Lücas
19 Tsënam pëqa Jericöman chëkur tsë markapa pasëkarqan. 2 Tsëchömi Zaqueu jutiyoq rïcu nuna këkarqan. Pëqa impuestuta cobraqkunapa juk mandaqninmi karqan. 3 Pëmi Jesusta reqita munarqan, peru takshalla karmi mëtsikaq nunakuna kaptin rikëta puëdirqantsu. 4 Tsëmi ichikllachöna tsëpa pasanan kaptin, puntata cörripa ëwar Jesusta rikänampaq sicömoru plantaman lloqarqan o lätarqan. 5 Tsë sitiuman chëkurnam Jesusqa witsëpa rikëkur, “Zaqueu, jinan höra bajamuy, kananqa wayikichömi quedakushaq” nirqan. 6 Tsënam pëqa jinan höra bajamur alläpa kushishqa wayinchö posadatsirqan. 7 Tsëta rikëkurnam, “jutsata* ruraq nunapa wayinmanmi posadakoq yëkushqa”+ nir rimar qallëkuyarqan. 8 Peru Zaqueuqa sharkurmi* Señorta kënö nirqan: “Teytë, kapamanqampitam pullan kaqta waktsakunata qarëkushaq, y pitapis engañar* suwapanqä kaqtam chusku kuti masta kutitsishaq”.+ 9 Tsënam Jesusqa nirqan: “Pëpis Abrahanpa tsurin kaptinmi, kë nunapaq y familiampaq kanan salvacion chämushqa. 10 Awmi, Nunapa Tsurinqa oqrakashqanö këkaqkunata asheq y salvaqmi shamushqa”.+
11 Tsë ninqankunata wiyëkäyaptinmi, Jerusalenpa amänunchö karnin y Diospa Gobiernun illaqpita yurimunampaq kaqta pensayaptin, juk igualatsikuy masta pëkunata nirqan.+ 12 Kënömi nirqan: “Juk gobernaqpa tsurinmi karu markata ëwarqan,+ gobernaq kanampaq carguta chaskir kutimunampaq. 13 Y manaraq ëwakurmi chunka sirweqninkunata qayëkatsir, ‘kutimunqäyaq këkunawan negociuta rurëkäyë’+ nir chunka mïna* qellëta entregarqan. 14 Peru marka mayinkunaqa chikirmi, juk comisionta qepanta mandayarqan, ‘manam munayätsu kë nuna gobernamaqnïkuna kananta’ niyänampaq.
15 Gobernaq kanampaq carguta chaskeq ëwanqampita kutimurnam, sirweqninkunata qayatsirqan, entreganqan qellëwan* negociuta rurar ëkata ganayanqanta musyanampaq.+ 16 Punta kaqmi witïkur kënö nirqan: ‘Teytë, mïna qellënikiwanqa chunka mïna qellë mastam ganarqö’.+ 17 Tsënam gobernaqqa kënö nirqan: ‘¡Allitam rurarqunki, alli sirwipakoqmi kanki! Ichikllachöpis confiakuypaq kanqëkipitam, kananqa chunka markakunachö gobernaq kanki’.+ 18 Tsëpitanam ishkë kaq shamur kënö nirqan: ‘Teytë, mïna qellënikiwanqa pitsqa mïna qellë mastam ganarqö’.+ 19 Tsënam pëtapis, ‘qampis pitsqa markakunatam carguykichö katsinki’ nirqan. 20 Tsëpitanam juk mas shamur kënö nirqan: ‘Teytë, këchömi këkan päñuchö pakarätsinqä mïna qellëniki. 21 Noqaqa alläpa mana alli nuna kaptikim mantsarniki tsënö rurarqö. Qamqa bancuman mana churanqëkitam jipinki, y mana murunqëkitam cosechanki’.+ 22 Tsënam gobernaqqa kënö nirqan: ‘Kikiki ninqëkipitam juzgaq, mana alli sirwipakoq. ¿Rasumpaku musyarqëki alläpa mana alli nuna kanqäta, bancuman mana churashqa këkar jipinqäta y mana murushqa këkar cosechanqäta?+ 23 Tsëqa, noqa kutimur wachënintawan chaskinäpaq, ¿imanirtan qellënïta* bancuman churarqëkitsu?’.
24 Tsëpitanam tsëchö këkaqkunata, ‘katsinqan mïna qellëta, chunka mïna qellëyoq kaqta entreguëkuyë’+ nirqan. 25 Peru pëkunaqa, ‘¡teytë, pëqa chunka mïna qellëyoqnataq!’ niyarqanmi. 26 Tsënam pëqa kënö nirqan: ‘Qamkunatam këta nï:* imayoqpis kaqqa, mastam chakinqa, peru imannaq kaqqa, kapunqantapis oqranqam.+ 27 Y gobernaqninkuna kanäta mana munaq chikimaqnïkunata këman apamur puntächö wanutsiyë’”.
28 Tsënö nïkurmi Jesusqa Jerusalenman witsar sïguirqan. 29 Olïvus niyanqan jirkachö+ këkaq Betfaguëman y Betaniaman chëkarnam, ishkaq qateqninkunata mandarqan+ 30 kënö nir: “Rikëkäyanqëki caserïuman ëwayë. Tsëman charmi, manaraq ni pï montanqan malta ashnuta watarëkaqta tariyanki. Tsëta paskëkur noqaman apayämuy. 31 Pillapis, ‘¿imanirtan ashnuta paskëkäyanki?’ nir tapuyäshuptikiqa, ‘Señormi wanan’”* niyanki. 32 Tsënam qateqninkunaqa ëwarnin pë ninqantanölla llapantapis tariyarqan.+ 33 Ashnuta paskëkäyaptinnam tsë malta ashnupa duëñunkunaqa, “¿imanirtan tsë malta ashnuta paskëkäyanki?” nir tapuyarqan. 34 Tsënam pëkunaqa, “Señormi wanan”* niyarqan. 35 Tsënö nirmi tsë malta ashnuta Jesusman apayarqan, y janan kaq röpankunata tsë ashnuman karunarkurmi Jesusta montatsiyarqan.+
36 Pë ëwanqanmannömi, pëkunaqa janan kaq röpankunata näniman mashtayarqan.+ 37 Olïvus jirkapita uraq näniman chëkaptinnam, mëtsikaq qateqninkuna alläpa kushikur, milagrukuna ruraqta rikäyanqampita Teyta Diosta fuertipa alabar qallëkuyarqan. 38 Kënömi niyaq: “¡Bendicishqam Teyta Jehoväpa* jutinchö shamoq Gobernaqqa! ¡Nunakuna Dioswan yamë kayätsun, y ciëluchö këkaq alabashqa katsun!”.+ 39 Tsënam mëtsikaq nunakunawan këkaq wakin fariseukunaqa, “Maestru, qatiräshoqnikikunata corregi”+ niyarqan. 40 Pënam nirqan: “Qamkunatam këta nï,* pëkuna upälla quedakuyaptinqa, rumikunam fuertipa büllayanman”.
41 Jerusalenpa amänunman chëkurmi, Jerusalen markata rikëkur tsë markapaq waqarqan,+ 42 kënö nir: “Imata rurar yamë këta tarinëkipaq kaqta kanan junaq cuentata qokurqa..., peru kananqa tsëkunaqa qampita pakashqanam këkan.+ 43 Chëkämunnam chikiyäshoqnikikuna puntash qerukunata jawir entëruykipa cercayäshunëki junaqkuna. Awmi, entëruykiman churakëkurmi wakpa këpa sufritsiyäshunki.+ 44 Qampis y qamchö kawaq nunakunapis patsachömi ushayanki.+ Qamchö rumikunaqa manam perqarëkartsu quedayanqa.+ Tsëtaqa pasanki, imë tiempu juzgashqa këkanqëkita mana cuentata qokushqa karmi”.
45 Tsëpitanam templuman yëkur tsëchö rantikoqkunata qarqur qallëkurqan,+ 46 kënö nir: “Qellqarëkanmi: ‘Wayïtaqa mañakuyänan wayi nirmi reqiyanqa’,+ peru qamkunaqa suwakoqkunapa machëninmanmi tikratsiyarqunki”.+
47 Pëqa llapan junaqkunam templuchö yachatsikur këkarqan. Peru mandakoq sacerdötikuna, Ley qellqaqkuna y markachö reqishqa nunakunaqa wanutsitam o wañutsïtam munayarqan.+ 48 Peru wiyëta munarnin llapan nunakuna pëpa lädunchö imëpis kayaptinmi, tsëta rurëta puëdiyarqantsu.+