawetaʼmaj chrij ri xukʼulmaj ri a Ruben?

⁶ Ri a Ruben che kel pa Alemania, xalax pa jun familia che e testigos rech Jehová, pero are chiʼ kʼa ala na qas ta kukojo che kʼo Dios. ¿Jas xtoʼwik rech kukojo che kʼo ri Dios? Ri areʼ xrilo che rajawaxik kunimarisaj ri retaʼmanik chrij ri Dios. Rumal laʼ ri areʼ kubʼij: «Xinbʼan ri nu estudio personal rech kinriq u respuetas ri nu preguntas. Kʼi taq mul xintzukuj información chrij ri evolución». Ri qachalal Ruben xusikʼij ri libro ¿Existe un Creador que se interese por nosotros? y wariʼ sibʼalaj xutoʼ pa ri ukojonik. Y kubʼij chik: «Qas xinchʼobʼo che kʼo ri Dios». Ri a Ruben xuqujeʼ xbʼe pa ri central mundial y sibʼalaj xumay ri loqʼoqʼebʼal che ko chkixoʼl ri upatanelabʼ ri Dios cho ronojel ri uwach Ulew. Are chiʼ xtzalij pa Alemania, xubʼan u bautismo are chiʼ 17 ujunabʼ. We qas ta kachʼobʼ ri kubʼij ri Biblia, chatzukuj más información pa ri e qawuj. «Ri tzʼaqatalaj etabʼalil re ri tzʼaqatil» katutoʼo rech qas kachʼobʼ ri kubʼij ri Biblia (Efes. 4:13, 14). Y nim katutoʼ riʼ are chiʼ kawil ri loqʼoqʼebʼal che kʼo chkixoʼl ri qachalal cho ronojel ri uwach Ulew y más na are chiʼ kawil wariʼ pa ri a congregación.

RI SAULO DE TARSO XUBʼAN U BAUTISMO

7. ¿Jasche rajawaxik xukʼex ri uchomanik ri Saulo?

⁷ Chojchoman chrij ri Saulo de Tarso, che are jun judío y che kʼi kkun che ubʼanik pa ri judaísmo (Gál. 1:13, 14; Filip. 3:5). Pa ri tiempo riʼ ri judíos kkichomaj che ri cristianos xa e apóstatas. Rumal laʼ ri Saulo rukʼ itzelal xeʼutereneʼj ri cristianos. Xuchomaj che rukʼ wariʼ tajin kubʼan ri kqaj chuwach ri Dios (Hech. 8:3; 9:1, 2; 26:9-11). Pero we kkojon chrij ri Dios y kubʼan ri u bautismo, kukʼulmaj na jujun taq kʼax.

8. a) ¿Jas xtoʼw ri Saulo rech xubʼan ri u bautismo? b) Junam rukʼ ri kubʼij Hechos 22:12-16, ¿jas xubʼan ri Ananías che utoʼik ri Saulo? (Xuqujeʼ chawilaʼ ri wachbʼal).

⁸ ¿Jas xtoʼw ri Saulo rech xubʼan ri u bautismo? Are chiʼ ri Jesús xchʼaw lo pa ri kaj, jun saqalaj luz xubʼano che xmoyir o xpotzʼir ri Saulo (Hech. 9:3-9). Pa oxibʼ qʼij xwaʼ taj y weneʼ xaq kchoman chrij ri xukʼulmaj. Qas xukojo che ri Jesús are ri Mesías y che ri cristianos are ri qastzij kojonem. Y weneʼ sibʼalaj xbʼisonik rumal che xtobʼan che ukamisaxik ri Esteban (Hech. 22:20). Are chiʼ xqʼax ri oxibʼ qʼij, ri discípulo Ananías xbʼe che rilik ri Saulo, xuchʼabʼej rukʼ utzalaj taq tzij, xubʼano che kkaʼy chi jumul y xutoʼ che rilik che rajawaxik kubʼan ri u bautismo (chasikʼij Hechos 22:12-16). Ri Saulo xumachʼ ribʼ, xukʼam ri tobʼanik che xuya ri Ananías che y xukʼex ri ukʼaslemal (Hech. 9:17, 18).

9. ¿Jas kawetaʼmaj chrij ri xukʼulmaj ri Saulo?

⁹ Ko kʼi kqetaʼmaj chrij ri xukʼulmaj ri Saulo. Ri areʼ xkun ta riʼ xuya bʼe che kubʼan nim che ribʼ o ri xibʼin ibʼ kuqʼatej che ubʼanik ri u bautismo. Pero xuya taj che wariʼ kuqʼatej. Are chiʼ xretaʼmaj chrij ri Cristo, xukʼut machʼachʼem y xukoj uchuqʼabʼ che ukʼexik ri ukʼaslemal (Hech. 26:14, 19). Xraj xux cristiano paneʼ retaʼm che kterneʼx na (Hech. 9:15, 16; 20:22, 23). Are chiʼ ubʼanom chi ri u bautismo, xuya ta kan ukubʼsaxik ukʼuʼx chrij ri Jehová paneʼ xuriq kʼi taq kʼax (2 Cor. 4:7-10). Are chiʼ at kabʼan ri a bautismo weneʼ kakʼulmaj na jujun taq kʼax. Pero ri Jehová y ri Jesús amaqʼel e kʼo che atoʼik (Filip. 4:13).

10. ¿Jas kawetaʼmaj chrij ri xukʼulmaj ri al Anna?

¹⁰ Chqilaʼ ri xukʼulmaj ri al Anna che kel pa ri Este re Europa y xkʼiy pa jun familia kurda. Are chiʼ ubʼanom chi ri u bautismo ri unan, ri utat ri al Ana xuya u permiso rech kumaj jun etaʼmanik re ri Biblia are chiʼ 9 ujunabʼ. Ri areʼ kʼo kukʼ konojel ri u familia che xa pa jun ja e kʼo wi juntir y are chiʼ xketaʼmaj che ri al Anna tajin kretaʼmaj chrij ri Biblia kukʼ ri testigos rech Jehová, xpe koyowal chrij. Ri areʼ xkichomaj che are jun kʼixbʼal che kuya kan ri kikojonik ri u familia. Are chiʼ ri al Anna 12 ujunabʼ xubʼij che ri utat che kraj kubʼan ri u bautismo. Ri areʼ xutaʼ che ri al Anna we pa uchomanik xpe wi che kraj kubʼan ri u bautismo o xa ktaqchix che ubʼanik. Ri areʼ xubʼij: «Kinloqʼoqʼej ri Jehová». Rumal laʼ ri utat xubʼij che che kkunik kubʼan ri u bautismo we are laʼ ri kraj. Are chiʼ ri al Anna ubʼanom chi ri u bautismo, ri u familia xkitzeʼj uwach y kʼax xechʼaw che. Jun chke xubʼij: «Más utz katel riʼ we ta are kabʼan relaciones sexuales kukʼ achijabʼ y katij sikʼ chuwach che xabʼan testigo rech Jehová». ¿Jas xtoʼw ri al Anna che uchʼijik ri xukʼulmaj? Ri areʼ kubʼij: «Ri Jehová xuya nuchuqʼabʼ. Y xinkitoʼ ri nunan nutat». Ri al Anna xutzʼibʼaj ri ubʼanom ri Jehová che utoʼik y jujun taq mul kusikʼij chi jumul rech ksach ta pa ujolom. We at kaxiʼj awibʼ che kbʼan kʼax chawe, chnaʼtaj chawe che ri Jehová kʼo che atoʼik (Heb. 13:6).

RI CORNELIO XUBʼAN U BAUTISMO

11. ¿Jas ri weneʼ xbʼanowik che ri Cornelio kubʼan ta ri u bautismo?

¹¹ Chqilaʼ ri xukʼulmaj ri Cornelio. Ri areʼ are jun kʼamal bʼe kech 100 soldados romanos (Hech. 10:1). Rumal laʼ nim kil kumal ri winaq pa ri tinamit y pa ri ejército. Xuqujeʼ ri Biblia kubʼij che ri Cornelio «nim ri pwaq ri kuyaʼ che kitoʼik ri» kʼo kirajawaxik (Hech. 10:2). Ri Jehová xukoj ri apóstol Pedro rech kutzijoj ri utz taq noticias che. ¿Jas xuchomaj ri Cornelio chrij ri xbʼix che? ¿La xubʼey ri u bautismo xa rumal che nim ubʼanik y nim kil kumal ri winaq?

12. ¿Jas xtoʼw ri Cornelio rech xubʼan ri u bautismo?

¹² ¿Jas xtoʼw ri Cornelio rech xubʼan u bautismo? Ri Biblia kubʼij che are «jun achi nimanel che ri Dios ri junam kukʼ konojel ri e rachalaxik keqʼijilan che ri Dios» y che «kubʼan chʼawem rukʼ Dios amaqʼel» (Hech. 10:2). Are chiʼ ri Pedro xutzijoj ri utz taq noticias che, ri areʼ y ri u familia aninaq xkibʼan ri ki bautismo (Hech. 10:47, 48). Qastzij riʼ che ri Cornelio rajawaxik xukoj uchuqʼabʼ rech xukʼex ri ubʼantajik y kupatanij ri Jehová rukʼ ri u familia (Jos. 24:15; Hech. 10:24, 33).

13. ¿Jas kawetaʼmaj chrij ri xubʼan ri Cornelio?

¹³ Junam rukʼ ri Saulo, ri Cornelio are jun achi che qʼinom y weneʼ wariʼ kubʼano che kbʼeyetaj che upatanexik ri Dios. Pero xuya ta bʼe che wariʼ xuqʼatej. ¿Y ri at? ¿La kʼo rajawaxik kakʼex na pa ri akʼaslemal rech jeriʼ kabʼan ri a bautismo y kapatanij ri Dios? Chnaʼtaj chawe che ri Jehová katutoʼ na. Kutewchij na ri chuqʼabʼ che kakoj che upatanexik y che kabʼan pa ri akʼaslemal ri kubʼij chawe.

14. ¿Jas kawetaʼmaj chrij ri xukʼulmaj ri a Tsuyoshi?

¹⁴ Ri a Tsuyoshi che kel pa Japón, rajawaxik kʼo xukʼex pa ri uchak rech kkunik kubʼan ri u bautismo. Ri areʼ kutoʼ ri director re ri escuela Ikenobo jawiʼ kkʼut chkiwach ri winaq ri kbʼan che ubʼanik arreglar kotzʼiʼj. Ri director keʼukʼam bʼi kotzʼiʼj are chiʼ kkam jun winaq y kubʼan ceremonias jachaʼ ri ki costumbres ri budistas. Pero are chiʼ kkun taj kbʼek, kutaq bʼi ri a Tsuyoshi rech keʼukʼam bʼi ri kotzʼiʼj y kubʼan ri ceremonias. Pero, are chiʼ ri a Tsuyoshi xretaʼmaj ri kubʼij ri Biblia chkij ri kaminaqibʼ, xrilo che kkun taj kubʼan ri u bautismo we man kuya kan ubʼanik ri tajin kubʼano. Rumal laʼ xuya kan ubʼanik ri ceremonias (2 Cor. 6:15, 16). Xtzijon rukʼ ri director chrij wariʼ y xchakun na chilaʼ pero kubʼan ta chi ri ceremonias. Ri a Tsuyoshi xubʼan ri u bautismo weneʼ are chiʼ jun junabʼ chik qʼaxinaq che tajin kretaʼmaj chrij ri Biblia.a We ri at kʼo rajawaxik kakʼex pa ri achak rech katqaj chuwach ri Dios, chnaʼtaj chawe che ri Jehová amaqʼel kʼo che atoʼik y kuya na ri kajwataj chawe y che ri a familia (Sal. 127:2; Mat. 6:33).

RI CORINTIOS XKIBʼAN RI KI BAUTISMO

15. ¿Jas ri weneʼ xbʼanowik che ri corintios kkibʼan ta ri ki bautismo?

¹⁵ Ri corintios qas etaʼmatal kiwach che más nim kkil ri pwaq y che kkibʼan tzʼil taq mak. Kʼi chke kkibʼan jastaq che utz ta kril ri Jehová. Rumal laʼ we kʼo jun kraj kubʼan ri u bautismo qas rajawaxik kukoj na uchuqʼabʼ che ukʼexik ri ukʼaslemal. Pero, are chiʼ ri apóstol Pablo xopan pa Corinto y xutzijoj ri utz taq tzij chrij ri Cristo chke, «kʼi chke ri aj corintibʼ, are taq xkito, xekojonik, xbʼan ri ki bautismo» (Hech. 18:7-11). Y are chiʼ ri Jesús xukʼut ribʼ chuwach ri Pablo xubʼij: «E kʼo kʼu kʼi nuwinaq chupam we tinamit riʼ». Y ri apóstol xkanaj kan jun junabʼ rukʼ nikʼaj chilaʼ che utzijoxik ri utzij ri Dios.

16. ¿Jas xetoʼw ri corintios rech xkibʼan ri ki bautismo? (2 Corintios 10:4, 5).

¹⁶ ¿Jas xetoʼw ri corintios rech xkibʼan ri ki bautismo? (Chasikʼij 2 Corintios 10:4, 5). Rukʼ ri espíritu santo y ri Utzij ri Dios ri winaq xekunik xkikʼex ri kikʼaslemal (Heb. 4:12). Ri corintios che utz xkita ri utz taq noticias, xkiya kan ubʼanik tzʼil taq makaj junam rukʼ ri homosexualidad, ri qʼabʼarik y ri elaqʼ (1 Cor. 6:9-11).b

17. ¿Jas kawetaʼmaj chrij ri xkibʼan ri corintios?

¹⁷ Ri corintios rajawaxik xkikʼex jujun jastaq pa ri kikʼaslemal rech xekunik xkibʼan ki bautismo y xkichomaj taj che kekun ta che ubʼanik. Xaneʼ xkikoj kichuqʼabʼ rech kkibʼan ri kqaj chuwach ri Dios y jeriʼ kkiriq ri kʼaslemal kʼo ta ukʼisik (Mat. 7:13, 14). ¿Y ri at? ¿La tajin kakoj achuqʼabʼ che uyaʼik kan ubʼanik ri utz ta kril ri Dios? ¡Mayaʼ kan ukojik achuqʼabʼ! Chataʼ che ri Jehová che kuya ri espíritu santo chawe rech katutoʼ chuwach ri tentación.

18. ¿Jas kubʼan che atoʼik ri xukʼulmaj ri al Monika?

¹⁸ Ri al Monika kel pa ri tinamit Georgia, are chiʼ alaj ali na sibʼalaj xukoj uchuqʼabʼ rech kuya kan ubʼanik ri etzʼanem che utz ta kril ri Dios y kubʼij ta chi itzel taq tzij rumal che kraj kubʼan u bautismo. Ri areʼ kubʼij: «Ri oración sibʼalaj xinutoʼo. Ri Jehová qas retaʼm che kwaj kinbʼan ri utz, rumal laʼ xinutoʼo». Ri al Monika xubʼan ri u bautismo are chiʼ 16 ujunabʼ. ¿La kʼo rajawaxik kaya na kan ubʼanik rech kabʼan ri a bautismo? Mayaʼ kan utaʼik ri espíritu santo y ri Jehová qas kuya na riʼ chawe rech kaya kan ubʼanik ri utz taj (Juan 3:34).

KʼI KIXKUNIK KIBʼANO WE KIKUBʼSAJ IKʼUʼX CHRIJ RI DIOS

19. ¿Jas katutoʼ chkiwach ri nimaʼq taq kʼax? (Xuqujeʼ chawilaʼ ri wachbʼal).

¹⁹ Apastaneʼ ri kakʼulmaj che katuqʼatej che ubʼanik ri a bautismo, qas chakojoʼ che ri Jehová katraj y kraj che katkʼojiʼ pa ri u familia. Ri Jesús xubʼij wariʼ chke kʼi u discípulos: «We ta ri kibʼan che ukubʼsaxik ikʼuʼx chrij ri Dios junam rukʼ ri unimal jun semilla re mostaza, kixkowin riʼ kibʼij che wajun juyubʼ ‹Jat jelaʼ›, kbʼe kʼu na riʼ; juntir riʼ kixkowin che ubʼanik» (Mat. 17:20). Xa kebʼ oxibʼ junabʼ xekʼojiʼ ri discípulos rukʼ ri Jesús, rumal laʼ rajawaxik kkikubʼsaj na más kikʼuʼx chrij ri Dios. Ri Jesús xubʼij chke che we kkikubʼsaj más kikʼuʼx chrij ri Jehová, ri areʼ keʼutoʼ na rech kkichʼij apachike kʼax. ¡Xuqujeʼ katutoʼ na at!

20. ¿Jas tobʼanik kuya wajun kʼutunem riʼ chawe?

²⁰ We kawilo che kʼo rajawaxik kakʼex pa ri akʼaslemal rech katkunik kabʼan a bautismo, aninaq chakojoʼ achuqʼabʼ che ukʼexik. Kʼo kʼi ejemplos kech cristianos re ojer y re kamik che xuqujeʼ katkitoʼ che ukʼexik ri akʼaslemal. Chatchoman chrij ri xkibʼano y qas kawil na riʼ che katkunik kajach ri akʼaslemal che ri Jehová y kabʼan ri a bautismo. ¡Wariʼ are ri qas utz che kachaʼ ubʼanik pa ri akʼaslemal!