2 Samuel

8 Tiempuwannam Davidqa, filisteukunata+ venciskir sirweqninkuna kayänampaq churarqan,+ y pënam Meteg-Amä sitiupa duëñun karqan.

2 Y moabïtakunata+ venciskirmi, llapan soldädukunata kima fïlaman rakïkur patsaman lätëkatsirqan.* Ishkë fïlatam rakirqan wanutsinampaq o wañutsinampaq y juk fïlatanam kawëkaqta dejanampaq.+ Moabïtakunaqa Davidpa sirweqninmi tikrayarqan y impuestutam pagayaq.+

3 Rehobpa tsurin Hadadëzermi soldädunkunawan yapë ëwarqan Eufratis mayu*+ lädunchö markakunapa duëñun këta munar, y Davidqa tsëchömi soldädunkunawan Hadadëzerta vencirqan. Pëqa Zobä+ nacionchö gobernaqmi karqan. 4 Davidqa cawallunkuna montashqa ëwaq mil setecientus soldädukunata y chakipa ëwaq veinti mil soldädukunatam prësutsirqan. Y carrëta sutaq cawallukunapa ankunkunatam roquyarqan, cienllatam sänutaqa dejayarqan.+

5 Y Zobä nacionchö Hadadëzer gobernantita yanapaq Damascu+ markapita ëwaq siriu soldädukunatam, Davidwan soldädunkunaqa veintidos milta wanutsiyarqan.+ 6 Tsëpitanam Davidqa Siriachö këkaq Damascu markaman soldädukunata churarqan, y siriu nunakunaqa sirweqnin tikrarirmi Davidta impuestuta pagayaq. Guërrata ruranampaq David mëta ëwaptimpis,+ chikeqninkunata vencinampaqmi Jehovä Diosqa yanapaq. 7 Davidqa Hadadëzerpa sirweqninkunapa örupita rurashqa escüdunkunatapis Jerusalenpam apakurqan.+ 8 Y Hadadëzer gobernanqan Bëtah y Berotai markakunapitam mëtsika cobrita aparqan.

9 Tsëpitanam Hamat+ markapita Toi jutiyoq gobernantiqa musyaskirqan Hadadëzerpa llapan soldädunkunata David vencishqa kanqanta.+ 10 Tsëmi Toiqa tsurin Joramta Davidman mandarqan imanö këkanqanta tapunampaq y Hadadëzerta vencinqampita kushikunqanta ninampaq (tsënöqa Toi kushikurqan, Hadadëzerwan mëtsika kuti guërrachö kashqa karmi). Joramqa Davidpaqmi, pläta metalpita, örupita y cobripita rurashqa qarëkunata aparqan. 11 Davidqa wakin nacionkunapita apanqan pläta metalta y öruta Jehovä Diospaq churanqannömi,+ tsë qarëkunatapis pëpaq churarqan.* 12 Tsë pläta metalwan öruqa karqan siriukunapata, moabïtakunapata,+ ammonïtakunapata, filisteukunapata+ y amalequïtakunapata+ apanqankunam. Rehobpa tsurin Hadadëzer+ gobernanqan markakunapita apanqan cösaskunapis karqanmi. Hadadëzerqa Zobä nacionchö gobernaqmi karqan. 13 Davidqa Kachi pampachö+ dieciöchu mil edomïta soldädukunata wanuratsirmi masraq reqishqa tikrarqan. 14 Davidqa entëru Edommanmi soldädukunata churarqan, y llapan edomïtakunam sirweqnin tikrayarqan.+ Guërrata ruranampaq David mëta ëwaptimpis, chikeqninkunata vencinampaqmi Jehovä Diosqa yanapaq.+

15 Entëru Israelchö+ David gobernaptinmi llapankunapaq+ justicia karqan.+ 16 Zeruyäpa wamran Joabmi+ soldädukunapa mandaqnin karqan; Ahiludpa tsurin Jehosafatmi+ ima pasakunqantapis qellqarqan; 17 Ahitubpa tsurin Sadocwan+ Abiatarpa tsurin Ahimëlecmi sacerdöti kayarqan; Seräyam secretariu karqan; 18 Jehoiadäpa tsurin Benäyam+ keretïtakunapa y peletïtakunapa+ mandaqnin karqan, y Davidpa tsurinkunam dirigentikuna* kayarqan.