45 Tsëpitanam ëwakuyänampaq nunakunata ninqanyaq, qateqninkunata nirqan qochapa juknin lädunchö Betsaida markaman barcuwan tsimparëkäyänampaq.+ 46 Nunakunata ëwakuyänampaq nïkurnam, Teyta Diosman mañakoq jirkaman ëwarqan.+ 47 Ampirkuptinnam o tsakäriptinnam,* barcuqa qochapa chowpinchöna* këkarqan, peru Jesusqa tsaki patsachömi japallan këkarqan.+ 48 Y alläpa vientuptin qateqninkuna barcuta avanzatsita mana puëdiyanqantam rikarqan. Tsëmi madrugäda hörana* yaku janampa purir pëkunaman Jesus ëwarqan, peru lädunkunapa pasakuytam pensarqan.* 49 Yaku janampa ëwëkaqta rikëkurnam, qateqninkunaqa, “¡achachï! ¡Imachi shamuykan!” nirnin qaparir qayarëkuyarqan. 50 Awmi, rikëkurmi llapankuna alläpa mantsakäyarqan. Peru pëqa tsë höram, “¡ama mantsakäyëtsu! Noqam kä” nirqan.+ 51 Pëkuna këkäyanqan barcuman yëkuriptinmi vientu pärarirqan. Tsëta rikëkurnam pëkunaqa alläpa espantakuyarqan. 52 Tsënöqa pasarqan, tantawan milagruta rurar imata rikätsikunqanta mana entiendishqa kayaptinmi, pëkunaqa chukru shonqullaraq karmi imatapis entiendiyarqanraqtsu.

16 Paqasyarkuptinnam, qateqninkunaqa qochaman uräyarqan,+ 17 y Capernaumman chäyänampaqmi barcuman yëkur qochata tsimpar qallëkuyarqan. Ampina o tsakëna* kaptimpis, Jesusqa manam pëkunawan junturaqtsu këkarqan.+ 18 Fuertipa vientuptinmi, qochaqa laqcheqsar qallëkurqan.+ 19 Barcuta pitsqa o joqta kilömetrutanö* avanzatsishqa këkarnam, barcu kaqman yaku janampa Jesus ëwëkanqanta rikëkur alläpa mantsakäyarqan. 20 Tsënam pëqa, “¡ama mantsakäyëtsu! Noqam kä” nirqan.+ 21 Tsënö niptinmi barcuchö kushishqa chaskiyarqan, y tsëllanam ëwëkäyanqan sitiuman barcu chärirqan.+