E riqbʼal ibʼ kbʼan pa teléfonos o computadoras

E kʼi qʼatbʼal tzij pa ronojel uwach Ulew xkibʼij che utz taj kkimulij kibʼ ri e winaq y utz taj kkibʼan riqbʼal taq ibʼ. Ri testigos rech Jehová kʼo ta jun riqbʼal ibʼ mat kibʼanom, are kʼu e kinimam ri qʼatal taq tzij. Tajin kkikoj aplicaciones junam rukʼ ri Zoom pa taq ri kiteléfonos y computadoras rech kkibʼan ri kiriqbʼal ibʼ.

Rech kʼo ta kʼax kkiriq ri e qachalal, ri Jupuq Ajkʼamal bʼe cho ronojel uwach Ulew xubʼij che utz kkoj ri kuchuj che utojik ri cuentas re Zoom rech kbʼan ri e riqbʼal ibʼ. Wariʼ are jun nimalaj tobʼanik chke jujun taq congregaciones che kekun ta che utojik ri 15 kopan 20 dólares o más, ri ktojbʼex wi ri cuentas re riqbʼal ibʼ. Ri congregaciones riʼ nabʼe xa are kkikoj ri aplicaciones che ktoj taj, are kʼu e kʼi ta kekunik keʼok chupam y qas ta kbʼanik kkoj ronojel ri kʼo chupam. Konojel ri congregaciones che kkikoj Zoom che tojom rumal ri utinamit ri Jehová, kʼax ta kkiriq che ukojik rech keʼok e kʼi qachalal y e nikʼaj chi winaq chupam. Kimik, más che 65,000 congregaciones pa más che 170 nimaʼq taq tinamit tajin kkikoj waʼ taq cuentas re riqbʼal ibʼ.

Ri congregación Kairagi, pa ri tinamit Manado (rech Indonesia), nabʼe xkikoj jun cuenta rech Zoom che ktoj taj, are kʼu kimik tajin kkikoj chi ri cuenta che kutoj ri utinamit ri Jehová. Ri qachalal Santoso kubʼij: «Ri e qachalal che kekun taj kkikoj ri teléfonos y computadoras, kimik sibʼalaj kenaw chi che ukojik y kekikotik rumal che kekunik kekʼojiʼ pa ri e riqbʼal ibʼ, rumal che rajawaxik taj che kʼi mul kkitʼiq kibʼ rech keʼok pa jun riqbʼal ibʼ».

Ri qachalal Lester Jijón, kʼojolaxel, kʼamal bʼe re ri congregación Oeste re Guayacanes che kʼo pa ri tinamit Guayaquil (Ecuador), kubʼij: «Rumal che ri e qachalal qas ta kʼo kirajil, mat xkiriq riʼ ri kkitojbʼej wi ri cuenta re Zoom rech konojel kekʼojiʼ pa ri kiriqbʼal ibʼ. Kimik, maltyox che ri utinamit ri Jehová kʼo chi jun qacuenta re Zoom che kuya bʼe chqe qonojel kojok pa ri e riqbʼal ibʼ. Rumal laʼ, kqaxiʼj ta chi qibʼ keqasikʼij kʼi winaq rech kekʼojiʼ qukʼ pa Zoom».

Ri qachalal Johnson Mwanza, re ri congregación Norte Nwerere, pa ri tinamit Lusaka (Zambia), xutzʼibʼaj: «Ri e qachalal kʼi mul kibʼim chqe: ‹Ri cuenta re Zoom che utojom ri utinamit ri Jehová xaq xiw ta kojuqebʼsaj kukʼ ri e qachalal, xaneʼ kqanaʼo che ri Jehová sibʼalaj kojuloqʼoqʼej›».

Ri pwaq che xkoj che utojik ri cuentas re Zoom elesam lo pa ri pwaq che kkoj che kitoʼik ri e qachalal che kkiriq kʼax pa jalajoj taq tinamit. Wariʼ are rumal che e kʼi qachalal kkiya kikuchuj rech ri chak kbʼan pa ronojel uwach Ulew re ri utinamit ri Jehová. Waʼ taq kuchuj kya pa donate.jw.org. Sibʼalaj maltyox che ri ikuchuj che xuqujeʼ kkoj che kitoʼik ri e qachalal kkiriq kʼax pa ronojel uwach Ulew (2 Corintios 8:14).