Apocalipsis

9 Pitsqa kaq angelmi trompëtanta tocarqan.+ Tsënam ciëlupita patsaman jeqamushqa estrëllata rikarqä, y mankarëkaq uchkupa* llävintam entregayarqan.+ 2 Tsë estrëlla mankarëkaq uchkuta* kicharkuptinnam, jatun hornupita yarqoq qoyënö o qoshninö tsë uchkupita yarqamurqan. Y uchkupita yarqamoq qoyëmi, intita o rupayta y vientuta ampïtsirqan o tsakätsirqan.*+ 3 Tsë qoyëpitam o qoshnipitam chukllushkuna* patsaman yarqayämurqan,+ y patsachö atoq kurukuna chaskiyanqan autoridätam chaskiyarqan. 4 Pëkunatam mandayarqan patsachö qorakunata, verdirëkaq plantakunata y montikunata mana imanayänampaq, sinöqa Teyta Diospa sëllunta urkunkunachö mana katseq nunakunallata.+

5 Tsë chukllushkunaqa* manam nunakunata wanutsita puëdiyaqtsu, sinöqa pitsqa killapa sufritsillatam. Kaniyaptin nunakuna sufriyanqanqa, atoq kuru kaniptin+ nunakuna sufriyanqannömi karqan. 6 Tsë junaqkunaqa, wanuyta o wañuyta ashirpis manam nunakuna tariyanqatsu, y mëna wanuyta munayaptimpis, wanuyqa pëkunapita qeshpirmi ëwakunqa.

7 Y chukllushkunaqa* guërrapaq listu këkaq cawallukunanömi kayarqan.+ Peqankunachöqa o umankunachöqa örupita coröna niraqtam katsiyarqan, y cärankunaqa nunakunapa cärannömi karqan. 8 Aqtsankunaqa warmipa aqtsannömi karqan, kirunkunaqa leonkunapa kirunnömi karqan,+ 9 y pëchunkunata tsapaq chalëcuqa, fiërrupita chalëcunömi karqan. Älankunata kuyutsiyaptinqa carrëtankuna sutashqa guërraman cörripa ëwaq cawallukuna büllaqnömi wiyakaq.+ 10 Manam tsëllatsu, chupankunaqa atoq kurukunapanömi tuksikoq, y tsë chupankunachömi pitsqa killapa nunakunata sufritsiyänampaq autoridäninkuna këkarqan.+ 11 Pëkunata mandaq gobernaqqa mankarëkaq uchkupa angelninmi.+ Hebreu idiömachö jutinqa Abadonmi,* y griëgu idiömachönam Apolion.*

12 Punta kaq imëka mana allikunaqa pasashqanam. ¡Alkäbu këkäyë! Tsëkunapa qepantam ishkë mas imëka mana allikunaraq kanqa.+

13 Joqta kaq angelmi+ trompëtanta tocarqan.+ Tsënam Teyta Diospa puntanchö këkaq örupita altarpa+ waqrankunapita parlamoqta wiyarqä. 14 Trompëta katseq joqta kaq angeltam kënö nirqan: “Eufratis jatun mayupa* lädunchö watarëkaq chuskun angelkunata paskë”.+ 15 Tsënam tsë hörapaq, junaqpaq, killapaq y watapaq alistashqa chusku angelkuna, nunakunapita kima kaq partita wanutsiyänampaq paskashqa kayarqan.

16 Cawallun montashqa soldädukunaqa doscientus millonmi* kayarqan; kikïmi ëkaq kayanqanta wiyarqä. 17 Y suëñuchönö rikanqä cawallukuna y tsëkunata montarëkaqkunaqa kënömi kayarqan: pëchunkunata tsapaq chalëcuqa ninanö puka, jacintunö azul y azufrinö qallwashmi karqan, y cawallunkunapa peqankunaqa o umankunaqa leonpa peqannömi karqan,+ y shiminkunapitanam nina, qoyë o qoshni y azufri yarqamoq. 18 Nunakunapita kima kaq partiqa kë kiman castïguwanmi wanuyarqan o wañuyarqan: cawallukunapa shimimpita yarqoq ninawan, qoyëwan o qoshniwan y azufriwan. 19 Cawallukunapa autoridäninqa shiminkunachö y chupankunachömi këkan, awmi, chupankunaqa peqayoq o umayoq y culebranömi kayan, y tsëwanmi nunakunata sufritsiyan.

20 Peru tsë castïgukunawan mana wanoq nunakunaqa, manam makinkunawan rurayanqampita arrepentikuyarqantsu. Awmi, manam demoniukunata ni örupita, plätapita, cobripita, rumipita ni qerupita santukunata adorëta dejayarqantsu. Tsëkunaqa manam rikëta, wiyëta ni purita puëdiyantsu.+ 21 Y manam nuna mayinta wanutsiyanqampita, brujerïa rurayanqampita,* oqllanakur melanëpaqkunata rurayanqampita* ni suwakoq kayanqampita arrepentikuyarqantsu.