Colosensis
4 Patronkuna, qamkunapapis ciëluchö Patronnikikuna kanqanta yarpar, sirwiyäshoqnikikunata alli kaqta rurar y igualpa tratayë.+
2 Teyta Diosman imëpis mañakuyë+ y tsëta rurar alkäbu alkäbu këkäyë, y imëpis agradecikuyë.+ 3 Tsënölla noqakunapaqpis mañakuyë,+ y willakuyänäta permitïkayämänampaq Teyta Diosman mañakuyë, tsënöpa Cristupita pakarëkaq sagrädu noticiata willakuyänäpaq, tsërëkurmi noqaqa prësu këkä.+ 4 Tsënölla ruranäpaq kaqnölla, tsëkunata cläru willakunäpaqpis mañakuyë.
5 Congregacionchö kaqkunawan mana këkarqa shumaq yachëwan portakuyë, y tiempuykikunata alli provechayë.*+ 6 Parlakuyanqëkiqa kachitashqanö imëpis shumaq katsun,+ tsënöpa cada nunata imanö contestëta yachayänëkipaq.+
7 Kuyë wawqï, confiakuypaq sirwipakoq y Señorpa kaqchö sirwipakoq mayï Tïquicum,+ noqa imanö këkanqäta willayäshunki. 8 Imanö këkäyanqäta musyayänëkipaq y shonquykikunata shoqanampaqmi, pëta qamkunaman mandëkämü. 9 Pëqa, confiakunqä y kuyë wawqï marka mayikikuna Onësimuwan+ juntum shamunqa. Pëkunam këchö llapan pasakuykanqanta willayäshunki.
10 Prësu mayï Aristarcum+ salüdunta apatsikamun, y Bernabëpa prïmun Marcuspis+ (pë shamuptinqa, noqakuna mandayanqaqnölla shumaq chaskiyë),+ 11 y Justu nir reqiyanqan Jesuspis. Pëkunaqa ishpakuyänampa puntanchö señalakushqam kayan. Pëkunallam Diospa Gobiernunrëkur imëkachö yanapamaqnïkuna kayan, y pëkunaqa alläpam shoqayämashqa.* 12 Cristu Jesuspa sirweqnin marka mayikikuna Epafrasmi+ salüdunta apatsikamun. Pëqa llapan shonqunwanmi qamkunapaq imëpis mañakun, tsënöpa poqu* nuna kar firmi këkäyänëkipaq y Teyta Dios ruramunampaq kaqkunapita imëpis següru këkäyänëkipaq. 13 Noqaqa musyämi,* qamkunarëkur, Laodicëachö këkaqkunarëkur y Hieräpolischö këkaqkunarëkur alli trabajëkanqanta.
14 Kuyë doctor Lücas+ y Dëmasmi+ salüdunkunata apatsikayämun. 15 Laodicëachö wawqikunaman y panikunaman, Ninfaman y wayinchö juntakaqkunaman salüdüta chëkatsiyë.+ 16 Kë cartata leyirqa, Laodicëa congregacionchöpis leyiyänampaq tsë cartata pëkunaman apatsiyë,+ y qamkunapis Laodicëa congregacionchö kaqkunapaq cartata leyiyë. 17 Y Arquïputa+ “Señorpita chaskinqëki trabäjuta cumplinëkipaq, llapan puëdinqëkimannö kallpachakuy” niyë.
18 Noqa Pablum, kikïpa makïwan kë salüdüta qellqamü.+ Yarpäyë carcelchö cadenarëkanqäta.+ Teyta Dios qamkunawan alläpa alli këkutsun.