2 Crönicas
3 Tsëpitanam Salomonqa Jerusalenchö këkaq Moria jirkachö+ Jehovä Diospaq wayita ruratsirqan.+ Tsë jirkachömi jebuseu Ornanpa+ ëran karqan, y tsëchö Jehovä Dios yuripushqa kaptinmi+ papänin Davidqa templuta ruranampaq alistashqa karqan. 2 Templutaqa shäritsir qallëkurqan chusku watana gobernëkarmi, watapa ishkë kaq killanchö y ishkë kaq junaqninchö. 3 Teyta Diospa templunta ruratsinampaq churatsinqan cimientupa largunqa veintisiëti metrusmi* karqan, anchunnam+ isqun metru* karqan. Tsëqa unë utilizäyanqan medïdam karqan.* 4 Templuman yëkuna pasadïzupa anchunqa isqun metrum* karqan y altunnam cientu veinti* karqan. Y rurimpaqa alli kaq öruwanmi laqatsirqan.+ 5 Jatun kaq cuartupa entëru perqanmannam enebru tablata churatsirqan. Jananmannam chipapänampaq alli kaq öruwan laqatsirqan,+ tsëpitanam palmërakunata+ y cadënakunata dibujatsirqan.+ 6 Tsëpitanam shumaq kanampaq shumaq rumikunawan+ y Parvaimpita apayanqan öruwan+ adornatsirqan. 7 Tsënöllam templupa terrädunkunata, umbralninkunata, perqankunata y punkunkunata+ öruwan laqatsirqan. Y perqankunachönam querubin angelkunata llaqllëpa ruratsirqan.+
8 Tsëpitanam Alläpa Sagrädu Cuartuta+ ruratsirqan. Tsë cuartupaqa largumpis y anchumpis isqun metrum* karqan. Tsë cuartutapis veinti mil quinientus veinti kïlus* alli kaq öruwanmi laqatsirqan.+ 9 Clävukuna jananman laqatsinqan örupis mediu kïlupita masmi* karqan, y altuchö cuartukunamampis örutam laqatsirqan.
10 Alläpa Sagrädu Cuartuman churatsinampaqmi, ishkë querubin angelkunata ruraratsir öruwan laqatsirqan.+ 11 Ishkan querubin angelkunapa älankunaqa cäsi isqun metrum* medirqan. Juk kaq querubin+ angelpam juknin älan ishkë metru mas* mideq y juk kaq lädu perqamanmi topaq. Y juk kaq älampis ishkë metru masmi* mideq y juk kaq querubinpa älanwanmi topanakoq. 12 Tsënöllam juk kaq querubin angelpa juknin älampis ishkë metru mas* mideq y juk kaq lädu perqaman topaq. Y juk kaq älampis ishkë metru masmi* mideq y juk kaq querubinpa älanwanmi topanakoq. 13 Ishkan querubin angelkunapa mashtarëkaq älankunaqa cäsi isqun metrum* mideq, y punkuman rikarëkarmi shëkäyarqan.*
14 Tsëpitanam azul hïlupita, granäti millwapita, puka hïlupita y mas alli kaq tëlapita cortïnata+ awatsirqan, y jananmannam querubin angelkunata+ bordatsirqan.
15 Tsëpitanam templu punkunchö shäränampaq* ishkë jatusaq columnakunata+ ruratsirqan. Tsë columnakunapa ishkan largunta mediyaptinqa quinci metrus pullanmi* medirqan. Y tsë columnakunapa puntanman churayanqan ishkë jatusaq adornukunanam* cada ünu ishkë metru mas* medirqan.+ 16 Tsëpitanam cadënakunata rurëkatsir columnakunaman churatsirqan y tsë cadënakunamannam cien granäda früta niraq adornukunata churatsirqan. 17 Templuman yëkuna punkumanmi ishkan läduman tsë ishkan columnakunata churatsirqan. Derëcha* kaq läduchö columnatam Jakin* nir jutin churarqan y izquierda* kaq läduchö columnatanam Boaz* nir jutin churarqan.