José are jun chke ri ukʼojol ri Jacob che más nitzʼ. Ri e rachalal che más e nimaʼq chuwach xkilo che José sibʼalaj kloqʼoqʼex rumal ri utat. ¿Jas kachomaj at che xkinaʼo? Sibʼalaj xkil rukʼ itzelal. Jun qʼij, xrachikʼaj jun jastaq che amaqʼel ta kkʼulmatajik tekʼuriʼ xutzijoj chke ri rachalal. E areʼ xkichomaj che ri e achikʼ riʼ kraj kubʼij che kopan na jun qʼij che e areʼ kexukiʼ na chuwach. Rumal laʼ más xkil rukʼ itzelal.

Pa jun qʼij, ri e rachalal ri José tajin kkichajij ri e chij naqaj che ri tinamit Siquem. Jacob xutaq bʼi ri José rech kerilaʼ ri e rachalal. Are chiʼ xkilo che petinaq, xkimaj ubʼixik: «Petinaq ri kachikʼanik. ¡Chqakamisaj!». Rumal laʼ xkichapo tekʼuriʼ xkikʼaq bʼi pa jun nimalaj jul. Are kʼu ri Judá, jun chke ri rachalal che más nim chik, xubʼij: «Kikamisaj taj. Are utz che kqakʼayij bʼik rech kux jun ajchak tojom ta uqʼij». Are laʼ ri xkibʼano. Xkikʼayij bʼik, 20 raqan saq pwaq xyaʼ chke kumal jujun ajkʼayibʼ rech Madián che e bʼenaq pa ri bʼe rech kebʼe pa Egipto.

Pa ri qʼij riʼ, ri e rachalal ri José xkiya ri ratzʼyaq pa ukikʼel jun kʼisikʼ, xkikʼam bʼi ri atzʼyaq che ri kitat tekʼuriʼ xkitaʼ che: «¿La are ratzʼyaq ri akʼojol wariʼ?». Jacob xuchomaj che jun itzelalaj chikop xkamisan ri José rumal laʼ sibʼalaj, sibʼalaj kbʼisonik. Kʼo ta nijun kkunik kuya kubʼsal kʼuʼx che.

Are chiʼ xeʼopan pa Egipto, jun achi nim ubʼanik ubʼiʼ Potifar xuloqʼ ri José rech kux rajchak che tojom taj. Are kʼu ri Jehová kʼo rukʼ ri José. Potifar xrilo che ri José are jun utzalaj ajchak xuqujeʼ che kuya kukubʼsaj ukʼuʼx chrij. Are chiʼ kqʼax ri tiempo, José xtaqan pa uwiʼ ronojel ri jastaq re ri Potifar.

Ri rixoqil ri Potifar krilo che sibʼalaj utz kkaʼy ri José xuqujeʼ che kʼo uchuqʼabʼ, kʼi taq mul xubʼij che, che kqʼoyiʼ rukʼ. ¿Jas xubʼan ri José? Xuxutuj xuqujeʼ xubʼij che: «Kwaj taj, utz ta ubʼanik. Ri wajaw kukubʼsaj ukʼuʼx chwij, xuqujeʼ ri at, at rixoqil. We kinqʼoyiʼ awukʼ tajin kinmakun riʼ chuwach ri Dios».

Jumul, ri rixoqil ri Potifar xutaqchiʼj ri José rech kqʼoyiʼ rukʼ. Xuchap che ratzʼyaq, are kʼu are xanimaj bʼik. Are chiʼ ri Potifar xopan pa rachoch, ri ixoq xumol tzij, xubʼij che, che José xraj xubʼan kʼax che. Potifar sibʼalaj xpe royowal xuqujeʼ xukoj pa cheʼ. Are kʼu sachinaq ta ri José che ri Jehová.

Are chiʼ José kʼo pa cheʼ, ri faraón, ajawinel re Egipto, xubʼan jujun achikʼ che kʼax uchʼobʼik. Tekʼuriʼ jun chke ri rajchakibʼ ri faraón xubʼij che José kkunik kubʼij ri kraj kubʼij ri achikʼ. Rumal laʼ faraón chanim xtaqan che ukʼamik José.

Ri faraón xuta che: «¿La katkunik kabʼij chwe jas kraj kubʼij ri achikʼ xinbʼano?». José xubʼij che: «Pa wuqubʼ junabʼ kkʼojiʼ kʼi ktijow pa Egipto, tekʼuriʼ kpe wuqubʼ junabʼ wiʼjal. Chachaʼ jun achi ri kʼo unojibʼal rech kumulij kʼi ktijowik rech ri e winaq kekam taj». Ri faraón xubʼij che: «¡Katinchaʼ at! At katux ri ukabʼ winaq che kʼo utaqanik pa uwiʼ Egipto». Are kʼu ¿jasche xkun José che retaʼmaxik ri kraj kubʼij ri achikʼ riʼ? Rumal che xtoʼ rumal Jehová.

Pa wuqubʼ junabʼ José xumulij kʼi ktijowik. Tekʼuriʼ, xpe jun nimalaj wiʼjal pa ronojel uwach Ulew junam rukʼ ri xubʼij José, pa ronojel lugar kepe wi ri winaq rech kekiloqʼ ri kkitijo. Ri utat, ubʼiʼ Jacob, xuto che pa Egipto kʼo ktijowik xeʼutaq bʼi ri e 10 ukʼojol che uloqʼik.

Ri e ukʼojol Jacob xeʼopan rukʼ José, areʼ aninaq xuchʼobʼ kiwach. Are kʼu e areʼ xkichʼobʼ ta uwach. Xexukiʼ chuwach José, junam rukʼ ri xrachikʼaj are chiʼ akʼal na. José kraj kretaʼmaj we kʼa itzel na kkilo, rumal laʼ xubʼij chke: «Ix xa xixpe che rilik ri ubʼanom ri tinamit we kʼo ta uchuqʼabʼ». E areʼ xkibʼij che: «¡Xa ta oj petinaq che rilik ri tinamit! Oj kojpe pa Canaán. Nabʼe oj 12 qachalal qibʼ are jun xkamik, ri más nitzʼ na kʼo kan rukʼ ri qatat». José xubʼij chke: «Chikʼamaʼ lo ri ichaqʼ rech kinkoj ri kibʼij». Tekʼuriʼ xetzalij pa rachoch ri kitat.

Ri ufamilia Jacob xkʼis chi jumul ri kkitijo, jumul chi xeʼutaq bʼi ri e ukʼojol pa Egipto. Pa wa jumul riʼ xkikʼam bʼi Benjamín, ri kichaqʼ. Rech krilo we qas kikʼexom chi kibʼ ri rachalal, José xukʼuʼ ri ucopa re saq pwaq pa ri reqaʼn ri Benjamín tekʼuriʼ xubʼij che e areʼ xa xkelaqʼaj bʼik. Are chiʼ ri rajchakibʼ ri José xkiriq ri copa, ri e rachalal kkikoj ta ri tajin kkilo. Xkibʼij che José che kukʼajisaj kiwach e areʼ, are kʼu kukʼajisaj ta uwach Benjamín.

Rukʼ waʼ José xrilo che ri e rachalal xkʼextaj ri kichomanik. Xuchʼij ta chik, xumaj oqʼej tekʼuriʼ xubʼij chke: «In José, ri iwachalal. ¿La kʼasal na ri nutat?». Ri e rachalal sibʼalaj xkixibʼij kibʼ. José xubʼij chke: «Kʼax ta kinaʼ rumal ri xibʼan chwe. Dios xinukʼam lo waral rech kinkol kʼaslemal. Are kʼu, ¡jix aninaq!, chikʼamaʼ lo ri nutat».

Ri e rachalal ri José xebʼe che ubʼixik ri utzalaj taq tzij che ri kitat xuqujeʼ rech kkikʼam bʼi pa Egipto. Are chiʼ qʼaxinaq chi kʼi junabʼ, José jumul chik xkiriq kibʼ rukʼ ri utat.