Jeremïas

36 Josïaspa tsurin Jehoiaquim+ Judächö chusku watapana gobernëkaptinmi, Jeremïasta parlapar Teyta Jehovä kënö nirqan: 2 “Josïas gobernanqan witsanchö parlapar qallanqäpita kananyaq, Israelpita, Judäpita+ y mëtsë nacionpita nunakunapaq+ llapan parlanqäkunata rölluman qellqë.+ 3 Capaz imëka mana allikunata pëkunaman chätsimunäpaq kaqta musyar, Judäpita nunakuna mana alli rurëkunata dejayanman. Tsëqa mana allikunata rurayanqampita, y jutsata* rurayanqampitachi perdonëküman”.+

4 Tsënam Jeremïasqa Nerïaspa tsurin Baructa+ qayëkatsir, Teyta Jehovä llapan ninqankunata dictarqan. Y Barucnam rölluman qellqarqan.+ 5 Tsëpitanam Jeremïasqa Baructa nirqan: “Noqaqa manam Teyta Jehoväpa wayinman yëkuyta puëdïtsu. 6 Tsëmi Teyta Jehovä nimaptin llapan dictanqaqkunata, Teyta Diospa wayinman ëwëkur röllupita fuertipa leyinëki. Judä kinrëpita shamoq llapan nunakuna wiyayänampaqmi, Teyta Jehoväpa wayinman ayunaq shayämunqan junaq leyinëki. 7 Teyta Jehoväqa alläpa cöleratsiyaptinmi, pëkunata castiganampaq nishqa. Peru capaz pëkunaqa Teyta Jehoväman rogakuyanqa y mana alli rurëkunata dejayanqa”.

8 Tsënam Nerïaspa tsurin Barucqa, willakoq Jeremïas llapan mandanqanta rurarqan. Y Teyta Jehoväpa wayinman ëwëkurmi, rölluchö* qellqarëkaq Teyta Jehovä ninqankunata llapankunapaq fuertipa leyirqan.+

9 Josïaspa tsurin Jehoiaquim+ pitsqa watapana Judächö gobernëkaptin, isqun kaq killachömi, Jerusalenpita nunakunata y Judächö markakunapita Jerusalenman shamoq nunakunata, Teyta Jehoväpa puntanchö ayunayänampaq mandayarqan.+ 10 Tsëpitanam Barucqa Jeremïas dictaptin rölluman* qellqanqanta, Teyta Jehoväpa wayinchö fuertipa leyirqan. Diospa Palabranta copiaq Safanpa+ tsurin Guemarïaspa+ mikuna cuartunchömi, llapankunapaq fuertipa leyirqan. Tsë cuartuqa karqan jana kaq patiuchö, y Teyta Jehoväpa wayinchö Mushoq Punku niyanqampa yëkunanchömi.+

11 Guemarïaspa tsurin y Safanpa willkan Micäya, Teyta Jehovä rölluchö* llapan ninqanta wiyaskirqa, 12 gobernaqpa palaciunchö* secretariupa cuartunmanmi ëwarqan. Tsëchöqa secretariu Elisamä,+ Semäyapa tsurin Delayä, Acborpa+ tsurin Elnatan,+ Safanpa tsurin Guemarïas, Hananïaspa tsurin Sedequïas y wakin dirigeqkunam këkäyarqan. 13 Llapan nunakunata Baruc rölluchö* ninqanta leyipaptin, llapan wiyanqantam Micäyaqa tsëchö këkaqkunata willarqan.

14 Tsëpitanam llapan dirigeqkuna, Netanïaspa tsurin Jehudïta, Baructa kënö ninampaq mandayarqan: “Llapankuna wiyëkäyaptin leyinqëki rölluta aparkur shamuy”. Nerïaspa tsurin Barucqa tsë rölluta aparkurmi pëkuna këkäyanqanman ëwarqan. Netanïasqa Semalïaspa tsurinmi karqan. Semalïasnam Cusïpa tsurin karqan. 15 Tsënam dirigeqkunaqa Baructa niyarqan: “Täkarallämuy, y noqakunapaqpis tsë rölluta leyïkallämuy”. Tsënam Barucqa pëkunapaq leyirqan.

16 Tsë rölluchö ninqanta wiyëkurnam jukninkuna jukninkuna mantsakashqa rikaränakuyarqan, y Baructam, “tsë rölluchö ninqantaqa gobernaqtapis musyatsinantsikmi” niyarqan. 17 Baructam kënö tapuyarqan: “Niyämë, ¿pitan tsëchö ninqëkita qellqanëkipaq nishurqunki? ¿Pëku dictashurqunki?”. 18 Barucnam, “awmi, pë dictamanqantam kë rölluman* qellqarqö” nirqan. 19 Y dirigeqkunanam Baructa niyarqan: “Qam y Jeremïas, mana ni pï tariyäshunëki sitiuman qeshpir ëwakuyë”.+

20 Tsëpitanam dirigeqkunaqa, secretariu Elisamäpa cuartunchö* rölluta dejëkur, gobernaqta rikaq patiuman ëwayarqan. Y llapan wiyayanqantam gobernaqta willayarqan.

21 Tsënam gobernaqqa, tsë rölluta apamunampaq Jehudïta+ mandarqan. Y secretariu Jehudïqa, Elisamäpa cuartumpita tsë rölluta apamurmi, gobernaqpaq y pëwan këkaq dirigeqkunapaq leyipurqan. 22 Isqun kaq killam* karqan, y gobernaqqa tamya tiempu täkunan* wayinchömi, nina frentinchö qoñükur këkarqan. 23 Jehudï kima o chusku fïlakunata leyikaptinnam, gobernaqqa secretariukuna utilizäyanqan cuchilluwan, tsë leyinqan partita roqureq y ninaman jitëkoq, tsënömi ichikllapa ichikllapa llapan rölluta ninachö ushakätsirqan. 24 Tsë rölluchö ninqanta wiyëkarpis, manam ni gobernaqpis ni mëqan sirweqninkunapis ichikllapis mantsakäyarqantsu, y manam röpankunatapis llakikur rachiyarqantsu. 25 Elnatan,+ Delayä+ y Guemarïas,+ tsë rölluta ninachö mana ushakätsinampaq roguëkäyaptimpis, gobernaqqa manam cäsurqantsu. 26 Tsëpa rantinqa, gobernaqpa tsurin Jerahmeelta, Azrielpa tsurin Seräyata y Abdeelpa tsurin Selemïastam, Baructa y Diospa willakoqnin Jeremïasta prësuyänampaq mandarqan. Peru Teyta Jehoväqa, manam tariyänanta permitirqantsu.+

27 Jeremïas dictaptin Baruc qellqanqan rölluta gobernaq ninachö ushakätsinqanchömi, Teyta Jehoväqa Jeremïasta yapë parlapar kënö nirqan:+ 28 “Juk mushoq rölluta ashï, y Judächö gobernaq Jehoiaquim ninachö ushakätsinqan rölluchö llapan ninqantanölla, tsë rölluman qellqë.+ 29 Y Judächö gobernaq Jehoiaquimpaqmi kënö qellqanëki: ‘Teyta Jehovämi këta nin: “Qamqa rölluta ninachö ushakätsirmi kënö nirqëki ‘¿Imanirtan tsë rölluman qellqarqëki, Babiloniachö gobernaq shamunampaq kaqta, kë nacionta ushakätsinampaq kaqta, y kë kinrëchö nunakunata y animalkunatapis ushakätsinampaq kaqta?’.+ 30 Tsëmi Judächö gobernaq Jehoiaquimpaq Teyta Jehovä këta nin: ‘Manam mëqan kastampis David gobernar täkunqampita+ gobernanqatsu. Ayampis paqasta junaqtam, alalëchö y achachëchö jitaräkunqa.+ 31 Mana allikunata rurayanqampitam, kikinta, kastankunata y sirweqninkunatapis castigashaq. Tsënöllam Jerusalenpita y Judäpita nunakunamampis, puntallapitana willanqänölla, imëka mana allikunata chätsimushaq.+ Pëkunaqa kutin kutin tsëkunapita willëkaptïpis, manam cäsukuyta munayashqatsu’”’”.+

32 Tsëpitanam Jeremïasqa juk rölluta ashïkur, Nerïaspa+ tsurin secretariu Baructa entregarqan, y pënam Jeremïas llapan dictanqanta tsëman qellqarqan. Awmi, Judächö gobernaq Jehoiaquim ninachö ushakätsinqan rölluchö*+ llapan ninqantam, tsë rölluman yapë qellqarqan. Tsë röllumanqa, Teyta Dios mas ninqankunatapis qellqatsirqanmi.