Levïticu

22 Tsëpitanam Teyta Jehoväqa Moisesta kënö nirqan: 2 “Aarontawan tsurinkunatam ninëki, israelïtakuna noqapaq apayämunqan sagrädu qarëkunata respetayänampaq,+ mana tsënö rurarqa, limpiu jutïtam respetëkäyanqatsu.+ Noqam Jehovä Diosnikikuna kä. 3 Këtapis ninki: ‘Mëqan tsurikipis rikënïpaq mana limpiu këkar, noqa Jehoväpaq israelïtakuna apayämunqan sagrädu qarëkunaman witiptinqa, wanutsiyänanmi o wañutsiyänanmi.+ Noqam Jehovä Diosnikikuna kä. 4 Aaronpa mëqan tsurimpis leprayoq karnin+ o ishpakunampita esquy* yarquptinqa,+ rikënïpaq limpiu kanqanyaqmi sagrädu qarëkunata mikunantsu.+ Tsënöllam ayata yatashqa karnin+ o ishpakunampita lichin yarquptimpis,+ tsë qarëkunata mikunantsu. 5 Grüpu grüpu pureq mana limpiu animalkunata+ o imarëkurpis noqapa rikënïpaq mana limpiu këkaq nunata yataqkunapis,+ manam tsë qarëkunata mikuyänantsu. 6 Tsëkunata yataq kaqkunaqa, tardiyanqanyaqmi rikënïpaq limpiutsu kayanqa, y bañakur-ran sagrädu qarëkunata mikuyanqa.+ 7 Y inti o rupay jeqarkuptinran rikënïpaq limpiu kayanqa, y pëkunapaq kaq sagrädu qarëkunata mikuyanqa.+ 8 Rikënïpaq limpiu kayänampaqmi, wanushqa animalta o chukaru animal katunqan ëtsataqa mikuyänantsu.+ Noqam Jehovä Diosnikikuna kä.

9 Pëkunaqa llapan mandakunqätam cumpliyänan. Tsëta rurarqa sagrädu qarëkunata respetarmi jutsa* rurëman chäyanqatsu ni wanuyanqatsu. Noqam Jehovä Diosnikikuna kä, limpiu sirwimaqnïkuna kayänëkipaqmi akrarqö.*

10 Sacerdötipa mana familian kaqkunaqa, manam sagrädu qarëkunata mikuyänantsu. Tsënöllam sacerdötita watukëkaq forastërukuna ni sacerdötipaq trabajaqkunapis tsë sagrädu qarëkunata mikuyänantsu.+ 11 Tsënö kaptimpis, sacerdöti rantinqan sirweqkunaqa, mikuyta puëdiyanqam. Tsënöllam sacerdötipa wayinchö yurikoq sirweqninkunapis mikuyta puëdiyanqa.+ 12 Sacerdötipa warmi tsurin mana sacerdöti nunawan casakurninqa, manam sagrädu qarëkunata mikuyta puëdinqatsu. 13 Sacerdötipa warmi tsurin wamrannaqlla viudayar o divorciakur papäninman kutirqa, papänin mikunqan sagrädu qarëkunata mikuyta puëdinqam.+ Peru sacerdötipa mana familian kaqkunaqa, manam tsë qarëkunata mikuyänantsu.

14 Pï nunapis sagrädu qarëkunata pantarnin mikurqa, mikunqantam sacerdötita kutitsinan, y tsëmanmi ichik masta yapanan.*+ 15 Sacerdötikunaqa, israelïtakuna noqa Jehoväpaq apayämunqan qarëkunatam respetayänan.+ 16 Tsënöpa sagrädu qarëkunata mikurnin israelïtakuna mana castigashqa kayänampaq. Noqam Jehovä Diosnikikuna kä, y limpiu sirwimaqnïkuna kayänëkipaqmi akrarqö’”.*

17 Tsëpitanam Teyta Jehoväqa Moisesta kënö nirqan: 18 “Aarontawan tsurinkunata y llapan israelïtakunatam këta ninëki: ‘Qamkuna o qamkunawan kawaq forastërukuna, Teyta Jehoväta äniyanqëkita cumplirnin ushakanqanyaq rupatsina qarëta aparqa+ o kikikikuna munarnin Teyta Diospaq qarëta aparqa,+ 19 Teyta Diospa rikëninchö alli kayänëkipaqmi sänu töruta,+ mallwa carnëruta o mallwa chïvuta* apayänëki. 20 Apayanqëki animalkuna mana sänu kaptinqa,+ manam Teyta Diosnintsik qarënikikunata chaskinqatsu.

21 Teyta Jehoväta äninqanta cumplirnin, pillapis Teyta Dioswan amïgu kanqanta rikätsikoq+ qarëta aparqa o kikin munarnin Teyta Diospaq qarëta aparqa, sänu töruta o wäkata, üshata o cabratam apanan. Tsë animalkunaqa sänum kayänan. 22 Teyta Jehoväpaq qarëta aparqa, manam wiskuta o qaprata, pakikushqata, roqukushqata, tiktiyoqta, tsakishqa qeriyoqta o qarachayoqta apayänëkitsu. Tsënö animalkunataqa manam altarchö Teyta Jehoväpaq rupatsiyänëkitsu. 23 Kikikikuna munarnin Teyta Diospaq qarëta aparqa, juknin chakin o juknin makin taksha o jatun kaptimpis puëdiyankim töruta o üshata apëta, peru änikuyanqëkita cumplirnin tsë animalkunata apayaptikiqa, manam Teyta Diosnintsik chaskiyäshunkitsu. 24 Teyta Jehoväpaq qarëta aparqa, manam runtun dañashqa, runtun lapishqa, capashqa o runtun roqushqa animalta apayänëkitsu. Manam tsënö animalkunataqa Teyta Diospaq apayänëkitsu. 25 Tsë animalkuna dañakushqa y mana sänu kayaptinmi, qamkunawan këkaq forastërukunapis Teyta Diospaq mikuy qarëtanö apayänantsu. Tsënö animalkunata apayaptikiqa, manam Teyta Diosnintsik qarënikikunata chaskinqatsu’”.

26 Tsëpitanam Teyta Jehoväqa Moisesta kënö nirqan: 27 “Wäkapa, üshapa o cabrapa wawan yuriptinqa, qanchis junaqpam mamanwan kanan.+ Y puwaq kaq junaqqa, noqa Jehoväpaq rupatsiyänampaqmi apamuyta puëdiyanki. 28 Ama wäkata y wawanta o üshata y wawanta tsë junaqlla pishtayankitsu.+

29 Noqa Jehoväta agradecikurnin qarëta apamurqa,+ chaskinäpaqnö kaqtam apayämunëki. 30 Tsë animalkunapa ëtsantaqa apayämunqëki junaqllam mikuyänëki, y manam waränin junaqpaq sobratsiyänëkitsu.+ Noqam Jehovä Diosnikikuna kä.

31 Qamkunaqa llapan mandakunqätam cumpliyänëki y cäsukuyänëki.+ Noqam Jehovä Diosnikikuna kä. 32 Limpiu jutïtam imëpis respetayänëki,+ limpiu Dios kanqätam imëpis yarpäyänëki.+ Noqam Jehovä Diosnikikuna kä, y limpiu sirwimaqnïkuna kayänëkipaqmi akrarqö.*+ 33 Qamkunapa Diosnikikuna kanäpaqmi, Egiptu nacionpita qamkunata pushamurqä.*+ Noqam Jehovä Diosnikikuna kä”.