Marcus
11 Juk kutinam Jerusalenman chëkarna, Olïvus jirkachö këkaq Betfaguëman y Betaniaman+ chëkur Jesusqa ishkaq qateqninkunata mandarqan+ 2 kënö nir: “Rikëkäyanqëki caserïuman ëwayë. Tsëman charmi, manaraq ni pï montanqan malta ashnuta watarëkaqta tariyanki. Tsëta paskëkur noqaman apayämuy. 3 Pillapis, ‘¿imatataq rurëkäyanki?’ nir tapuyäshuptikiqa, ‘Señormi wanan,* rasllam o sasllam kutiratsimunqa’ niyanki”. 4 Tsënam ëwarnin cälli kuchunchö këkaq wayipa punkun lädunchö watarëkaq malta ashnuta tariskir paskayarqan.+ 5 Peru tsëchö këkaqkunapita wakinmi, “¿imanirtan tsë malta ashnuta paskëkäyanki?” nir tapuyarqan. 6 Y qateqninkunaqa Jesus ninqannöllam tsë nunakunata contestayarqan, tsënam pëkunaqa ëwakuyänanta dejayarqan.
7 Tsë malta ashnutam Jesusman apayämurqan,+ y janan kaq röpankunata tsë ashnukunaman karunarkuyaptinmi Jesusqa malta ashnu jananman montarkurqan.+ 8 Mëtsikaqmi janan kaq röpankunata näniman mashtayarqan, y wakinnam chakrakunachö palmërakunapa rämankunata mutuskir mashtayarqan.+ 9 Puntanta y qepanta ëwaqkunam fuertipa kënö niyaq: “¡Salvëkunëkipaqmi rogakuyaq!+ ¡Bendicishqam Teyta Jehoväpa* jutinchö shamoqqa!+ 10 ¡Bendicishqam shamoq Gobiernuqa, teytantsik Davidpa Gobiernun!+ ¡Salvëkunëkipaqmi rogakuyaq, qamta ciëluchö këkaqta!”. 11 Y Jerusalenman chëkurnam templuman ëwar tsëchö imëka këkaqkunata rikarqan, peru alläpa tardina kaptinmi, döci apostolninkunawan Betaniata ëwakurqan.+
12 Waränin junaq Betaniapita yarquykäyaptinmi pachan mallaqaskirqan.+ 13 Y atska raprayoq hïgus plantata karupita rikarmi, juk ishkë frütanllatapis tarita munar tsëman ëwarqan, peru chëkurqa hïgus wayunan tiempu manaraq kaptinmi imatapis tarirqantsu, sinöqa rapranllatam. 14 Tsëmi, “kanampitaqa ama ni pï frütëkita mikutsunnatsu”+ nirqan. Tsënö ninqantaqa qateqninkunapis wiyayarqanmi.
15 Jerusalenman chëkurnam, Jesusqa templuman yëkur tsëchö rantikoqkunata y rantipakoqkunata qarqur qallëkurqan. Qellëta cambiaqkunapa mësankunata y palumata rantikoqkunapa bancunkunatam jitar usharqan.+ 16 Y manam permitirqantsu templupa imatapis pasatsiyänanta. 17 Tsëpitanam nunakunata kënö yachatsir karqan: “¿Manaku kënö qellqarëkan: ‘Wayïtaqa llapan nacionpita nunakuna mañakuyänan wayi nirmi reqiyanqa’?+ Peru qamkunaqa suwakoqkunapa machëninmanmi tikratsiyarqunki”.+ 18 Tsënö ninqanta musyëkurnam mandakoq sacerdötikuna y Ley qellqaqkunaqa, imëkanöpa wanutsita o wañutsita munayarqan.+ Awmi, imanö yachatsikunqanta wiyar nunakuna alläpa espantakuyaptinmi pëta mantsayarqan.+
19 Inti o rupay jeqanan höranam, Jesuswan qateqninkunaqa tsë markapita ëwakuyarqan. 20 Y waränin junaq tempränulla hïgus planta kaqpa pasëkarnam, pasëpa* tsakishqatana rikäyarqan.*+ 21 Tsënam Pëdruqa Jesus ninqanta yarparnin, “¡Maestru, rikë! Maldicinqëki hïgus plantaqa tsakirishqam” nirqan.+ 22 Tsënö niptinnam Jesusqa kënö nirqan: “Teyta Diosman markäkuyë o yärakuyë. 23 Noqam qamkunata nï,* pillapis mana dudar y rurakänampaq kaqman markäkur o yärakur kë jirkata, ‘sharkur lamarman jeqarkuy’ niptinqa, ninqannömi pasanqa.+ 24 Tsëmi qamkunata nï,* Teyta Diosta imatapis mañakurqa, chaskiyänëkipaq kaqman markäkuyë o yärakuyë, tsëqa chaskiyankim.+ 25 Y shëkar* mañakuykarqa, ciëluchö këkaq Teytëkikuna mana allikunata rurayanqëkipita perdonayäshunëkipaq, qamkunapis imatapis rurayäshoqnikikunata perdonayë”.+ 26 *
27 Tsënam Jerusalenman yapë chäyarqan. Y templupa patiunchö purikaptinmi, mandakoq sacerdötikuna, Ley qellqaqkuna y markachö dirigeqkuna shamur 28 kënö tapuyarqan: “¿Ima derëchuwantan tsëkunata ruranki? ¿Pitan tsëkunata ruranëkipaq nishurqunki?”.+ 29 Tsënam Jesusqa kënö nirqan: “Noqapis jukta tapuyashqëki. Tsëta contestayämaptikiqa, noqapis niyashqëkim ima derëchuwan tsëkunata ruranqäta. 30 Mä niyämë, ¿pitan Juanta mandarqan nunakunata bautizanampaq?+ ¿Teyta Diosku, o nunakunaku?”.+ 31 Tsënam pëkunaqa tsëman pensar kënö ninakuyarqan: “‘Teyta Diosmi’ nishqaqa, ‘tsëqa, ¿imanirtan pëta creiyarqëkitsu?’ nimäshunmi. 32 O, ‘nunakunam mandayarqan’ nintsikku, peru ¿pitan tsëta nita valuranman?”. Tsënöqa niyarqan nunakunata mantsarmi. Nunakunaqa Diospa willakoqnin kanqantam Juanpaq niyaq.+ 33 Tsëmi Jesusta contestar, “manam musyayätsu” niyarqan. Tsënam Jesusqa nirqan: “Tsëqa manam noqapis niyashqëkitsu ima derëchuwan tsëkunata ruranqäta”.