2 Pëdru

1 Jesucristupa sirweqnin y apostolnin Simon Pëdrupita, Diosnintsik y Salvamaqnintsik Jesucristu allita ruraq kayanqanrëkur, noqakunanölla alläpa väleq alli yachatsikuykunata tarishqa kaqkunapaq:

2 Teyta Diosta y Señornintsik Jesusta alli reqiyanqëkipita, Teyta Dios masraq qamkunawan alli këkutsun y imëpis yamë kayänëkipaq yanapëkuyäshuy.+ 3 Teyta Diosta alli reqishqam, Teyta Diosqa llapan shonquntsikwan pëta sirwir kawanapaq wananqantsikta* poderninwan qaramarquntsik. Alläpa puëdeq y alläpa alli karmi, Diosqa noqantsikta akramarquntsik.+ 4 Tsëkunarëkurmi alläpa väleqta y alläpa allita änimarquntsik. Tsë änimanqantsikrëkur, kë munduchö nunakuna munayanqanta rurar* mana alli portakuyanqannö portakuyta dejashqa karnin,+ qamkunapis Teyta Diosnö kayänëkipaq.+

5 Tsërëkur llapan shonquykikunawan kallpachakuyë,+ markäkoq o yärakoq kayänëkipaq y allikunata rurayänëkipaq.+ Llapan shonquykikunawan kallpachakuyë, imatapis alli musyayänëkipaq+ y 6 controlakuyta yachayänëkipaq.+ Llapan shonquykikunawan kallpachakuyë, alli tsarakuyänëkipaq y llapan shonquykikunawan Teyta Diosta sirwiyänëkipaq.+ 7 Llapan shonquykikunawan kallpachakuyë, familianö estimanakuyänëkipaq y kuyakoq kayänëkipaq.+ 8 Tsënö kayanqëki qamkunachö cläru rikakuptinqa, Señornintsik Jesucristuta alli reqiyanqëkim, mana rurëyoq y mana wayoq plantanö mana kayänëkipaq yanapayäshunki.+

9 Pï nunapis tsëkunachö pishiparqa, aktsita mana rikänampaq nawinta wichqar*+ y unë ruranqan jutsankunapita* limpiashqana kanqanta qonqarmi, wisku o qapra cuenta këkan.+ 10 Tsëmi wawqikuna y panikuna, qayashqa y akrashqa kayanqëki mas següru kanampaq masraq kallpachakuyë.+ Tsëkunata imëpis rurarqa, manam creiyanqëkita imëpis dejayankitsu.+ 11 Tsënömi imawampis mana igualaq bendicionta chaskir, Señornintsik y Salvamaqnintsik Jesucristupa+ mana imëpis ushakaq Gobiernunman yëkuyanki.+

12 Tsëmi qamkuna musyayaptikipis y yachakuyanqëki rasumpa kaq yachatsikuykunachö alli patsakashqa këkäyaptikipis, tsëkunata imëpis yarpätsiyënikita munä. 13 Peru carpa* wayi cuenta cuerpüllachöraq këkanqäyaqqa,+ tsëkunata yarpätsiyarniki qamkunata yanapëtam allitanö rikä.+ 14 Señornintsik Jesucristu cläru musyatsimanqannömi, noqaqa alli musyä carpa* wayi cuenta cuerpü ichikllachöna ushakänampaq kaqta.+ 15 Ëwakunqächö tsëkunata kikikikuna yarpäyänëkipaqmi,* noqaqa llapan puëdinqämannö tsëkunata yarpätsiyänaqpaq imëpis kallpachakushaq.

16 Noqakunaqa manam nunakuna yuritsiyanqan mana rasumpa kaq cuentutanötsu, Señornintsik Jesucristupa podernimpita y pë këkämunampaq kaqpita willayarqaq, sinöqa kikïkuna chipapëkaqta rikashqa karmi.+ 17 Chipapäkuykaq Teyta Dios, “pëmi kuyë Tsurï, pëpaqmi alläpa kushikü” ninqanta wiyanqan kutim, pëqa respetashqa y alläpa väleqpaq churashqa këta Teyta Diospita chaskirqan.+ 18 Awmi, sagrädu jirkachö pëwan këkarmi, ciëlupita tsënö nimunqanta wiyayarqä.

19 Tsëmi Teyta Dios willakunqankuna cumplikänampaq kaqman mas markäkuntsik o yärakuntsik, y qamkunaqa allitam rurayanki, ampiraq o tsakëkaq* sitiuchö, patsa waranqanyaq y patsa waraq estrëlla yurimunqanyaq+ atsikyaq chiwchitanö shonquykikunachö tsëkunata katsirnin.+ 20 Qamkunaqa alli clärum musyayanki, Qellqarëkanqanchö Teyta Dios willakunqanqa ni mëqampis nunapa pensënimpita mana kanqanta. 21 Teyta Dios willakunqankunaqa manam imëpis nuna munaptintsu yurimushqa,+ sinöqa santu espïritu yanapaptinmi,* nunakunaqa Teyta Dios willakunqampita parlayarqan.+