Cheqakʼamaʼ che kʼutbʼal ri e ajqʼaxal tzij: Oseas

1. ¿Jas kqabʼano rumal ri rutzilal xuqujeʼ ri ukuyunik ri Jehová?

¹ Chiʼ kojchoman chirij ri rutzilal xuqujeʼ ri ukuyunik ri Jehová weneʼ kubʼan chaqe che kqachomaj: «¿Jas kʼax kqaj oj kqachʼijo rech kqatoʼ ri Jehová?» (Sal. 103:2-4; 116:12). Rech xunimaj ri Jehová, ri Oseas xubʼan jastaq che kʼax ubʼanik, are kʼu xubʼan rukʼ ronojel ranimaʼ. ¿Jas kqabʼan oj rech kqabʼan qe ri xubʼan areʼ?

2. ¿Jasche ri xubʼan ri Oseas are jun utzalaj kʼutbʼal chaqe rech kqachʼij utzijoxik ri utzij ri Dios?

² Chqatzijoj ri utzij ri Dios «are taq man kuya taj» ktzijoxik. Ri utzij ri Dios che xutzijoj ri Oseas chike ri lajuj tribus rech Israel xuya wi ubʼixik. Pa wajun tinamit riʼ weneʼ kʼo ta jun winaq kupatanej ri Jehová. Ri ajawinel Jeroboán II xubʼan ri «etzelal chkiwach ri e ubʼaqʼwach» ri Jehová xuqujeʼ xubʼano che kyaʼ kiqʼij ri e tyox re chikop che ri Jeroboán l xumajij ubʼanik (2 Rey. 14:23, 24). Ri nikʼaj chik ajawinelabʼ man xekitoʼ taj rech xkisukʼumaj ri kibʼe chuwach ri Dios, kʼisbʼal re xsachisax kiwach pa ri junabʼ 740 nabʼe chuwach ri uqʼij ri Cristo. Oseas xupatanej ri Jehová rukʼ sukʼilal pa 59 junabʼ pa wajun tinamit riʼ che nojinaq che kiqʼijilaxik e tyox. ¡Sibʼalaj utz ri xuchaʼ ubʼanik! ¿La kqabʼan qe ri xubʼan ri Oseas che kqatzijoj ri utzij ri Dios konojel ri e junabʼ pa neʼ ri winaq kkaj taj kkitaʼ ri kqaya ubʼixik o kbʼan kʼax chaqe? (2 Tim. 4:2.)

3. ¿Jas xubʼan ri ukʼaslemal ri Oseas che ukʼutik ri ukuyunik ri Jehová?

³ Chojchoman chirij ri ukuyunik ri Jehová. Jehová xubʼij che ri Oseas: «Chakʼamaʼ jun ixoq rech nim chʼutin [o che kʼolinaq chi rukʼ jun chi achi] che awixoqil» (Os. 1:2). Ri rixoqil, Gómer, xralaj jun ukʼojol ri Oseas; are kʼu xekʼojiʼ chi e kebʼ ral ri Gómer che weneʼ e ralkʼwal ta ri Oseas. Rumal ri uloqʼoqʼenik xuqujeʼ usukʼilal, ri Oseas xusach umak, ri xubʼano kukʼut ri nimalaj ukuyunik ri Jehová, che xukuy umak ri itzelalaj tinamit Israel che xubʼan kʼi jastaq che utz taj (Os. 3:1; Rom. 9:22-26). ¿La kqaj kqaya ubʼxik chike «konojel winaq» che Jehová are jun Dios che kkuyunik pa neʼ kqariq kʼax? (1 Cor. 9:19-23.)

4. ¿Jas jastaq pa neʼ kʼax ubʼanik kqaj kqabʼano rumal che kojmaltyoxin che ri Jehová?

⁴ Jujun chike ri pataninelabʼ rech ri Jehová kiyaʼom kan chak che kuya nim pwaq chike o nimaʼq taq tijobʼal rech kkikoj kitiempo che utzijoxik ri utzij ri Dios. Nikʼaj chik e kʼulan taj o kʼolinaq ta kalkʼwal rumal ri jastaq rech ri Ajawbʼal. Weneʼ kqachomaj che oj kojkun taj kqabʼan qe junam rukʼ ri xubʼan ri Oseas. Are kʼu we kojmaltyoxin che ri Jehová rumal che kukuy qamak xuqujeʼ we kqakubʼsaj qakʼuʼx chirij che kuya qachuqʼabʼ rukʼ ri uxlabʼixel, weneʼ kuya chak chaqe che kqachomaj oj che kojkun ta che ubʼanik, junam rukʼ ri xubʼan Oseas (Mat. 19:26; Filip. 2:13).