Chqabʼana jun achiʼlanik che kʼot ukʼisik rukʼ ri Ajawaxel

Kʼäx ubʼanik jun achiʼl xuqujeʼ kʼäx uchajexik. We kqakoj qachoqʼabʼ che ukʼolik urachiʼlanik ri Ajawaxel, areʼ kuyaʼ loqʼalaj täq tewchibʼäl chaqe. Ri Jesús xubʼij chike ri e ajkojonel che: «Are kʼu ri qastzij kixtzaqopin na» (Juan 8:32). ¿ Jas xraj xubʼij?

Kimik kojkunik kojkikotik che ri tzaqopibʼalil. Kojkunik kqatzaqopij qibʼ che ri täq kʼutunem che e qastzij täj xuqujeʼ che ri molon täq tzij che uyaʼom ri Satanás puwiʼ ronojel uwäch ulew. Xuqujeʼ kojkunik kqatzaqopij qibʼ che ri bʼisonik e kʼo chike sibʼalaj kʼi täq winaq che ketaʼm ta uwäch ri Jehová (Romanos 8:22). Urachiʼl ri Ajawaxel matneʼ «kexeʼj ta kibʼ chuwäch ri kamikal» (Hebreos 2:14, 15).

Kojkun na kojkikotik che ri tzaqopibʼalil chuwäch ri kʼakʼ uwäch ulew rech ri Ajawaxel. ¡Sibʼalaj jeʼlikalaj tzaqopibʼal kpe na na wariʼ! Chiʼ kubʼan na kotzʼiʼjalaj uwäch ri Ulew, kʼot na chik chʼoj, kʼot na chik yabʼil xuqujeʼ kʼot na chik itzelal. Kʼot na chik mebʼil xuqujeʼ kʼot na chik wiʼjal. Kojtzaqopitajik na che ri riʼjobʼik, che ri kamikal, che ri xibʼinik bʼanol käx, xuqujeʼ che ri itzel taqonik. Ri Loqʼalaj Pixabʼ kubʼij chirij ri Ajawaxel: ‹Tijan kajaq ri aqʼabʼ, kʼo utzalaj arayibʼäl, katzuq konojel ri e kʼaslik› (Salmo 145:16).

Urachiʼl ri Ajawaxel kʼo na jun kikʼaslemal che kʼot ukʼisik. Ri kʼaslemal che kʼot ukʼisik are jun utzalaj sipanik, che ri Ajawaxel kuyaʼ na chike ri täq kketzukuj urachiʼlaxik areʼ (Romanos 6:23). Chachomajampeʼ jas kraj kubʼij chawe, jun akʼaslemal che kʼot ukʼisik.

Sibʼalaj kejameʼ na qawäch rech kʼi jas täq kqabʼano. Weneʼ kqaj kqatijosaj qibʼ che ri jun qʼojombʼäl, weneʼ utzʼajik jun wachbʼäl, weneʼ kqabʼan chak rech ajanel. Weneʼ kqaj kqatijosaj qibʼ chirij ri täq chikop (awaj) weneʼ jalajoj täq qʼayes. Weneʼ kqarayij kojbʼin na cho ruwäch ulew rech kqachʼobʼ kiwäch jalajoj täq tinamit xuqujeʼ kiwinaqil. Kojkunik kqabʼan na ronojel wariʼ, rumal che kʼo na jun qakʼaslemal che kʼot ukʼisik.

Sibʼalaj kejameʼ na qawäch rech kqatzukuj e kʼi täq qachiʼl. Rumal che kʼo jun qakʼaslemal che kʼot ukʼisik, kojkun na kqachʼobʼ kiwäch sibʼalaj kʼi nikʼaj chik urachiʼl ri Ajawaxel. Kqetamaj na kiwäch ronojel jas kekunik kkebʼano rech kqabʼan na kachiʼl areʼ. Kqaloqʼoqʼej na, xuqujeʼ areʼ kojkeloqʼoqʼej na (1 Corintios 13:8). Rumal che kʼo na jun qakʼaslemal che kʼot ukʼisik, kojkunik kqabʼan na kachiʼl ronojel winaq cho ruwäch Ulew. Sibʼalaj utz chuwäch wariʼ, ronojel täq qʼij knimar na ri qachiʼlanik rukʼ ri Jehová, jachiʼ kʼo ri qakʼaslemal che kʼot ukʼisik. ¡Chqabʼanaʼbʼaʼ jun achiʼlanik che kʼot ukʼisik rukʼ ri Ajawaxel!