2 Crönicas
22 Jehorampa mayor tsurinkunataqa ärabekunawan ëwaq asaltantikunam wanutsishqa kayarqan.+ Tsëmi Jerusalenchö nunakunaqa, Jehoram wanuriptin menor kaq tsurin Ocozïasta gobernanti kanampaq churayarqan. Tsënöpam Ocozïasqa Judächö gobernar qallëkurqan.+ 2 Veintidos watayoq këkarmi gobernar qallarqan. Y juk watapam Jerusalen markachö gobernarqan. Mamanqa Omrïpa+ willkan* Atalïa+ jutiyoq warmim karqan.
3 Ocozïasqa mamänin yachatsiptinmi, Acabpa+ familiankunanö Teyta Diosta mana cäsukur imëka mana allikunata rurarqan. 4 Papänin wanuriptinqa, Acabpa familiankunam consejaqninkuna tikrayarqan, tsëmi Acabpa familiannölla Jehovä Diosta mana cäsukur imëka mana allikunata rurarqan. Tsënöpam wanuymampis o wañuymampis charqan. 5 Pëkuna niyanqanta wiyakurmi Ocozïasqa, Acabpa tsurin Jehoramwan juntakarqan y Siria nacionpa gobernantin Hazaelwan+ pelyayänampaq Ramot-Galaad+ markata ëwayarqan. Tsëchömi Jehoramta flëchawan chëkatsiyarqan. 6 Tsënam Jehoramqa Jezreel+ markata kutirqan alliyanqanyaq tsëchö quedakunampaq. Pëtaqa Siria+ nacionpa gobernantin Hazaelwan Ramä markachö pelyëkaptinmi soldädukuna flëchawan chëkatsiyarqan.
Tsënö qeshyaptinmi Jehorampa+ tsurin Ocozïasqa,* Acabpa tsurin Jehoramta+ watukanampaq Judäpita Jezreel markaman ëwarqan.+ 7 Tsëman ëwaqtam Teyta Diosqa Ocozïasta mana alliman chätsirqan. Ocozïasqa Jehoramwanmi yarquyarqan Nimsïpa willkan* Jehüwan tinkuyänampaq. Jehütaqa+ Jehovä Diosmi churashqa karqan Acabpa+ familiankunata ushakätsinampaq. 8 Tsëmi Jehüqa Acabpa familiankunata wanutsirqan. Y Judächö dirigentikunata, Ocozïaspa wawqimpa tsurinkunata, Ocozïaspa sirweqninkunatapis wanutsirqanmi.+ 9 Kikin Ocozïastapis Samaria markachö tarïkurmi Jehü kaqman apëkur wanutsiyarqan. Tsëpitanam niyarqan: “Pëqa llapan shonqunwan Jehovä Diosta cäsukoq Jehosafatpa willkanmi”.+ Tsënö nirmi pampayarqan.+ Ocozïas wanuriptinqa manam gobernanampaq familianchö pillapis karqannatsu.
10 Ocozïaspa mamänin Atalïaqa+ wamranta wanutsiyashqa kayanqanta musyëkurmi, gobernanti kayänampaq kaq Judäpa llapan kastankunata wanutsirqan.+ 11 Peru gobernanti Jehorampa+ warmi wamran Jehosëbeatmi, wanutsiyänampaq kaq gobernantipa tsurinkunapita rakirir Ocozïaspa tsurin Jehoasta+ pakëllapa apakurqan y sirweqnin warmitawanmi juk cuartuman pakëkurqan. Tsënöpam Atalïaqa wanutsirqantsu. Jehosëbeatqa sacerdöti Jehoiadäpa+ warmin y Ocozïaspa paninmi karqan.+ 12 Jehoasqa pëkunawanmi joqta watapa Teyta Diospa templunchö pakararqan, tsëyaqmi Atalïaqa gobernarqan.