¿La kekachilaj ta chi ri testigos rech Jehová ri winaq che e k’o ta chi pa ri kikojonik?

Kqaya ta kan kachilaxik ri qachalal che kkitzijoj ta chi ri utzij ri Dios o kebʼe ta chi pa ri e riqbʼal ibʼ. Xaneʼ, kqakoj qachuqʼabʼ che kitoʼik rech ketzalij chi loq.

Are chiʼ jun Testigo kmakunik, weneʼ kesax bʼi pa ri congregación. Are kʼu xaq ta kʼateʼ kesax bʼik. Kesax bʼi pa ri congregación chiʼ kuya ta kan ubʼanik ri makaj, y kubʼan ta ri kubʼij ri uTzij ri Dios rumal laʼ kqachilaj ta chik. Ri Biblia kubʼij: «Chiwesaj bʼaʼ ri ajmak riʼ chixoʼl» (1 Corintios 5:13).

¿Jas kkʼulmatajik are chiʼ jun achajil kesax bʼi pa ri congregación are kʼu ri rixoqil y ri e ralkʼwal kʼa e Testigos na? Paneʼ ri kachilanik pa ri kikojonik kkʼextajik are kʼu kukʼ ri ufamilia kkʼextaj taj. Ri rachilanik rukʼ ri rixoqil junam kukʼ ri ralkʼwal kkʼextaj taj.

Ri keʼesax bʼi pa ri congregación we kkaj kekunik keʼopan pa taq ri qariqbʼal ibʼ xuqujeʼ ri kʼamal taq bʼe kekunik kkiya tobʼanik chke. Ri kqaj are che keʼux chi jumul testigos rech Jehová. We kkiya kan ubʼanik ri itzel taq jastaq y kkikʼutu che kkaj kkibʼan ri kubʼij ri Biblia kekunik ketzalij chi jumul pa ri congregación.