Romänus
14 Creikuyanqanchö manaraq firmi kaqkunata kushishqa chaskiyë,+ peru wakinkuna imatapis juknöpa rikäyanqantaqa* ama juzgayëtsu. 2 Capaz juk nunaqa creikunqanchö imanö këkanqanmannö imëkatapis mikun, peru capaz creikunqanchö manaraq firmi këkaq nunaqa verdürallata mikun. 3 Mikoq kaqqa, ama mana mikoq kaqta despreciatsuntsu, y mana mikoq kaqqa, ama mikoq kaqta penqapätsuntsu.*+ Teyta Diosqa kushishqam pëta chaskishqa. 4 ¿Pitan qam kanki jukpa sirweqninta juzganëkipaq?+ Patronnimpaqmi shëkan* o ishkishqapis këkan.+ Rasumpa kaqchöqa, Teyta Jehovä* shëkaqta katsita puëdiptinmi shëkanqa.
5 Juk nunam, juk junaqta wakin junaqpita mas väleqtanö rikan,+ juknam mëqan junaqtapis wakin junaqtanölla igualpa rikan.+ Cada nuna imanir tsënö pensanqanta alli següru katsun. 6 Juk junaqta mas väleqtanö rikaqqa, Jehovärëkurmi* väleqtanö rikëkan. Tsënöllam mikoq kaqpis, Teyta Diosta agradecikushqa karnin Jehovärëkur* mikun,+ y mana mikoq kaqpis, Teyta Jehovärëkurmi* mikuntsu, peru tsënö kaptimpis Teyta Diostam agradecikun.+ 7 Rasumpa kaqchöqa, manam mëqantsikpis kikintsikllapaqtsu kawantsik,+ y manam mëqantsikpis kikintsikllapaqtsu wanuntsik o wañuntsik. 8 Kawarpis, Teyta Jehoväpaqmi*+ kawantsik, y wanurpis, Jehovä* Diospaqmi wanuntsik o wañuntsik. Tsëmi kawarpis o wanurpis, Teyta Jehoväpa*+ kantsik. 9 Kërëkurmi Cristuqa wanurqan y kawamurqan: wanushqakunapa y kawëkaqkunapa Señornin kanampaq.+
10 Peru ¿imanirtan creikoq mayikita juzganki?+ ¿O imanirtan creikoq mayikita desprecianki? Llapantsikmi Teyta Diospa cortinchö këkäshun.+ 11 Kënömi qellqarëkan: “Teyta Jehovämi* këta nin: ‘Noqa rasumpa kawanqänöllam,+ llapan nunakuna puntäman qonqurikayämunqa y llapan nunakunam alabamar Dios kanqäta niyanqa’”.+ 12 Awmi, parlanqantsikpita y ruranqantsikpitam, Teyta Diosqa cada ünuta juzgamäshun.+
13 Tsëmi amana juknintsik juknintsik juzganakushunnatsu.+ Tsëpa rantinqa, creikoq mayikikunapa puntanman ima ishkitsikoqta o atäjuta mana churayänëkipaq kallpachakuyë.+ 14 Noqaqa musyämi, y Señor Jesuschömi tsëpita següru këkä, imapis kikinllapitaqa mana limpiu mana kanqanta. Sinöqa juk nuna imatapis mana limpiutanö rikaptinllam, pëpaq mana limpiu tikran.+ 15 Tsëmi imatapis mikunqëkirëkur creikoq mayiki mana alli sientikuptinqa, manam kuyakoq kanqëkitanatsu rikätsikuykanki.+ Ama creikoq mayikipaq Cristu wanushqa këkaptin, imatapis mikunqëkirëkur creikoq mayikita ushakätsitsu.+ 16 Tsëqa, ama permitiyëtsu qamkuna allita rurayanqëkipita qamkunapaq mana allita parlayänanta. 17 Manam imata mikunqampita o imata upunqampitatsu juk nunaqa Diospa Gobiernunman yëkunqa,+ sinöqa santu espïritu yanapaptin alli kaqta ruranqampita, jukkunawan yamë kawakunqampita y kushishqa kanqampitam. 18 Pï nunapis sirwipakoq cuenta Cristuta tsënö sirweqqa, Teyta Diostam kushitsin, y nunakunapa rikëninchöpis allim këkan.
19 Tsëqa yamë kanapaq yanapakoq kaqkunata+ y juknintsik juknintsik mas markäkunapaq o yärakunapaq yanapakoq kaqkunata rurar këkäshun.+ 20 Amana mikunqëkirëkurqa Teyta Dios ruranqanta ushakätsitsu.+ Rasunmi llapan mikuypis limpium, peru mikunqan pitapis ishkitsiptinqa alläpa mana allim.+ 21 Ëtsata mana mikunqëki, vïnuta mana upunqëki y creikoq mayikita ishkitsinan kaptinqa imatapis mana ruranqëkim mas alliqa.+ 22 Creikunqëkiqa, Teyta Diospa rikëninchö qamllapaq katsun. Imatapis allitanö rikanqampita kikinta mana condenakoq nunaqa kushishqam kakun. 23 Peru dudëkar mikurqa, ruranqan alli kanqanta mana següru këkar* mikurmi condenashqa këkan. Rasumpa kaqchöqa, imatapis mana creikar rurëqa jutsam.*