Jeremïas
7 Jeremïasta parlaparmi Teyta Jehoväqa kënö nirqan: 2 “Noqa Jehoväpa wayï punkuman ëwëkur tsëchö kënö willakuy: ‘Kë punkupa yëkur Teyta Jehoväpa puntanchö qonqurikoq Judäpita nunakuna, Teyta Jehovä ninqankunata wiyakuyë. 3 Israel nunakunapa Diosnin, angelkunata mandaq Teyta Jehovämi këta nin: “Imanö portakuyanqëkita y mana alli rurëkunata dejaptikiqa, kë kinrëchö imëpis kawayänëkitam permitishaq.+ 4 Ama engañayäshuynikita munar niyäshunqëkiman confiakuyëtsu. Y ama kënö niyëtsu: ‘¡Këmi Teyta Jehoväpa templun, Jehovä Diospa templun! ¡Awmi, këqa Teyta Jehoväpa templunmi!’.+ 5 Imanö portakuyanqëkita y mana alli rurëkunata dejayaptiki, y pï nunapis nuna mayinwan problëmachö kaptin pëkunapaq justiciata ruraptiki,+ 6 y forastërukunata, papäninnaqkunata y viudakunata mana sufritsiyaptiki,+ kë kinrëchö culpannaq nunakunata mana wanutsiyaptiki y mana alliman chätsiyäshoqniki santukunata manana adorayaptikiqa,+ 7 kë kinrëchö imëpis kawayänëkitam permitishaq. Awmi, unë kastëkikunata entreganqä markakunachömi imëpis kawayanki”’”.
8 “Peru qamkunaqa engañayäshuynikita munar+ niyäshunqëkimanmi creiyanki, tsëqa manam imachöpis yanapayäshunkitsu. 9 Qamkunaqa suwakoqmi kayanki,+ nuna mayikikunatam wanutsiyanki, majëkikunatam jukwan engañayanki, mana cumpliyänëkipaqmi imatapis änikuyanki,+ Baal+ santupaqmi qarëkunata rupatsiyanki y mana reqiyanqëki santukunatam adorayanki. 10 Tsë imëka melanëpaqkunata rurëkarmi, qamkunaqa jutï apaq wayiman shamur y puntäman shamur, ‘salvashqam kashun’ niyanki. 11 ¿Jutïta apaq wayi, suwakoqkunapa machëninman tikrashqa kanqantaku qamkunaqa pensayanki?+ Kikïmi tsënö rurëkäyanqëkita rikarqö” ninmi Teyta Jehovä.
12 “‘Kananqa jutï alabashqa kanampaq Silö+ markachö akranqä sitiuman ëwayë.+ Y sirwimaq israelïtakuna mana allikunata rurayanqanrëkur imata ruranqäta rikäyë.+ 13 Peru qamkunaqa tsëkunata rurarmi sïguiyarqunki. Kutin kutin qamkunata parlapëkaptïpis, manam cäsuyamarqunkitsu’+ ninmi Teyta Jehovä. ‘Qamkunata qayaptïpis* manam cäsuyamarqunkitsu.+ 14 Silö markata ruranqänöllam confiakuyanqëki+ jutïta apaq wayiwan,+ y qamkunata y unë kastëkikunata entreganqä markakunawampis rurashaq.+ 15 Efrain kinrëchö israelïta mayikikunata rikënïpita qarqunqänöllam, qamkunatapis rikënïpita qarquyashqëki’.+
16 Qamqa ama kë nunakunapaq mañakamëtsu. Pëkunapaq mañakamaptikiqa y pëkunapa favornin rogakamaptikiqa+ manam wiyashqëkitsu.+ 17 ¿Manaku Judä kinrë markakunachö y Jerusalenpa cällinkunachö pëkunata rurayanqanta rikanki? 18 Wamrakunam yantata ashiyan, papäkunanam ninata tsaritsiyan, y warmikunanam Ciëluchö Reina*+ niyanqan santupaq tantata masayan. Y cöleratsiyämänampaqmi mas santukunapaq vïnu qarëkunata jichayan.+ 19 ‘Peru ¿noqapa conträku* tsë llapanta rurëkäyan? Tsë llapantaqa kikinkuna penqakuychö ushayänampaqmi rurëkayan’+ ninmi Teyta Jehovä. 20 Llapanta Gobernaq Teyta Jehovämi kënö nin: ‘¡Rikë! Alläpa cölerarmi kë kinrë sitiukunata,+ nunakunata, animalkunata, chakrakunachö montikunata y chakrachö imëka murukuykunata ushakätsishaq. Cöleraqa ninanömi kanqa, y manam upinqatsu’.*+
21 Israel nunakunapa Diosnin, angelkunata mandaq Teyta Jehovämi këta nin: ‘Qarëkunata apayämunqëki jananman rupatsina qarëkunata apayämuy, tsë llapan ëtsata kikikikuna mikuyë.+ 22 Unë kastëkikunata Egiptupita jipimurqä, manam rupatsishqa qarëkunapaq ni wakin qarëkunapaq pëkunata parlaparqätsu ni tsëkunata apayämunampaq mandarqätsu.+ 23 Peru këtam sï qamkunata nirqä:* “Llapan ninqäkunata cäsukuyaptikiqa, noqam Diosnikikuna kashaq y qamkunam sirwimaqnïkuna kayanki.+ Mandakunqänölla imatapis rurayaptikiqa, llapan rurayanqëkim alli yarqunqa”’.+ 24 Peru pëkunaqa manam ninqäkunata cäsukuyarqantsu.+ Tsëpa rantinqa, kikinkuna munayanqannömi* imatapis rurayarqan, y kutin kutinmi mana alli shonqunkuna ninqanta rurayarqan.+ Y mas alli nuna kayänampa rantinmi mas peor tikrayarqan. 25 Unë kastëkikuna Egiptupita yarqayämunqampita kananyaqmi tsënö rurëkäyanki.+ Tsëmi sirwimaqnï willakoqkunata qamkunaman mandamurqä, tsëtaqa cada junaq y kutin kutinmi rurarqä.+ 26 Peru chukru shonqu karmi wiyamëta munayarqëkitsu y manam ninqäkunata cäsukuyarqëkitsu.+ Y unë kastëkikunapita mas peormi portakuyarqëki.
27 Kë llapan ninqäkunata pëkunata willaptikipis+ manam wiyayäshunkitsu, y qayaptikipis manam cäsuyäshunkitsu. 28 Pëkunapaqmi kënö ninki: ‘Kë nacion nunakunaqa, manam Jehovä Diosninkuna ninqanta cäsukuyashqatsu, y manam correginqanta chaskikuyashqatsu. Teyta Diosta mana dejëpa sirweqkunaqa manam kannatsu, y manam tsëpaqqa parlayannatsu’.+
29 Largu aqtsëkita* rutur jitari, y mana imapis kanqan taksha jirkakunachö llakikur cantë. Noqa Jehoväqa cöleratsiyämashqa kayaptinmi, kanan witsan nunakunata rikëtapis munänatsu y ichikllachönam pëkunata dejarishaq. 30 ‘Judäpita nunakunaqa rikënïchömi imëka mana allikunata rurayashqa y jutïta apaq wayiman melanëpaq santukunata churarmi, tsë wayita rikënïpaq mana limpiuta tikratsiyashqa’+ ninmi Teyta Jehovä. 31 ‘Warmi y ollqu tsurikikunata ninachö rupatsiyänëkipaqmi,+ Hinon* pampanchö+ këkaq Töfet sitiuchö santukunata adorayänëkipaq sagrädu sitiukunata rurayarqunki. Tsëta rurayänëkipaqqa manam noqa mandakurqätsu, tsëmanqa manam ni ichikllapis pensarqätsu’.+
32 ‘Tsëmi ichikllachöna tsëkunataqa, Töfet o Hinon* pampa nirnatsu reqiyanki, sinöqa Nunakunata Wanutsiyanqan uran nirnam reqiyanki. Sitiupis manana kanqanyaqmi, entëru Töfet kinrëchö wanushqakunata pampayanki’ ninmi Teyta Jehovä.+ 33 ‘Kë kinrëpita nunakunapa ayankunaqa, ëtsa mikoq jatusaq pishqukunapaq y ëtsa mikoq animalkunapaqmi kanqa. Manam tsë animalkunata pillapis wajanqatsu.+ 34 Entëru nacion ushakashqa kaptinmi, Judä markakunachö y Jerusalenpa cällinkunachöqa kushikur büllayanqanatsu,+ y noviuwan novian parlayanqampis manam wiyakanqanatsu’”.+