1 Rëyes
5 Tïru markapa+ gobernaqnin Hiramqa Davidpa amïgunmi karqan.+ Tsëmi Davidpa rantin Salomon gobernëkanqantana musyarir Hiramqa sirweqninkunata mandarqan. 2 Salomonpis tsë nunakunatam mandarqan Hiramta kënö niyänampaq:+ 3 “Musyanqëkinöpis papänï gobernanqan witsanqa, mëtsika markakunam pëwan guërrachö kayarqan. Tsëmi Jehovä Diospa jutimpa reqishqa kanampaq wayita rurëta munëkarpis rurarqantsu. Peru llapan chikeqninkunata vencinampaqmi Jehovä Diosnin yanaparqan.+ 4 Tsëmi noqatapis Jehovä Diosnï yanapamaptin, llapan nacionkunawampis yamëna kawakuyä.+ Ni mëqan markapis conträ mana kayaptinmi guërrapis kannatsu.+ 5 Tsëmi kananqa Jehovä Diosnïpaq wayita ruratsita munëkä jutimpa reqishqa kanampaq. Tsëpaqmi Teyta Jehoväqa papänï Davidta kënö nirqan: ‘Qampa rantiki gobernanampaq churanqä tsurikim jutïpa reqishqa kanampaq wayitaqa ruratsinqa’.+ 6 Tsëmi kananqa Lïbanuchö cedru+ qerukunata peonnikikunawan wallutsimunëkita munä. Qamqa musyankim sirwimaqnïkunaqa qeru walluyta mana yachayanqanta, tsëmi sidoniu nunakuna yanapëkuyänampaq rogakullaq.+ Peonnikikunapa jornalnintaqa mañamanqëkitam pagallashqëki”.
7 Salomon tsënö ninqanta willayaptinnam Hiramqa kushikur kënö nirqan: “¡Jehovä Dios alabashqa këkullätsun. Pëmi Davidpa tsurinta yanapashqa yachaq kanampaq y mëtsika Israel nunakunata alli gobernanampaq!”.+ 8 Tsëpitanam Hiramqa willakoqkunata mandarqan Salomonta kënö niyänampaq: “Llapan ninqëkitam willayämashqa. Ama yarpachakuytsu, mañamanqëkinömi cedru qeruta y enebru* qerutapis+ apatsimushaq. 9 Peonnïkunam Lïbanupita lamar kuchunyaq qeruta urätsiyämunqa. Tsëpitanam, watarkur nimanqëki sitiuyaq yakullapa apayämunqa. Tsëpitaqa qamnam chätsikunki. Y qerukunata apatsimunqäpitaqa, palaciuchö yanapamaqnïkuna mikuyänampaqmi mikuyninkuna apatsimunëki”.+
10 Tsëmi Hiramqa, Salomon munanqan cedru qeruta y enebru* qeruta apatsirqan. 11 Y Salomonqa cada watam, Hirampaq apatsirqan tres millon doscientus mil kïlus* trïguta, y olïvupita mas alli kaq aceititanam+ cuatru mil cuatrocientus litrusta,* tsëqa karqan palaciuchö yanapakoqkunapaqmi. 12 Jehovä Diosqa äninqannömi, alläpa yachaq kanampaq Salomonta yanaparqan.+ Y mana chikinakuyänampaq acuerduta rurashqa karmi, Hiramwan Salomonqa alli kawakuyarqan.
13 Gobernanti Salomonqa, trabajayänampaqmi entëru Israelpita treinta mil nunakunata qayatsirqan.+ 14 Y pëkunata kima grüpuman rakiskirmi, Lïbanuchö trabajayänampaq diez milta cada killa mandaq. Pëkunaqa juk killam Lïbanuchö trabajayaq, y wayinkunatanam kutiyaq ishkë killapa jamayänampaq. Mandaqninkunaqa Adoniram-mi+ karqan. 15 Salomonpa peonninkunaqa setenta milmi kayarqan y jirkakunachö+ rumi llaqllaqkunanam+ ochenta mil kayarqan. 16 Tsë trabajaqkunata mandaqkunaqa*+ tres mil trescientusmi kayarqan. 17 Salomonqa templupa cimientumpaq+ jatusaq y cuestaq rumikunata+ llaqllayänampaqmi+ mandakurqan. 18 Tsënömi Salomonpa trabajaqninkuna, Hirampa trabajaqninkuna y guebalïta+ nunakunapis qerukunata o montikunata wallurnin y rumikunata llaqllarnin templuta shäritsiyänampaq yanapakuyarqan.