Jeremïas
14 Usya tiempupaqmi Jeremïasta Teyta Jehovä kënö nirqan:+
2 Entëru Judäpis llakipëpaqmi* këkan,+ y punkunkunapis malograrmi ushakëkan.
Alläpa llakipëpaqmi patsaman ishkir ushayan,
y Jerusalenchö nunakuna llakikur büllayanqanmi wiyakan.
3 Patronkunapis sirweqninkunatam
yakuta asheq mandayan.
Peru pözukunachö mana yaku kaptinmi jinëlla kutiyan.
Tsëmi llakishqa y penqakur
peqankunata o umankunata tsapakuyan.
4 Mana tamya kaptinmi+ chakrakunapis partikar ushashqa këkäyan.
Tsëmi murukoqkunapis
espantashqa peqankunata o umankunata tsapakuyan.
5 Mana qewa kaptinmi china luychupis
tsëllaraq yurishqa wawanta dejar ëwakun.
6 Chukaru ashnukunapis mana imapis kanqan taksha jirkakunachömi
chacalkunanö* jäkalyar këkäyan.
Qewa mana kaptinmi mallaqëwan nawinkunapis rikannatsu.+
7 Jutsata* rurayanqä culpayoq kayanqäta rikätsikuptimpis,
Teyta Jehovä jutikiman yarparnin yanapëkayämë.+
Imëka mana allikunata rurarmi+
qampa rikënikichö jutsata rurayarqö.
8 Teyta Diosllä, Israelpita nunakunaqa qammanmi confiakayämun,
y mana allikunapa pasarnimpis salvëkunëkitam shuyaräyan.+
Tsëqa, ¿imanirtan juk nacionpita forastëru nunanö
y viajar ëwarnin mëchöpis juk paqaslla quedakoq nunanö pëkunapaq kanki?
9 ¿Imanirtan imatapis mana rurëta puëdeq nunanö
y puëdeq karnimpis, pitapis mana salvëta puëdeq nunanö kanki?
Ama dejayämëtsu.
10 Kë markapita nunakunatam Teyta Jehovä këta nin: “Qamkunataqa wakpa këpa purikachëmi gustayäshunki,+ y manam juk sitiullachöqa quedakuyankitsu.+ Tsëmi noqa Jehoväqa qamkuna rurayanqëkiwan kushishqatsu këkä.+ Y kananqa mana allikunata rurar jutsata* rurayanqëkipitam castigayashqëki”.+
11 Tsëpitanam Teyta Jehoväqa kënö nimarqan: “Ama mañakamëtsu kë nunakuna imatapis rurayanqan alli yarqunampaq.+ 12 Pëkuna ayunayaptimpis, manam noqaman rogakayämunqanta wiyätsu.+ Y rupatsina qarëkunata y gränupita rurashqa qarëkunata apayämuptimpis, manam pëkunata chaskitsu.+ Tsëmi espädawan ushakätsiyänanta y mallaqëpita y qeshyakunawan wanuyänanta permitishaq”.+
13 Tsënam noqaqa kënö nirqä: “¡Llapanta Gobernaq Teyta Jehovä! Willakoqkunaqa pëkunatam kënö nikäyan: ‘Qamkunaqa manam mallaqäyankitsu ni espädawan wanutsiyäshunkitsu. Tsëpa rantinqa, kë kinrë markakunachö yamë kawayänëkitam permitishaq’”.+
14 Tsënam Teyta Jehoväqa kënö nimarqan: “Willakoqkunaqa mana rasumpa kaqtam jutïchö willakuykäyan.+ Pëkunataqa manam noqa mandarqötsu, y manam imatapis nirqötsu.+ Pëkuna willakuyanqan revelacionkunaqa manam rasumpatsu, y ima pasakunampaq kaqta niyanqampis, manam imapaqpis välintsu. Pëkunaqa shonqunkunachö yarpäyanqanllatam willakuyan.+ 15 Tsë willakoqkunaqa noqa mana mandëkaptïmi, kë nacionpita nunakunata, ‘manam espädawan wanuyankitsu ni mallaqëta pasayankitsu’ nir jutïchö nikäyan. Tsëmi noqa Jehovä pëkunapaq këta nï: ‘Tsë willakoqkunataqa espädawanmi ushakätsiyanqa y mallaqëpitam wanuyanqa.+ 16 Tsë willakoqkuna willakuyanqanta wiyëkaq nunakunapis, espädawan wanutsiyaptin y mallaqëpita wanurmi, Jerusalenpa cällinkunachö wakchö këchö jitaräyanqa. Y manam ni pï kikinkunata, warminkunata ni warmi ni ollqu tsurinkunata pampayanqatsu.+ Mana allikunata rurayanqampitam, tsë imëka mana allikuna pëkunaman chämunanta permitishaq’.+
17 Kë ninqäkunata pëkunata willë:
‘Sirwimaqnïkunataqa alläpa feyupam maqayashqa,+
y herïdankunapis grävim këkan.
Tsëmi paqasta junaqta waqashaq,+ y nawïpis weqillanam kanqa.
18 Pampaman yarqurpis,
espädawan wanutsiyanqan nunakunallatam rikä,+
y markaman yëkurpis, mallaqar qeshyëkaq nunakunallatam rikä.+
Willakoqkunata y sacerdötikunatapis,
mana reqiyanqan markakunamanmi apëkäyan’”.+
19 ¿Judäpita llapan nunakunataku dejarqunki?
¿Sionpita nunakunataku chikirqunki?+ ¿Imanirtan tsëläya castigayämarqunki?
Kananqa manam noqakunapaq jampipis kannatsu.+
Yamë këtam shuyaräyarqä, peru manam ima alli pasakushqatsu.
Jampishqa këtam shuyaräyarqä, peru mas mantsakashqam këkäyä.+
20 Teyta Jehovä, qampa rikënikichömi jutsata* rurayarqö.
Awmi, kikïkuna y unë kastäkunapis
qampa rikënikichömi mana allikunata rurayarqö.+
21 Jutikiman yarpar ama dejayämëtsu,+
y ama shumaq gobernar täkunëkita mana kaqpaq churëtsu.
Noqakunawan ruranqëki acuerduta yarpëkuy y ama ushakätsillëtsu.+
22 ¿Juk nacion nunakuna adorayanqan
mëqan santullapis tamyatsimuyta puëdinmantsuraq?
¿O ciëlupis kikinllapita tamyatsimuyta puëdinmantsuraq?
Jehovä Dioslläkuna, qamllam tsë rurëtaqa puëdinki.+
Awmi, qamllam tsë llapantaqa rurëta puëdinki. Tsëmi qamllaman confiakayämü.