Ezequiel
45 ‘Israelïtakunata chakrata herenciankuna entregarqa,+ noqa Jehoväpaqpis rakiyanki.+ Tsë noqapaq rakiyanqëki chakrapa largunqa döci mil novecientus cincuenta metrusmi* kanan y anchunnam cincu mil cientu ochenta metrus* kanan.+ Tsë rakiyanqëki chakraqa sagrädum kanqa. 2 Tsë dejayanqëki sagrädu chakra rurinchönam juk cuadrädu löti kanan, tsë lötipa anchunqa doscientus cincuenta y nuëvi metrusmi* kanan y largumpis doscientus cincuenta y nuëvi metrusmi kanan.+ Y tsë lötipa entëru kuchumpanam dejayänëki veintiseis metrus* anchuta, tsëqa qewapaqmi kanan.+ 3 Qewapaq dejayanqëki kuchumpitanam, ruriman largunta mediyänëki döci mil novecientus cincuenta metrusta* y anchuntana cincu mil cientu ochenta metrusta,* tsëchömi sagrädu templü kanqa. 4 Tsë sitium, templuchö noqa Jehoväta sirwimaq+ sacerdötikunapaq kanqa.+ Tsëchömi sacerdötikunapa wayinkuna y sagrädu templüpis kanqa.
5 Templuchö yanapakoq levïtakunapaqnam veinti comedorkuna kanqa.+ Tsë comerdorkuna këkanqampa largunqa döci mil novecientus cincuenta metrusmi* kanqa y anchunnam cincu mil cientu ochenta metrus* kanqa.+
6 Tsënöllam, sagrädu qarëta rakiyanqëkinölla, ishkan läduchö chakrakunata rakiyänëki. Tsë chakrapa largunqa döci mil novecientus cincuenta metrusmi* kanan y anchunnam dos mil quinientus noventa metrus* kanan.+ Tsë chakraqa llapan Israel nunakunapaqmi kanqa.
7 Mandakoqpaqnam sagrädu chakrawan y markapaq rakiyanqan chakrawan qaqaraq chakra kanqa. Tsëqa kanqa sagrädu qarëpaq y markapaq rakiyanqan chakrakuna lädunchömi, inti o rupay jeqanan läduchö y inti yarqamunan läduchö. Inti o rupay jeqanan lädupita inti yarqamunan läduman mediyaptinqa, Israelchö juk kastapa chakrampa largunnöllam largun kanqa.+ 8 Israelchöqa tsë chakrakunam mandakoqpaq kanqa, y mananam sirwimaqnïkunata mandakoqkuna sufritsiyanqanatsu.+ Wakin kaq chakrakunatanam Israelchö kastakunata entreguëkuyanqa’.+
9 Llapanta Gobernaq Teyta Jehovämi kënö niyäshunki: ‘¡Israelchö mandakoqkuna, qamkunaqa alläpanam mana allikunata rurayarqunki!+
Amana nuna mayikikunata sufritsiyënatsu, ni provechakuyënatsu, amana sirwimaqnïkunapa chakrankunata duëñu tukuyënatsu, alli kaqtana rurayë’+ ninmi Llapanta Gobernaq Teyta Jehovä. 10 ‘Balanzatapis alli pesaqta katsiyanki, y tsaki mikuyta y yaku kaqtapis alli mideq medïdata katsiyanki.+ 11 Efä* medïdapis tsë tamäñullam kanan, y bätu* medïdapis tsë tamäñullam kanan. Juk bätu kanampaqqa juk homertam* chunkaman rakiyänan, y juk efä kanampaqpis juk homertam chunkaman rakiyänan. Homer medïdam mas principal medïda kanan. 12 Veinti guerämi* juk siclu kanqa.+ Veinti siclusman,* veinticincu siclusta yaparkuptiki y tsë jananmanna quinci siclusta yaparkuptikiqa juk manëmi* kanqa’.
13 ‘Qarëkunataqa kënömi apayämunëki: trïguyki juk homer* kapushuptikiqa, tsëpita juk efäta* rakinki. Tsë rakinqëki efätana joqtaman rakinki, y tsëpitana juk parti kaqta apamunki. Tsënölla cebädëkipis juk homer kapushuptikiqa, tsëpita juk efäta rakinki y tsë efätana joqtaman rakinki, y tsëpitana juk parti kaqta apamunki. 14 Juk cöruqa* chunka bätum,* tsënöllam juk homerpis chunka bätu, tsëmi aceitita apamunëkipaqqa bätuwan medinëki. 15 Y üshatanam cada doscientuspita jukta apamunëki. Tsëtaqa rupatsiyänan gränupita rurashqa qarëkunata,+ rupatsina qarëkunata+ y Dioswan amïgu kayanqanta rikätsikoq qarëkunata+ rupatsirmi. Tsënöpam nunakunaqa noqawan alli kayanqa’+ ninmi Llapanta Gobernaq Teyta Jehovä.
16 ‘Israelchö mandakoqpaqmi llapan nunakuna tsëkunata+ apayämunan. 17 Peru rupatsiyänampaq qarëkunata,+ gränupita rurashqa qarëkunata+ y vïnu qarëkunataqa mandakoqmi alistanan. Tsëtaqa alistanan fiesta junaqkunapaq,+ llullu killa junaqpaq, säbadu junaqpaq y Israelchö llapan fiestakunapaqmi.+ Llapan Israel nunakuna Dioswan alli kayänampaqmi pëqa alistanan, jutsankunapita* perdonashqa kayänampaq qarëkunata,+ gränupita rurashqa qarëkunata, rupatsina qarëkunata y Dioswan amïgu kayanqanta rikätsikoq qarëkunata’.
18 Llapanta Gobernaq Teyta Jehovämi kënö nin: ‘Punta kaq killapa punta junaqninchömi, juk mallwa töruta apanëki templüta jutsapita* limpiuyätsiyänampaq.+ Tsë apanqëki töruqa sänum kanan. 19 Y sacerdötinam, jutsapita* perdonashqa kayänampaq apanqëki törupa yawarninwan templü punkunkunapa marcunkunata pasatsinqa,+ altarpa pataknimpa chuskun esquïnankunaman churanqa y ruri kaq patiuchö punkukunapa marcunta pasatsinqa. 20 Y killapa qanchis kaq junaqninchöpis tsënöllam ruranëki, tsëtaqa ruranëki pantarnin o mana musyarnin jutsata* rurashqa nunakunata yanaparninmi.+ Tsënömi templu limpiu kanampaqpis rurayänëki.+
21 Punta kaq killapa catorci junaqninchömi Pascua Fiestata ruranëki.+ Tsë fiestachöqa qanchis junaqpam levadürannaq tantata mikuyänëki.+ 22 Tsë junaqmi mandakoqqa, rupatsiyänampaq juk töruta apamunan. Tsëtaqa apamunan kikimpa jutsampita* y llapan nunakunapa jutsampitam.+ 23 Tsë qanchis junaq fiestachöqa, cada junaq rupatsiyänampaqmi noqa Jehoväpaq apamunan qanchis mallwa törukunata y qanchis carnërukunata.+ Tsënöllam jutsankunapita* perdonashqa kayänampaq rupatsiyänampaqpis, cada junaqpaq juk chïvuta* apamunan, tsë animalkunaqa sänum kayänan. 24 Manam tsëllatatsu apamunan, sinöqa cada mallwa töruta apamurmi, onci kïlus gränu* qarëta y kima litru pullan* aceitita apamunan. Tsënöllam juk carnëruta apamurpis, onci kïlus gränupita rurashqa qarëta y kima litru pullan aceitita apamunan.
25 Tsënöllam qanchis kaq killachöpis, killapa quinci kaq junaqnimpita qallaq fiestapaq tsëkunata apamunan.+ Apamunanmi jutsapita* perdonashqa kanampaq qarëkunata, rupatsina qarëkunata, gränupita rurashqa qarëkunata y aceititapis, tsë fiestapis qanchis junaqpam kanan’”.