Ri ajkʼamolbʼe chike ri e ukʼulel ri Ajawaxel are ri Itzel Satanás. Are jun uxlabʼal che xwalaj chirij ri Jehová. Ri Satanás tijan kukoj uchoqʼabʼ chirij ri Ajawaxel xuqujeʼ kuyaʼ kʼaxkʼolil chike ri täq winaq. Ri Satanás are jun itzel ajmolon tzij xuqujeʼ ajkamsanel (Juan 8:44).

Nikʼaj chik uxlabʼal xkebʼan junam kiwäch rukʼ ri Satanás che xwalaj chirij ri Ajawaxel. Ri Loqʼalaj Pixabʼ kubʼij itzel täq uxlabʼal (demonios) chike. Junam rukʼ ri Satanás, ri itzel täq uxlabʼal kkekʼulej ri winaq. Utz kekilo kkebʼan kʼäx chike ri winaq (Mateo 9:32, 33; 12:22). Ri Jehová kusach na kiwäch ri Satanás kukʼ ri itzel täq uxlabʼal. Xaq kebʼ oxibʼ qʼij chik kʼo chike rech kkebʼan kʼäx chike ri winaq (Apocalipsis 12:12).

We kqaj kqabʼan rachiʼl ri Ajawaxel, kqabʼan täj jas kraj ri Satanás che kqabʼano. Ri Satanás xuqujeʼ ri itzel täq uxlabʼal itzel kekil ri Jehová. E ukʼulel ri Ajawaxel xuquje kekaj che öj kqabʼan jelaʼ. Rumal laʼ rajawaxik kqachaʼo jachin kqakikotemaj: are ri Satanás we are ri Jehová. We kqaj kʼo jun qakʼaslemal che kʼot ukʼisik, rajawaxik kqachaʼ ubʼanik ri upatanexik ri Ajawaxel. Ri Satanás retaʼm usachik kiwäch ri täq winaq, xuqujeʼ kukoj kʼi täq chapbʼäl rech kubʼan wariʼ. Jewaʼ riʼ kkunik kusach kiwäch sibʼalaj kʼi täq winaq (Apocalipsis 12:9).

Ri Jesucristo are ri Ukʼojol ri Jehová xuqujeʼ are ri uloqʼalaj urachiʼl. Chiʼ majaʼ kkʼaseʼ chuwäch Ulew junam che jun achi, ri Jesús xkʼijeʼ pa ri kaj junam rukʼ jun uxlabʼal nim uchuqʼabʼ (Juan 17:5). Tekʼuriʼ xpe chuwäch ri Ulew rech kukʼut ri qastzij rech ri Ajawaxel che kiwäch ri winaq (Juan 18:37). Xuqujeʼ, xuyaʼ ri winaqil ukʼaslemal rech keʼutoʼ che kimak xuqujeʼ che ri kamikal chike ronojel täq winaq che kenimanik (Romanos 6:23). Kimik, ri Jesús are ri Ajawinel rech ri Ajawbʼäl re Ajawaxel, wa jun Ajawbʼäl kʼo chikaj are jun qʼatbʼaltzij che kubʼan na jun Kotzʼiʼjalaj Uwäch che ri Ulew (Apocalipsis 19:16).

Ri utaqoʼxel täq ajkaj (ángeles) re Ajawaxel xuqujeʼ e urachiʼl areʼ. Ri utaqoʼxel täq ajkaj xkemaj ta kikʼaslemal chuwäch Ulew junam che winaq. Xebʼan pa kaj rumal ri Ajawaxel chiʼ majaʼ kubʼan ri Uwäch Ulew (Job 38:4-7). E kʼo sibʼalaj kʼi utaqoʼxel täq ajkaj ri Ajawaxel (Daniel 7:10). Wanikʼaj urachiʼl ri Ajawaxel che e kʼo pa kaj, kekaj che ri winaq kketijosaj kibʼ chirij ri qastzij rech ri Jehová (Apocalipsis 14:6, 7).

Xuqujeʼ ri Ajawaxel e kʼo urachiʼl cho ri uwäch Ulew; kubʼij uqʼalajsinelibʼ chike. Jun qʼalajsinel che kʼo chuwäch jun qʼatbʼaltzij, kubʼij jas retaʼm chirij jun winaq weneʼ jun bʼantajik. Ri qʼalajsinelibʼ rech ri Jehová kketzijoj chike nikʼaj chik winaq ri Uchomanik ri Jehová (Isaías 43:10). Junam kukʼ ri taqoʼxel täq ajkaj, ri Qʼalajsinelibʼ kekaj katkitoʼ che uretamaxik ri qastzij rech ri Jehová. Xuqujeʼ kekaj che kabʼan rachiʼl ri Ajawaxel.

We kqaj kqabʼan urachiʼl ri Ajawaxel, rajawaxik kqabʼan ri kojonem (religión) che kraj ri Ajawaxel. Ri Jesús xubʼij che ri «qas e qʼijlanelabʼ» kkeqʼijlaj ri Ajawaxel rukʼ ri «qastzij» (Juan 4:23, 24). Xiw kʼo jun sukʼulik uqʼijlaxik ri Ajawaxel (Efesios 4:4-6). Ri qastzij kojonem kojukʼam bʼi chupam jun kʼaslemal che kʼot ukʼisik, jet ri qastzij täj kojonem che kojukʼam bʼi pa sachbʼäl (Mateo 7:13, 14).

Kojkunik kqetamaj jachin chike ri qastzij kojonem, we kqilo jas täq kkebʼan ri winaq che e kʼo chupam. Rumal che ri Jehová sibʼalaj utz, jachin täq qastzij keqʼijlan che areʼ, rajawaxik che e utz täq winaq. Junam rukʼ jun utzlaj cheʼ rech alanxax kuyaʼ utz täq alanxax, ri qastzijalaj kojonem kuyaʼ utz täq winaq (Mateo 7:15-20).

Urachiʼl ri Jehová kkeyaʼ nim uqʼij ri Loqʼalaj Pixabʼ. Ketaʼm che ri Loqʼalaj Pixabʼ petinaq rukʼ ri Ajawaxel. Rumal laʼ, kkeyaʼo che ri Loqʼajaj Pixabʼ kukʼut ri ubʼe kikʼaslemal che kiwäch, keʼuresaj pa ri kʼaxkʼolil xuqujeʼ keʼutoʼ che unimarsaxik ketaʼmabʼäl chirij ri Ajawaxel (2 Timoteo 3:16). Xuqujeʼ, kkekoj kichoqʼabʼ rech kkebʼano jas kketzijoj.

Urachiʼl ri Jehová kkeloqʼoqʼej kibʼ. Ri Jesús xukʼutu che keʼuloqʼoqʼej ri winaq, chiʼ xukʼut chirij ri Ajawaxel che kiwäch xuqujeʼ xresaj ri täq yabʼil. Jachin kkebʼan ri qastzij kojonem kkeloqʼoqʼej nikʼaj chik winaq. Junam rukʼ ri Jesús, kkexutuj ta ri mebʼaʼ xuqujeʼ ajnikʼaj chik tinamit. Ri Jesús xubʼij che ri winaq kketamaj kiwäch jachin täq ri ajtijoxel che, rumal che kkeloqʼoqʼej kibʼ (Juan 13:35).

Urachiʼl ri Ajawaxel kkeyaʼ uqʼij ri Ubʼiʼ:Jehová. We kʼo jun winaq che kraj täj kukoj qabʼiʼ, ¿la kqabʼan loqʼalaj qachiʼl che? Kqabʼan täj. Chiʼ kʼo jun qachiʼl, kqabʼij ubʼiʼ xuqujeʼ utz kojtzijon chirij, che kiwäch nikʼaj chik winaq. Rumal laʼ, jachin kekaj kkebʼan urachiʼl ri Ajawaxel, rajawaxik kkekoj Ubʼiʼ xuqujeʼ kketzijoj chike nikʼaj chik winaq chirij areʼ. Ri Jehová kraj che jewaʼ riʼ kqabʼano (Mateo 6:9; Romanos 10:13, 14).

Junam rukʼ ri Jesús, urachiʼl ri Ajawaxel kkekʼut che kiwäch nikʼaj chik winaq chirij ri Ajawbʼäl rech ri Ajawaxel. Ri Ajawbʼäl rech ri Ajawaxel are ri qʼatbʼaltzij kʼo chikaj che kubʼan na jun kotzʼiʼjalaj uwäch che ri Ulew. Urachiʼl ri Ajawaxel kkeyaʼ ubʼixik ri utz täq tzij rech ri Ajawbʼäl re Ajawaxel chike nikʼaj chik winaq (Mateo 24:14).

Ri qʼalajsinelibʼ rech ri Jehová kketzukuj ubʼanik urachiʼl areʼ. Kkeyaʼ uqʼij ri Loqʼalaj Pixabʼ xuqujeʼ kkeloqʼoqʼej kibʼ. Kkeyaʼ uqʼij xuqujeʼ kkekoj ubʼiʼ ri Ajawaxel. Kkekʼut che kiwäch nikʼaj chik winaq chirij ri Ajawbʼäl rech ri Ajawaxel. Ri qʼalajsinelibʼ rech ri Jehová kkebʼan ri qastzijalaj kojonem chuwäch ri Ulew.