1 Corintius
11 Noqapis Cristunö këta tïranqänö,+ qamkunapis noqanö këta tïrayë.
2 Llapan imëkachöpis yarpäyämaptiki y imëkatapis yachatsiyanqaqnölla rurayaptikim, qamkunata felicitäyaq.* 3 Peru musyayänëkitam munä, ollqukunapa dirigeqninqa Cristu kanqanta,+ warmikunapa dirigeqninna ollqu kanqanta+ y Cristupa dirigeqninna Dios kanqanta.+ 4 Pï ollqupis peqanta o umanta tsaparkur mañakoq o Teyta Dios musyatsikunqanta willakoqqa, dirigeqnintam penqakatsin, 5 peru pï warmipis peqanta o umanta mana tsaparkur mañakoq o Teyta Dios musyatsikunqanta willakoqqa,+ dirigeqnintam penqakatsin. Awmi, llapan aqtsanta rutushqa cuentam këkan. 6 Juk warmi peqanta o umanta mana tsapakurqa, aqtsantam ichikllanta rututsinan. Peru juk warmipa aqtsanta ichikllata o llapanta rutuyaptin penqakuypaq kaptinqa, peqantam tsapakunan.
7 Dios niraq kar y Dios alabashqa kanampaq yanapakurmi, ollquqa peqanta o umanta tsapakunantsu,+ peru warmiqa ollqu alabashqa kanampaqmi yanapakun. 8 Awmi, ollquqa manam warmipitatsu shamurqan,+ sinöqa warmim ollqupita shamurqan. 9 Y manam tsëllatsu, manam ollqutsu warmirëkur kamashqa karqan, sinöqa warmim ollqurëkur kamashqa karqan.+ 10 Tsëmi warmiqa qowampa o runampa* autoridäninchö kanqanta* rikätsikur y angelkunarëkur peqanchö o umanchö señalta apanan.+
11 Tsënö kaptimpis, Señorpa sirweqninkunachöqa, warmiqa manam ollqupita rakikashqatsu këkan ni ollqupis manam warmipita rakikashqatsu këkan. 12 Warmi ollqupita shamunqannöllam,+ ollqupis warmipita yurishqa. Peru llapampis Teyta Diospitam shamun.+ 13 Kikikikuna rikäyë, ¿allitaku warmi ruran peqanta o umanta mana tsapakurlla Diosman mañakur? 14 ¿Manaku nunakuna imanö rurashqa kayanqampis yachatsiyäshunki, ollqu jatun aqtsayoq kanqanqa penqakuypaq kanqanta, 15 peru warmi jatun aqtsayoq kanqanqa, alläpa shumaq kanqanta? Awmi, warmitaqa, peqanta o umanta tsapänampaqmi jatun aqtsayoq kananta Teyta Dios permitin. 16 Pï nunapis juk costumbripa favornin yarqur discutita munaptinqa, noqakunapaq y Diospa congregacionninchö kaqkunapaqqa manam juk costumbri kantsu.
17 Peru këkunata qamkunata yachatsiyarnikiqa, manam qamkunata felicitëkäyaqtsu.* Qamkuna juntakäyanqëkiqa, yanapayäshunëkipa rantinmi mana allita rurayäshunki. 18 Puntataqa, llapëki congregacionchö kaqkuna juntakarqa, rakikashqa këkäyanqëkitam musyarqö, y wakin wakintaqa creïmi. 19 Awmi, rasumpa kaqchöqa, Teyta Diospa rikëninchö pikuna alli këkäyanqan cläru rikakunampaqmi, qamkunachöpis sectakuna kanqa.+
20 Qamkuna juk sitiuchö juntakarqa, manam Señorpa Cënanta mikuyänëkipaqtsu juntakäyanki.+ 21 Awmi, Señorpa Cënata mikuyänëki kaptinqa, cada ünum puntallatana cënanta mikushqa, tsëmi juknin mallaq këkaptin, jukninqa machashqana këkan. 22 ¿Manaku wayikikuna kan tsëchö mikuyänëkipaq y upuyänëkipaq? ¿O Teyta Diospa congregacionninchö kaqkunata despreciarku imannaq kaqkunata penqakatsiyanki? ¿Imataraq qamkunata niyaqman?* ¿Felicitäyaqmanku? Tsë asuntuchöqa manam felicitäyaqtsu.
23 Noqaqa Señorpita chaskinqätam qamkunata yachatsiyarqaq:* Señor Jesusqa traicionashqa kanqan paqasmi tantata aptarkur,+ 24 Teyta Diosta agradecikuskir pakirirqan y kënömi nirqan: “Këqa, qamkunarëkur entreganäpaq kaq cuerpü cuentam.+ Noqata yarpämar këta rurar sïguiyë”.+ 25 Cenar usharirnam cöpawampis tsënölla rurarqan,+ y kënömi nirqan: “Kë cöpachö vïnuqa yawarnï välitsinqan+ mushoq acuerdu cuentam.+ Noqata yarpämar cada upur këta rurar sïguiyë”.+ 26 Kë tantata cada mikur y kë cöpapita cada upurmi, Señor shamunqanyaq, pë wanunqanta musyatsikur këkäyanki.
27 Tsëmi pï nunapis mana derëchuyoq këkar Señorpa tantanta mikoq y cöpampita upoqqa, Señorpa cuerpunta y yawarninta mana respetanqampita culpayoq kanqa. 28 Puntataqa tsëta ruranampaqnö o mana ruranampaqnö kanqanta musyanampaq kikinraq alli rikäkutsun,+ y tsëpitaraq tantata mikutsun y cöpapita uputsun. 29 Señorpa cuerpunta rikätsikunqanta mana musyëkar mikoq y upoqqa, kikinta condenakurmi mikuykan y upuykan. 30 Tsëmi qamkunapita mëtsikaq allitsu këkäyan y qeshyëkäyan y atskaqmi wanuyashqa o wañuyashqa.*+ 31 Peru imanö nuna kanqantsikta alli rikarqa, manam juzgashqatsu kashwan. 32 Tsënö kaptimpis, juzgashqa kashqaqa, kë munduchö nunakunawan mana condenashqa kanapaqmi,+ Teyta Jehovä* corregimantsik.+ 33 Tsëmi wawqilläkuna y panilläkuna, tsëta mikuyänëkipaq juntakarqa, jukniki juknikikuna shuyänakuyë. 34 Pï nunapis mallaqarqa, mikuyänëkipaq juntakar mana condenashqa kayänëkipaq, wayinchö mikutsun.+ Wakin asuntukunataqa, tsëman chämurnam kikï rikäshaq.