¿La kopan na jun qʼij che kʼo ta chi mebʼayil?

Pa ronojel ri uwach Ulew ri e winaq kkibʼan protestas rumal che kkichomaj che junam ta kbʼan chke. Xuqujeʼ rumal ri yabʼil re ri COVID-19 xnimataj más ri kʼax, rumal che konojel xetzʼapiʼ pa kachoch y xunimarisaj más ri mebʼayil xuqujeʼ kʼo ta chi más kunabʼal che kikunaxik y chilaʼ xqʼalajin wi e jachin ri e qʼinomabʼ y e jachin ri e mebʼaʼ.

¿La kopan na jun qʼij che kkʼojiʼ ronojel ri kajwataj chqe? Jeʼ, ri Biblia kubʼij ri kubʼan na ri Dios che uyaʼik ronojel ri kajwataj chke ri winaq.

Ri Dios kuya na ri kajwataj chke ri winaq

Ri kʼax: Ri qʼatal taq tzij e kunaq ta che uyaʼik ronojel ri kajwataj chke ri winaq.

Ri kbʼan che usukʼumaxik: Ri Dios keresaj na ri qʼatbʼal tzij y kukoj ri uQʼatbʼal tzij areʼ. Wajun qʼatbʼal tzij riʼ kuqʼat na tzij puwiʼ ri uwach Ulew (Daniel 2:44; Mateo 6:10).

Ri utzilal: Ri uQʼatbʼal tzij ri Dios kuqʼat na tzij pa kiwiʼ konojel ri winaq pa ri uwach Ulew y rukʼ tzʼaqatil kubʼano. Rumal laʼ, ri e winaq kkiriq ta chi kʼax rumal ri pwaq y kebʼison ta chik (Salmo 9:7-9, 18). Xaneʼ kkiriq na utzilal rumal ri kichak y kekikot na rukʼ ri kifamilia. Ri Biblia kutzujuj wariʼ: «Ri winaq kkiyak na kachoch kekʼojiʼ kʼu na chupam, kkitik na uva kekiyak kʼu na ri kiwach. Man kkʼulmataj ta na waʼ chi jun winaq kuyak jun ja jun ta chi kʼu wi ri kkʼojiʼ chupam, o chi jun winaq kutik uwach ri rulew jun ta chi kʼu wi ri kyakow ri uwachinik ri tikoʼn» (Isaías 65:21, 22).

Ri kʼax: Ri e winaq kekun taj kkiqʼatej uwach ri kʼax che kkiriq pa ri kikʼaslemal y rumal wariʼ kkiriq ta ri kajwataj chke

Ri kbʼan che usukʼumaxik: Ri Dios kukoj na ri uQʼatbʼal tzij rech kusachisaj uwach ronojel ri kuya xibʼin ibʼ chke ri winaq.

Ri utzilal: Ri Dios kubʼan na che kkʼulmataj ta chi jastaq che kubʼano che kʼo ta chi ri kajwataj chke ri e winaq. Jun kʼutbʼal, kʼo ta jumul kkʼulmataj chi chʼoj, wiʼjal y nimaʼq taq yabʼil (Salmo 46:9; 72:16; Isaías 33:24). Ri Dios kubʼij: «Ri nutinamit kjeqiʼ na pa jun kʼolbʼal aj jamaril, pa taq ja ri ko e jeqelik pa taq kʼolbʼal ri man kʼo ta wi elem chʼuʼj» (Isaías 32:18).

Ri kʼax: Kʼi taq mul ri winaq che nim kkibʼan che kibʼ y sibʼalaj kkirayij ri pwaq kkitoqij ri jastaq ke ri nikʼaj chik.

Ri kbʼan che usukʼumaxik: Konojel ri winaq che kekʼojiʼ chuxeʼ ri uQʼatbʼal tzij ri Dios kketaʼmaj ubʼanik utzilal chke ri e nikʼaj chik y xaq xiw ta kechoman chbʼil kibʼ (Mateo 22:37-39).

Ri utzilal: Are chiʼ ri uQʼatbʼal tzij ri Dios kuqʼat tzij puwiʼ ri uwach Ulew, konojel ri winaq man kkitzukuj ta ri utz chke chbʼil kibʼ xaneʼ are kkesaj uwach ri uloqʼoqʼebʼal ri Dios (1 Corintios 13:4, 5). Ri Biblia kubʼij: «Pa ronojel ri tastalikalaj nujuyubʼ man kʼo ta jun ri kubʼan ta jun kʼax, je kʼut jachaʼ ri jaʼ kunojisaj ri plo, je kubʼan na ri etaʼmanik ri kuya ri Ajawaxel [Jehová]a kunojisaj na ronojel ri uwach Ulew» (Isaías 11:9).

Ri Biblia kubʼij che oj kʼo chi pa ri kʼisbʼal taq qʼij y che naj ta chi kraj ri Dios kubʼan na ri utzujum che kusachisaj uwach ri kʼax che kuya ri mebʼayil (Salmo 12:5).b Are kʼu chiʼ tajin kqeyeʼj wariʼ, ri pixabʼ che kuya ri Biblia kojutoʼo rech kqachʼij ri kʼax che kuya ri mebʼayil. Jun kʼutbʼal, chawilaʼ ri e kʼutunem «Cómo vivir con menos» xuqujeʼ «Una opinión realista del dinero».

Molom taq tzij che kbʼix chrij ri Biblia y ri pwaq

Ri kkichomaj jujun winaq: Amaqʼel kkʼojiʼ na mebʼayil rumal che ri Jesús xubʼij: «Ronojel qʼij e kʼo mebʼayibʼ iwukʼ» (Mateo 26:11).

Ri qastzij: Ri Jesús are tajin kubʼij ri kkʼulmataj pa ri qakʼaslemal: rumal che oj kʼo pa wajun uwach Ulew riʼ amaqʼel e kʼo winaq che e mebʼaʼ. Are kʼu ri Jesús xpe che uyaʼik «utzalaj taq tzij chke ri mebʼayibʼ», chkixoʼl wariʼ kʼo ri tzujunik chrij ri uQʼatbʼal tzij ri Dios che kusachisaj na uwach ri mebʼayil (Lucas 4:18, 43).

Ri kkichomaj jujun winaq: Rech kojqaj chuwach ri Dios rajawaxik kojux mebʼaʼ taq winaq rumal che ri Jesús xubʼij: «jat, chakʼayij ri jastaq awe, chajachaʼ chke ri mebʼayibʼ» (Mateo 19:21).

Ri qastzij: Ri Jesús tajin ta kubʼij che ri utijoxelabʼ keʼux mebʼaʼ taq winaq, xaneʼ xaq xiw tajin kuya pixabʼ che jun ala rumal che más nim kril ri uqʼinomal. Rumal laʼ ri Jesús xubʼij che ri ala che kuya kan jujun taq jastaq re y kux utijoxel.

Ri kkichomaj jujun winaq: Are chiʼ ri Dios kraj kutewchij jun winaq kuya qʼinomal che rumal che ri Biblia kubʼij: «Ri utewchibʼal ri Ajawaxel qʼinomal waʼ» (Proverbios 10:22).

Ri qastzij: Are chiʼ ri Biblia kubʼij «ri utewchibʼal ri Ajawaxel» tajin kchʼaw chrij jastaq che nim ubʼanik junam rukʼ ri kʼaslemal, jun utz achilanik rukʼ areʼ y ri jeʼlalaj eyebʼal chrij ri petinaq (Salmo 25:14; Juan 17:3). Paneʼ jujun taq mul ri Dios xuya qʼinomal chke ri upatanelabʼ, are kʼu, kʼi chke ri cristianos e qʼinomabʼ taj (Génesis 24:34, 35; Santiago 2:5). Xuqujeʼ ne ri Jesús xkʼojiʼ ta kʼi jastaq re (Mateo 8:20).

Ri kkichomaj jujun winaq: Ri Biblia kubʼij che rajawaxik qonojel xaq junam ri jastaq qe kʼolik, rumal che kubʼij che ri cristianos re ri nabʼe siglo «[x]ekijachalaʼ kʼut ri jastaq kech chkixoʼl. [X]ekikʼayilaʼ taq ri kulew xuqujeʼ ri kʼo kukʼ» (Hechos 2:44, 45).

Ri qastzij: Ri kubʼij waʼ taq versículos riʼ xa jun tiempo xbʼanik, y xbʼanik rech xyaʼ ri kajwataj chke ri winaq che kʼateʼ xeʼux cristianos. Ri e winaq riʼ nim xkibʼinibʼej rech xeʼopan pa Jerusalén rech kkibʼan ri nimaqʼij re ri Pentecostés (Hechos 2:5). Are kʼu, chiʼ xeʼux cristianos xekanaj más tiempo pa Jerusalén rech kketaʼmaj más chrij ri Dios. Rumal laʼ ri e kachalal cristianos xkiya kikuchuj rech kekunik kkiya ri kajwataj chke xuqujeʼ ri kekʼojiʼ wi (Hechos 2:41, 42, 46, 47).

a Ri Biblia kubʼij che ri ubʼiʼ ri Dios are Jehová (Salmo 83:18).

b We kawaj kawetaʼmaj más jasche kojkunik kqakubʼsaj qakʼuʼx chrij ri Biblia, chawilaʼ ri kʼutunem «La Biblia tiene la verdad».