Apocalipsis
14 Tsëpitanam Orqu* Üshata+ Sion jirkachö shëkaqta* rikarqä,+ y pëwanmi jutinta y Teytampa jutinta urkunkunachö qellqashqata katseq+ cientu cuarenta y cuatru mil nunakuna+ këkäyarqan. 2 Y ciëlupita shamoq büllatam wiyarqä, y mëtsika yaku büllaqnö y fuertipa räyoqnömi karqan. Tsë wiyanqä büllaqa, arpankunata tocar cantaqkuna büllayanqannömi karqan. 3 Pëkunaqa gobernar täkunapa, chuskun querubinkunapa+ y gobernaqkunapa+ puntanchömi mushoq canciontanö cantëkäyan.+ Tsë canciontaqa manam ni pï alli yachakuyta puëdirqantsu, sinöqa patsapita rantishqa cientu cuarenta y cuatru mil nunakunallam.+ 4 Pëkunaqa manam warmikunawan oqllanakur melanëpaqkunata rurayashqatsu. Awmi, pëkunaqa manam piwampis oqllanakuyashqatsu,+ y mëpa ëwaptimpis Orqu* Üshapa qepantam ëwayan.+ Pëkunaqa puntata wayunqannömi, Teyta Diospaq y Orqu Üshapaq nunakunapita+ rantishqa kayashqa,+ 5 y manam engañakurtsu parlayarqan, y manam imachöpis pishipäyarqantsu.+
6 Tsëpitanam ciëlupa chowpinchö* volëkaq angelta rikarqä. Tsë angelqa patsachö kawaqkunata, awmi, llapan nacionkunata, kastakunata, idiömakunata y markakunata willanampaqmi, mana imëpis ushakaq alli noticiakunata katsirqan.+ 7 Pëqa fuertipam kënö nikarqan: “Teyta Diosta respetayë* y punta puntaman churayë, nunakunata juzganan höram chämushqa.+ Tsëmi ciëluta, patsata, lamarta+ y pukyukunata* kamaqta adorayë”.
8 Tsëpitanam juk angelna kënö nir shamurqan: “¡Venciriyashqam!+ ¡Alläpa Puëdeq Babiloniatam venciriyashqa!+ Pëqa entëru patsachö nacionkunatam vïnunta uputsishqa. Tsë vïnuqa oqllanakur melanëpaqkunata rurëta* löcuyëpa munanqanmi”.+
9 Tsëpitanam juk mas angelna pëkunapa qepanta fuertipa kënö nir shamurqan: “Pï nunapis mantsëpaq chukaru animalta+ y tsë animal niraq santuta adorar, y urkunchö o makinchö marcata chaskirqa,+ 10 Teyta Diospa cöleranta katseq cöpachömi, mana imawampis takushqata Teyta Diospa cöleran vïnuta upunqa,+ y limpiu angelkunapa y Orqu* Üshapa rikëninchömi, ninawan y azufriwan+ sufrir kanqa. 11 Sufrir këkäyanqampita yarqamoq qoyëqa o qoshniqa manam imëpis ushakanqatsu.+ Y mantsëpaq chukaru animalta y tsë animal niraq santuta adoraqkuna, y jutimpa marcanta chaskeqkunaqa,+ manam paqaspa junaqpapis jamayanqatsu. 12 Tsëmi Teyta Dios mandakunqanta cäsukoq, y Jesusman markäkuyanqannö o yärakuyanqannö+ kawaq limpiu nunakunaqa alli tsarakuyänan”.+
13 Y ciëlupita kënö neqtam wiyarqä: “Këta qellqë: kushikuyätsun kanan tiempupita Señorpa qateqnin këkar* wanoqkuna.+ Awmi, espïritum nin imëkata rurayanqampita jamayänampaq. Pëkuna rurayanqanqa pëkunawan juntum ëwakun”.
14 Tsëpitanam yuraq pukutëta rikarqä, y tsë pukutëchömi nunapa tsurin niraq tëkarqan.+ Peqanchöqa o umanchöqa örupita corönatam katsirqan, y makinchönam fïlu ösita aptarëkarqan.
15 Tsënam juk angelna templupita* yarqamur pukutëchö tëkaqta fuertipa kënö nirqan: “Cosëcha witsanmi chäramushqa, ösikiwan cosechar qallë. Patsachö cosëchaqa poqunam këkan”.+ 16 Tsënö niptinnam, pukutë jananchö tëkaqqa patsachö cosëchaman ösinta yakarqan, y entëru patsachö cosëcham cosechashqa karqan.
17 Tsëpitanam juk mas angelna ciëluchö këkaq templupita yarqamurqan y pëpis fïlu ösitam aptarëkarqan.
18 Y altarpitam ninata autoridäninchö katseq juk angel mas yarqamurqan. Y fïlu ösita këkätseqtam fuertipa kënö nirqan: “Üvaskunaqa poqunam këkäyan, fïlu ösikiwan patsachö üvas sartakunata juntë”.+ 19 Tsënö niptinnam angelqa ösinta patsaman yakarnin, patsachö üvas plantakunata roqurkur, Teyta Diospa cöleranta rikätsikoq jatun pözunman jitarkurqan.+ 20 Tsë pözuchö üvastaqa markapita waqtachömi jaruyarqan, y tsë pözupita yarqoq yawarqa doscientus noventa y seis kilömetrusyaqnömi,* cawallukunapa jäkimanyaq charqan.