Apocalipsis
11 Y medina bärra niraq shoqushta entregamarmi+ kënö nimarqan: “Sharkur Teyta Diospa templunta, altarta y tsëchö adoraqkunata medi. 2 Peru templu waqtanchö patiutaqa tsënölla dejëkuy, ama meditsu. Cuarenta y dos killa sagrädu markata jarur ushayänampaqmi,+ tsëtaqa nacionkunachö nunakunata entregayashqa.+ 3 Ishkan testïgükuna mil doscientus sesenta junaq chukru tëlakunawan vistishqa willakuyänantam permitishaq”. 4 Tsë testïgukunataqa ishkan olïvukuna+ y ishkan candelabrukunam rikätsikun,+ y pëkunaqa patsapa Señornimpa puntanchömi shëkäyan.*+
5 Pï nunapis pëkunata mana allita rurëta munaptinqa, pëkunapa shimimpita nina yarqurmi chikeqninkunata ushakäratsin. Tsënömi pëkunata mana allita rurëta munaqqa wanunan o wañunan. 6 Pëkunaqa willakuyanqan junaqkuna mana tamyanampaq+ ciëluta wichqarkuyänampaqmi autoridäyoq kayan.+ Tsënöllam llapan yakuta yawarman tikratsiyänampaq,+ y munayanqan kuti patsachö imëka mana allikuna pasakunampaqpis autoridäyoq kayan.
7 Willakur ushariyaptinnam, mankarëkaq uchkupita yarqamoq mantsanëpaq chukaru animal pëkunawan guërrata ruranqa, y pëkunata vencirmi wanuratsinqa.+ 8 Sodömata y Egiptuta rikätsikoq reqishqa markapa mas reqishqa cällinchömi ayankuna jitaranqa, tsëchömi Señorninkunatapis qeruchö wanutsiyarqan. 9 Tukuyläya markapita, kastapita, idiömapita y nacionpita nunakunam, kima junaq pullan ayankunata rikäyanqa,+ y manam ayankunata sepultüraman churayänanta dejayanqatsu. 10 Teyta Diospa tsë ishkan willakoqninkuna patsachö kawaqkunata sufritsishqa kayaptinmi, patsachö kawaqkunaqa kushikur pëkuna wanuyanqanta celebrayanqa, y juknin jukninmi qarëkunata apatsinakuyanqa.
11 Kima junaq pullan pasariptinnam, Teyta Diospita shamoq kawatsikoq kallpa* pëkunaman yëkuriptin yapë sharkayämurqan.+ Y pëkunata rikaqkunaqa alläpam mantsakäyarqan. 12 Tsënam pëkunaqa ciëlupita fuertipa, “këman witsäyämuy” neqta wiyayarqan. Y chikeqninkuna rikëkäyaptinmi,* pukutëchö ciëluman witsäyarqan. 13 Tsë höram terremötu karqan. Tsë markapita chunka kaq partim ushakärirqan, y terremöturëkurmi siëti mil nunakuna wanuyarqan. Wakin kaqkunanam alläpa mantsakar, ciëluchö këkaq Teyta Diosta alabayarqan.
14 Ishkë kaq imëka mana allikunaqa pasashqanam.+ ¡Alkäbu këkäyë! Kima kaq imëka mana allikunam ichikllachöna chämunqa.
15 Qanchis kaq angelmi trompëtanta tocarqan.+ Tsënam ciëluchö fuertipa kënö niyanqan wiyakarqan: “Señornintsikpa+ y Cristumpa+ Gobiernunmi, nunakunata gobernaq gobiernu tikrashqa, y pëmi imëyaqpis gobernanqa”.+
16 Teyta Diospa puntanchö gobernar täkuyänanchö jamarëkaq veinticuatru gobernaqkunam,+ urkunkunapis patsaman chanqanyaq qonqurikuykur Teyta Diosta adorayarqan. 17 Y kënömi niyarqan: “Kanan këkaq y kashqa kaq Llapanta Puëdeq Jehovä* Dios, alläpa puëdeq kanqëkita+ rikätsikur gobernar qallashqa kaptikim alläpa agradecikuyaq.+ 18 Peru nacionkuna cölerakuyaptinmi qampis cölerakurqëki, y tiempum chäramurqan wanushqakuna juzgashqa kayänampaq,+ y sirwishoqniki willakoqkunata,+ limpiu nunakunata y lluta nuna kar o alli carguyoq karpis jutikita respetaqkunata premiun entreganëkipaq, y patsata ushakëkätseqkunata ushakätsinëkipaq”.+
19 Tsënam Teyta Diospa ciëluchö këkaq templun* kichakäriptin, templunchö këkaq Sagrädu Cäja rikakärirqan.+ Tsë höram räyukuna tillapyanqanta, parlayanqanta, räyukunata, terremötuta y fuerti runtu tamyata rikarqä.