Levïticu

4 Tsëpitanam Teyta Jehoväqa Moisesta nirqan: 2 “Israelïtakunatam këta ninëki: ‘Mëqëkipis cuentata mana qokur+ Teyta Jehoväpa rikënimpaq jutsata* rurarqa, këtam rurayänëki:

3 Mandakoq sacerdöti+ jutsata* ruranqampita+ llapëki culpayoq kayaptikiqa, jutsampita perdonashqa kanampaq qarëtam sänu mallwa töruta Teyta Jehoväpaq apanan.+ 4 Tsë törutaqa Teyta Jehoväpa rikëninchömi carpa* wayipa yëkunanman apanan.+ Y tsë törupa peqanman o umanman makinta churarkurmi, Teyta Jehoväpa rikëninchö tsë töruta pishtanan.+ 5 Tsëpitanam kikin mandakoq sacerdöti+ tsë törupa wakin yawarninta carpa* wayipa rurinman apanan. 6 Y Teyta Jehoväpa rikëninchömi dëdunta yawarman tullpurkur+ carpa* wayichö këkaq cortïnapa puntanchö qanchis kuti pillchitsinan.*+ 7 Tsëpitanam törupa wakin yawarninwan Teyta Jehoväpa rikëninchö këkaq inciensuta rupatsiyänan altarpa waqrankunata llushinan.+ Tsë altarqa carpa* wayipa rurinchömi këkan. Y wakin yawartanam ushakanqanyaq rupatsina qarëkunata rupatsiyänan altarpa chakinman jichanan.+ Tsë altarqa carpa wayipa yëkunanchömi këkan.

8 Tsëpitanam jutsampita* perdonashqa kanampaq apanqan törupa pachanchö wirata y aqishninchö* wirata jipinan. 9 Tsënöllam ishkan riñonninta, riñonninchö wirata y ñatinninchö wiratapis jipinan.+ 10 Y kikin sacerdötim ushakanqanyaq rupatsina qarëkunata rupatsiyänan altarchö tsë llapan wirata rupatsinan. Teyta Dioswan amïgu kayanqanta rikätsikur apayanqan töruwan ruranqannöllam, tsë töruwampis ruranan.+

11 Törupa qaranta, ëtsanta, peqanta o umanta, chakinkunata, aqishninta* y panzantaqa,+ 12 campamentupita karuchö këkaq uchpata jitayänan limpiu sitiumanmi apatsinan. Tsëpitanam yanta jananman churarkur ushakanqanyaq rupatsinan.+ Awmi, uchpata jitayänan sitiuchömi ushakanqanyaq rupatsinan.

13 Cuentata mana qokur llapëki israelïtakuna jutsata* rurarqa,+ y Teyta Jehoväpa rikënimpaq jutsa kanqanta mana musyarqa,+ 14 jutsëkikuna* musyakäriptinmi, carpa* wayipa puntanman jutsëkikunapita perdonashqa kayänëkipaq mallwa töruta apayänëki. 15 Y Israelchö dirigeqkunam Teyta Jehoväpa rikëninchö tsë törupa peqanman o umanman makinkunata churayänan. Tsëpitanam Teyta Jehoväpa rikëninchö tsë töruta pishtayänan.

16 Mandakoq sacerdötim tsë törupa wakin yawarninta carpa* wayipa rurinman apanan. 17 Y Teyta Jehoväpa rikëninchö dëdunta yawarman tullpurkurmi, carpa* wayichö këkaq cortïnapa puntanchö qanchis kuti pillchitsinan.*+ 18 Tsëpitanam törupa yawarninwan Teyta Jehoväpa rikëninchö këkaq inciensuta rupatsiyänan altarpa waqrankunata llushinan.+ Tsë altarqa carpa* wayipa rurinchömi këkan. Y wakin yawartanam ushakanqanyaq rupatsina qarëkunata rupatsiyänan altarpa chakinman jichanan. Tsë altarqa carpa wayipa yëkunanchömi këkan.+ 19 Tsë törupa llapan wirantam altarchö rupatsinan.+ 20 Tsë llapantaqa jutsampita* perdonashqa kanampaq apanqan töruwan ruranqannöllam ruranan. Y sacerdöti tsëkunata ruraptinmi, llapëki israelïtakuna jutsata rurayanqëkipita+ perdonashqa kayanki. 21 Jutsata* ruranqampita apanqan töruta campamentupita karuman apëkur ushakanqanyaq rupatsinqannöllam, jutsata rurayanqëkipita apayanqëki töruwampis ruranan.+ Tsë qarëqa, llapëki israelïtakuna jutsëkikunapita perdonashqa kayänëkipaq qarëmi kanqa.+

22 Israelchö mëqan dirigentipis+ cuentata mana qokur Teyta Jehoväpa rikënimpaq jutsata* rurarqa 23 o Teyta Dios mandakunqanta mana wiyakushqa kanqanta cuentata qokurqa, sänu mallwa chïvutam* Teyta Diospaq apanan. 24 Y tsë animalpa peqanman o umanman makinta churarirmi, ushakanqanyaq rupatsina qarëkunata pishtayänan sitiuman apëkur, Teyta Jehoväpa rikëninchö tsë animalta pishtanan.+ Tsëqa jutsampita* perdonashqa kanampaq qarëmi kanqa. 25 Sacerdötim tsë chïvupa* yawarninman dëdunta tullpurkur, ushakanqanyaq rupatsina qarëkunata rupatsiyänan altarpa waqrankunata llushinan.+ Y wakin yawartanam tsë altarpa chakinman jichanan.+ 26 Tsëpitanam tsë chïvupa* llapan wiranta altarchö rupatsinan. Tsëtaqa ruranan Teyta Dioswan amïgu kayanqanta rikätsikur apayanqan qarëwan ruranqannöllam.+ Sacerdöti tsëkunata ruraptinmi, tsë dirigentiqa jutsata* ruranqampita perdonashqa kanqa.

27 Mëqëkipis cuentata mana qokur Teyta Jehoväpa rikënimpaq jutsata* rurarqa+ 28 o jutsata* rurayanqëkipita cuentata qokurqa, jutsëkikunapita perdonashqa kayänëkipaqmi sänu malta cabrata Teyta Diospaq apayänëki. 29 Y tsë cabrapa peqanman o umanman makikikunata churarkurmi, ushakanqanyaq rupatsina qarëkunata pishtayänan sitiuchö tsë cabrata pishtayänëki.+ 30 Y sacerdötim tsë cabrapa yawarninman dëdunta tullpurkur, ushakanqanyaq rupatsina qarëkunata rupatsiyänan altarpa waqrankunata llushinan. Y wakin yawartanam tsë altarpa chakinman jichanan.+ 31 Tsëpitanam Teyta Dioswan amïgu kayanqanta rikätsikur apayanqan qarëwan ruranqannölla,+ tsë cabrapa llapan wiranta altarchö rupatsinan.+ Y ninawan rupanqanqa Teyta Jehoväta alläpam gustanqa. Sacerdöti tsëkunata ruraptinmi jutsata* rurayanqëkipita perdonashqa kayanki.

32 Jutsëkikunapita* perdonashqa kayänëkipaq üshata aparninqa, sänu china üshatam apayänëki. 33 Y tsë üshapa peqanman o umanman makikikunata churarkurmi, ushakanqanyaq rupatsina qarëkunata pishtayänan sitiuchö tsë üshata pishtayänëki.+ 34 Sacerdötim tsë üshapa yawarninman dëdunta tullpurkur, ushakanqanyaq rupatsina qarëkunata rupatsiyänan altarpa waqrankunata llushinan.+ Y wakin yawartanam tsë altarpa chakinman jichanan. 35 Tsëpitanam Teyta Dioswan amïgu kayanqëkita rikätsikur apayanqëki mallwa carnëruwan ruranqannölla, tsë üshapa llapan wiranta jipinan. Tsëpitanam wakin rupatsina qarëkunapa jananchö Teyta Jehoväpaq rupatsinan.+ Sacerdöti tsëkunata ruraptinmi jutsata* rurayanqëkipita perdonashqa kayanki.+