Juan
9 Pasëkarmi wisku o qapra yurishqa nunata rikëkurqan. 2 Tsënam qateqninkunaqa kënö tapuyarqan: “Maestru,+ ¿pitan jutsata* rurarqan kë nuna wisku o qapra yurinampaq, kikinku o papäninkunaku?”. 3 Jesusnam nirqan: “Manam kë nunatsu ni papäninkunatsu jutsata* rurayashqa, këqa pasashqa pëpa cäsunchö Teyta Dios rurëta puëdinqanta rikäyänampaqmi.+ 4 Junaqllaraq këkaptinmi,+ mandamaqnï munanqantaqa ruranantsik. Paqasyäriptinqa manam ni pï trabajëta puëdinnatsu. 5 Nunakunawanraq këkarqa, noqam rikäyänampaq nunakunata yanapaq aktsinö kä”.+ 6 Tsëta nirirmi patsaman toqëkur toqaninwan mituta rurarqan. Tsëpitanam tsë nunapa nawinman llushïkur+ 7 kënö nirqan: “Siloam jatun pözuman awikoq* ëwë” (Siloamqa “mandashqa kaq” ninanmi). Tsënam pëqa ëwar yakuwan awikurqan,* y kutiramurqa rikarqannam.+
8 Tsënam vecïnunkuna, y limushnata mañakoqta rikashqa kaqkunaqa, “pëqa limushnata mañakur täkoq nunam ¿aw?” nirnin parlar qallëkuyarqan. 9 Wakinmi, “pëmi” niyaq. Wakinnam, “manam pëtsu, peru pë niraqmi” niyaq. Tsë nunanam, “awmi, noqam kä” neq. 10 Tsënam “¿imanöpatan kananqa rikankina?” nir tapuyarqan. 11 Pënam nirqan: “Jesus niyanqan nunam mituta rurëkur nawïta llushiramur, ‘Siloamchö këkaq yakuman awikoq* ëwë’ nimarqan.+ Tsëmi ëwar yakuwan awikurqä, y tsënöpam kananqa rikäna”. 12 Tsënö niptinnam, “¿mëchötan tsë nuna këkan?” nir tapuyarqan. Pënam, “manam musyätsu” nirqan.
13 Tsënam wisku o qapra kashqa nunata fariseukunaman apayarqan. 14 Mituta rurëkur tsë nunapa nawinta Jesus alliyätsinqan+ junaqqa säbadum karqan.+ 15 Tsënam fariseukunapis nawin imanö alliyashqa kanqanta tapuyarqan. Pënam nirqan: “Mituwan nawïta llushiramuptinmi awikoq* ëwarqä, tsëmi kananqa rikäna”. 16 Tsënam wakin fariseukunaqa niyarqan: “Kë nunataqa manam Diostsu mandamushqa, pëqa manam säbadu junaqta respetantsu”.+ Wakinnam, “¿imanötan jutsata* ruraq nunaqa tsënö milagrukunata ruranman?”+ niyaq. Tsënömi kikinkunapura acuerdutsu kayarqan.+ 17 Yapëmi wisku o qapra kashqa nunata kënö niyarqan: “Nawikita alliyätsimushqa këkaptinqa, qamqa, ¿ima ninkitan pëpaq?”. Tsë nunanam, “pëqa Diospa willakoqninmi” nirqan.
18 Tsënö kaptimpis, tsë nunapa papäninkunata qayatsiyanqanyaqmi, judïukunaqa creiyarqantsu tsë nuna wisku o qapra këkar kananqa allina rikanqanta. 19 Y papäninkunatam kënö tapuyarqan: “¿Këku wisku o qapra yurinqanta niyanqëki wamrëkikuna? Tsëqa, ¿imanöpatan kananqa rikanna?”. 20 Tsënam papäninkunaqa kënö niyarqan: “Awmi, pëqa wamräkunam, wiskum o qapram yurirqan. 21 Peru kanan imanöpa rikanqantaqa o nawinta pï alliyätsishqa kanqantaqa, manam musyayätsu. Kikinta tapuyë, pëqa mayor nunanam, kikinnam imatapis ninan”. 22 Judïukunata mantsarmi papäninkunaqa tsënö niyarqan.+ Judïukunaqa pï nunapis Jesuspaq Cristu kanqanta niptinqa, Diosta adorayänan wayipita qarquyänampaqmi+ ninakushqana kayarqan. 23 Tsëmi teytankunaqa, “pëqa mayor nunanam, kikinta tapuyë” niyarqan.
24 Tsëmi wisku o qapra kashqa nunata yapë qayëkur kënö niyarqan: “Diospa rikëninchö rasumpa kaqta niyämë. Noqakunaqa musyayämi tsë nunaqa jutsa* ruraq kanqanta”. 25 Tsënam pëqa nirqan: “Jutsa* ruraq kanqantaqa manam musyätsu. Peru këtam sïqa musyä, noqaqa wiskum o qapram karqä, peru kananqa rikänam”. 26 Tsënö niptinnam, “¿imatataq rurashurqunki? ¿Imanötan nawikita alliyätsimushqa?” nir tapuyarqan. 27 Tsënam pëqa kënö nirqan: “Tsëtaqa niyarqoqnam, peru qamkunaqa manam cäsuyämarqunkitsu. ¿Imanirtan yapëraq wiyëta munayanki? Manachi qamkunapis qateqnin këtatsu munëkäyanki, ¿aw?”. 28 Tsënö niptinnam pëkunaqa despreciar kënö niyarqan: “Qammi tsë nunapa qateqninqa kanki, noqakunaqa Moisespa qateqninmi kayä. 29 Noqakunaqa musyayämi Moisesta Dios parlapanqanta, peru kë nuna mëpita yurimunqantaqa manam musyayätsu”. 30 Tsë nunanam kënö nirqan: “Tsëmi sïqa mana creipaqnö: pë nawïta alliyätsimushqa këkaptin, ¿manaku musyayanki mëpita yurimunqanta? 31 Musyantsikmi jutsata* ruraqkunataqa Teyta Dios mana wiyanqanta,+ peru pëta respetaqta y munanqanta ruraqtaqa, Teyta Dios wiyanmi.+ 32 Pï nunapis wisku o qapra yurishqa nunapa nawinta alliyätsishqa kanqantaqa, manam imëpis wiyashqantsiktsu. 33 Teyta Dios kë nunata mana mandamushqa kaptinqa, manachi ima rurëtapis puëdinmantsu”.+ 34 Tsënö niptinnam, “qamqa, mëtsika jutsayoq* yurishqa këkarku, ¿noqakunata yachatsiyämëta munanki?” nir qarquskiyarqan.+
35 Qarqushqa kayanqanta wiyarnam Jesusqa pëwan tinkur, “¿markäkunkiku o yärakunkiku Nunapa Tsurinman?” nir tapurqan. 36 Tsënam pëqa, “¿pitan pëqa teytë? Willëkamë pëman markäkunäpaq o yärakunäpaq” nirqan. 37 Jesusnam, “qamqa rikarqunkinam, y kanan höram pëwan parlëkanki” nirqan. 38 Tsënam pëqa, “noqaqa pëman markäkümi o yärakümi teytë” nir respetarnin puntanman qonqurikurqan. 39 Jesusnam nirqan: “Noqaqa nunakuna juzgashqa kayänampaqmi shamurqö: mana rikaqkuna, rikäyänampaq,+ y rikaqkunaqa, wisku o qapra tikrayänampaq”.+ 40 Tsënam pëwan këkaq fariseukunaqa ninqankunata wiyar, “¿noqakunapis wisku o qapra kayanqätaku pensanki?” niyarqan. 41 Tsënö niyaptinnam Jesusqa kënö nirqan: “Wisku o qapra karqa, manam jutsayoqtsu* kayankiman. Peru ‘noqakunaqa rikäyämi’ niyaptikim, jutsëkikunaqa perdonashqatsu kanqa”.+