Levïticu

14 Tsëpitanam Teyta Jehoväqa Moisesta kënö nirqan: 2 “Juk nuna leprampita alliyäriptinqa, sacerdötiman apayämunqan junaqmi kë mandakunqänö rurayänëki.+ 3 Sacerdötim campamentupita yarquskir tsë nunapa lepranta rikänan, y lepran alliyashqana kaptinqa, 4 rikënïpaq limpiu kanampaqmi, ishkë limpiu pishqukunata, cedru qerupa rämanta, puka hïluta y tsaqtsukuna plantata* apanampaq mandanan.+ 5 Tsëpitanam sacerdötiqa, pözupita chaqashqa yakuyoq mitu manka jananchö, juk kaq pishquta wanutsiyänampaq mandakunan. 6 Yakuyoq mitu manka jananchö pishtayanqan pishqupa yawarninmanmi, kawëkaq pishquta, cedru qerupa rämanta, puka hïluta y tsaqtsukuna plantata tullpunan. 7 Tsëpitanam leprampita alliyashqa nunata qanchis kuti yawarwan pillchitsinan,* y rikënïpaq limpiuna kanqantam ninan. Kawëkaq pishqutanam, chakrakunapa libri ëwakunampaq dejanan.+

8 Rikënïpaq limpiu kanampaq mandakunqäta rurëkaq nunaqa, röpantam taqshanan, llapan aqtsantam rutukunan y bañakunanmi, tsëta rurarmi rikënïpaq limpiuna kanqa. Tsëpitaqa campamentuman kutirpis, qanchis junaqpam carpanman* yëkunantsu. 9 Qanchis junaq pasariptinqa, llapan aqtsanta, chakallwanchö* shapranta* y cëjasnintam rutukunan. Tsëpitanam röpanta taqshanan y bañakunan, tsëta rurarmi rikënïpaq limpiuna kanqa.

10 Puwaq kaq junaqnam, ishkë sänu mallwa carnëruta, juk watayoq sänu china üshata,+ juk täza* aceitita+ y aceitiwan pichushqa kima kïlu y mediu* alli aqashqa harinata apamunan, tsë harinaqa gränupita rurashqa qarëmi kanqa.+ 11 Sacerdötim, limpiu kanampaq mandakunqäta rurëkaq nunata, y apamunqan qarëkunata noqa Jehoväpa rikënïman carpa* wayipa puntanman apamunan. 12 Tsëpitanam sacerdötiqa, juk kaq mallwa carnëruta pishtanan, y täzachö aceititawan juntum noqa Jehoväpa rikënïchö puntaman y qepaman kuyuratsir, altarchö rupatsimunan.+ Tsëqa culpayoq kanqampita qarëmi kanqa.+ 13 Tsëpitanam, ushakanqanyaq rupatsina qarëta+ y jutsankunapita* perdonashqa kayänampaq apayämunqan+ animalkunata pishtayänan sagrädu sitiuchö, juknin mallwa carnërutapis pishtanan. Y sacerdötipaq kaptinmi, jutsata rurayanqampita apayämunqan qarënölla culpayoq kayanqampita apayämunqan qarëpis alläpa sagrädu kanqa.+

14 Tsëpitanam sacerdötiqa, limpiu kanampaq mandakunqäta rurëkaq nunapa derëcha rinrimpa kuchunta, derëcha makimpa maman dëdunta y derëcha chakimpa maman dëdunta tsë yawarwan llushinan. 15 Y sacerdötiqa, täzachö aceititam+ izquierda maki paltanman jichanan. 16 Derëcha dëdunta izquierda makinchö aceitiman tullpurkurmi, noqa Jehoväpa rikënïchö qanchis kuti tsë aceitita pillchitsinan.* 17 Tsëpitanam sacerdötiqa, limpiu kanampaq mandakunqäta rurëkaq nunapa derëcha rinrimpa kuchunta, derëcha makimpa maman dëdunta y derëcha chakimpa maman dëdunta makinchö aceitiwan llushinan. Tsëtaqa llushinan culpayoq kanqampita apanqan animalpa yawarninta llushinqan jananmanmi. 18 Izquierda makinchö quedaq aceititanam, limpiu kanampaq mandakunqäta rurëkaq nunapa peqanman o umanman jichanan. Y sacerdöti tsëkunata ruraptinmi, tsë nunaqa jutsata* ruranqampita Teyta Jehoväpa rikëninchö perdonashqa kanqa.+

19 Tsëpitanam sacerdötiqa, limpiu kanampaq mandakunqäta rurëkaq nuna jutsampita* perdonashqa kanampaq,+ jutsata ruranqampita apanqan animalta pishtaskir altarchö rupatsinan. Tsënöllam ushakanqanyaq rupatsina qarëpaq apanqan animaltapis pishtanan. 20 Tsëpitanam, ushakanqanyaq rupatsina qarëta y gränupita rurashqa qarëta+ altarchö rupatsinan. Sacerdöti tsëta ruraptinmi, tsë nunaqa jutsata* ruranqampita perdonashqa kanqa,+ y rikënïpaq limpiuna kanqa.+

21 Peru waktsa karnin tsëkunata rantinampaq mana qellënin kaptinqa, culpayoq kanqampitam mallwa carnëruta apamunan. Y puntaman y qepaman kuyuratsir sacerdöti rupatsiptinmi culpayoq kanqampita perdonashqa kanqa. Tsënöllam apamunan aceitiwan pichushqa juk kïlu* alli aqashqa harinata, juk täza aceitita, 22 y ishkë kullkushta o ishkë llullu palumata, mëqantapis puëdinqanta. Juk kaqmi jutsampita* perdonashqa kanampaq kanqa, y juknin kaqnam ushakanqanyaq rupatsina qarëpaq kanqa.+ 23 Puwaq kaq junaqmi,+ carpa* wayipa yëkunanman apamur, noqa Jehoväpa rikënïchö tsë llapanta sacerdötita entreganan, tsënöpa rikënïpaq limpiuna kanampaq.+

24 Tsëpitanam sacerdötiqa, tsë nuna culpayoq kanqampita apanqan mallwa carnëruta+ y täzachö aceitita, noqa Jehoväpa rikënïchö puntaman y qepaman kuyutsinan.+ 25 Tsëpitanam, tsë nuna culpayoq kanqampita apanqan mallwa carnëruta pishtanan. Y tsë animalpa yawarnintam tsë nunapa derëcha rinrimpa kuchunta, derëcha makimpa maman dëdunta y derëcha chakimpa maman dëdunta tsë yawarwan llushinan.+ 26 Tsëpitanam sacerdötiqa, izquierda maki paltanman aceitita jichanan.+ 27 Y derëcha dëdunta izquierda makinchö aceitiman tullpurkurmi, noqa Jehoväpa rikënïchö qanchis kuti tsë aceitita pillchitsinan.* 28 Tsëpitanam sacerdötiqa, limpiu kanampaq mandakunqäta rurëkaq nunapa derëcha rinrimpa kuchunta, derëcha makimpa maman dëdunta y derëcha chakimpa maman dëdunta makinchö aceitiwan llushinan. Tsëtaqa llushinan culpayoq kanqampita apanqan animalpa yawarninta llushinqan jananmanmi. 29 Y izquierda makinchö quedaq aceititanam, limpiu kanampaq mandakunqäta rurëkaq nunapa peqanman o umanman jichanan. Sacerdöti tsëkunata ruraptinmi, tsë nunaqa jutsata* ruranqampita Teyta Jehoväpa rikëninchö perdonashqa kanqa.

30 Tsë nunaqa mëqantapis apëta puëdinqantam kullkushta o llullu palumata karpis apamunan.+ 31 Mëqanta rantita puëdiptimpis, jutsampita* perdonashqa kanampaq qarëmi kanqa. Juknin kaqnam ushakanqanyaq rupatsina qarëpaq kanqa,+ tsë gränupita rurashqa qarëtawan juntum rupatsinan. Y noqa Jehoväpa rikënïchö sacerdöti tsëkunata ruraptinmi, limpiu kanampaq mandakunqäta rurëkaq nunaqa, jutsata ruranqampita perdonashqa kanqa.+

32 Tsë mandakunqänömi leprampita alliyashqa waktsa nunaqa, rikënïchö limpiu kanampaq ruranan”.

33 Tsëpitanam Teyta Jehoväqa Moisestawan Aaronta kënö nirqan: 34 “Äniyanqaqnölla Canaanchö+ markakunapa duëñun tikrayaptiki,+ tsë markakunachö mëqan wayichöpis mupalli yurinampaq permitiptïqa,+ 35 tsë wayipa duëñunmi sacerdötiman ëwar, ‘wayïchömi mancha yurishqa’ ninan. 36 Tsënam sacerdötiqa, tsë wayichö kaqkunata jipiyänampaq mandakunan, tsënöpa rikënïpaq limpiulla kanampaq. Tsëpitanam sacerdötiqa tsë wayi rikaq ëwar, 37 tsë wayipa perqanchö yurinqan manchata rikänan. Puka o qallwashyarëkaq uchkukuna kaptin, y perqa rurinyaq yëkushqa kaptinqa, 38 wayi punkuman yarqamurmi, qanchis junaqpa tsë wayiman mana yëkuyänampaq sacerdöti mandakunan.+

39 Qanchis junaq pasariptinmi sacerdötiqa yapë tsë wayi rikaq kutinan. Perqachö mancha mirashqa kaptinqa, 40 manchayoq rumikunata jipir tsë markapita karuman jitayänampaqmi mandakunan, rikënïpaq mana limpiu sitiuman. 41 Tsëpitanam tsë wayipa perqanta jichkayänampaq mandakunan. Jichkayaptin yarqunqan yësuta y allpataqa, tsë markapita karumanmi jitayänan, rikënïpaq mana limpiu sitiuman. 42 Y jipiyanqan rumikunapa rantin juk rumikunatana churarkurmi, tsë wayipa perqanta yapë yësuyänan.

43 Peru manchayoq rumikunata cambiar y perqata jichkar yësuyanqanchö, yapë mancha yuriptinqa, 44 sacerdötim yapë kutir tsë wayita rikänan. Tsë mancha mirashqa kaptinqa, mana ushakaq mupalli kaptinmi,+ tsë wayiqa rikënïpaq limpiutsu kanqa. 45 Y sacerdötiqa, tsë wayita juchutsiyänampaqmi mandakunan. Rumikunata, qerukunata, yësuta y allpataqa tsë markapita karuman jitayänampaqmi mandakunan, rikënïpaq mana limpiu sitiuman.+ 46 Peru tsë wayiman mana yëkuyänampaq sacerdöti mandakunqan tiempuchö,+ pï nunapis tsë wayiman yëkurqa, tardiyanqanyaqmi rikënïpaq limpiutsu kanqa.+ 47 Y pï nunapis tsë wayichö punurqa o mikurqa, röpantam taqshanan.

48 Peru, sacerdöti tsë wayita rikaq ëwar yësuyanqanchö tsë mancha mana mirashqa kanqanta rikarqa, tsë mancha ushakashqana kaptinmi, tsë wayi rikënïpaq limpiuna kanqanta ninan. 49 Y tsë wayi rikënïpaq limpiuna kanampaqmi, tsë wayiyoq nuna apanqan ishkë pishqukunata, cedru qerupa rämanta, puka hïluta y tsaqtsukuna plantata,+ pëman apayänampaq sacerdöti mandakunan. 50 Y pözupita chaqashqa yakuyoq mitu manka jananchömi, juk kaq pishquta pishtanan. 51 Y yakuyoq mitu manka jananchö wanutsiyanqan pishqupa yawarninmanmi, cedru qerupa rämanta, tsaqtsukuna plantata, puka hïluta y kawëkaq pishquta tullpunan, tsë yawarwanmi qanchis kuti tsë wayita pillchitsinan.*+ 52 Tsënömi pishqupa yawarninwan, pözupita chaqanqan yakuwan, kawëkaq pishquwan, cedru qerupa rämanwan, tsaqtsukuna plantawan y puka hïluwan tsë wayita limpiuyätsinan. 53 Tsëpitanam kawëkaq pishquta, chakrakunapa libri ëwakunampaq dejanan. Sacerdöti tsëkunata ruraptinmi, tsë wayiqa rikënïpaq limpiuna kanqa.

54 Kë mandakunqänömi rurayänëki, pï nunapis lepra qeshyayoq kaptin, chakallwanchö* o peqanchö o umanchö qeri yuriptin,+ 55 röpanchö+ o wayinchö+ mupalli yuriptin, 56 y qaranchö chüpu, qeri o roncha yuriptin.+ 57 Tsënöpam sacerdöti musyanqa, rikënïpaq ima limpiu o mana limpiu kanqanta.+ Kë mandakunqänömi rurayänëki, pï nunapis leprayoq kaptin o imachöpis mupalli yuriptin”.+