Esdras
1 Persia nacionchö Cïru gobernar qallariptinmi,+ Jehovä Diosqa Cïruta pensatsirqan israelïtakunata markankunaman kutitsinampaq. Tsënömi cumplikänan karqan Jehovä Dios ninqan, tsëtaqa willakoqnin Jeremïaswanmi unëna willakushqa karqan.+ Cïruqa willakuyänampaqmi mandakurqan y hasta kënö nirmi qellqarqan:+
2 “Persia nacionchö gobernaq Cïrum kënö nin: ‘Ciëluchö këkaq Jehovä Diosmi llapan nacionkunata podernïman churamushqa.+ Pëmi nimashqa Judächö këkaq Jerusalenchö templuta ruranäpaq.+ 3 Israelïta kaqkunaqa, Judächö këkaq Jerusalen markëkikunaman kutikuyë y Israelpa Diosnin Jehoväpa templunta yapë shäritsiyë. Diosnikikunam yanapëkuyäshunki, pëllam rasumpa Diosqa, y templunqa Jerusalen markachömi karqan. 4 Më markachöpis forastërunö kawaq israelïtakuna kutikuyaptin,+ vecïnunkuna qarayätsun öruta, pläta metalta, mas cösaskunata, animalkunata y munarqa Teyta Diospa templumpaq qarëkunatapis’”.+
5 Tsënö mandakuptinmi Judäpa y Benjaminpa kastankunachö mandakoqkuna, sacerdötikuna y levïtakunaqa, alistakuyarqan Jerusalen markata ëwar Jehovä Diospa templunta yapë shäritsiyänampaq. Teyta Dios yanapaptinmi pëkunaqa kutita munayarqan. 6 Y vecïnunkunam yanapar qarayarqan väleq cösaskunata, örupita y pläta metalpita cösaskunata, animalkunata, cuestaq cösaskunata y voluntäninkunapita mas cösaskunatapis.
7 Tsënöllam gobernanti Cïrupis, Teyta Jehoväpa templumpita Nabucodonosor apakunqan cösaskunata kutitsiyänampaq mandakurqan. Tsë cösaskunataqa Nabucodonosormi adoranqan santupa templunman churashqa karqan.+ 8 Persiachö gobernaq Cïrum mandakurqan, tesorëru Mitrïdates rikëkaptin tsë cösaskunata listaman apuntëkur Sesbazarta entregayänampaq. Sesbazarqa+ Judäpa kastankunachö mandakoqmi karqan.
9 Listachöqa këkunam apuntararqan: örupita rurashqa treinta canastakuna y pläta metalpita mil canastakuna, tsëmampis veintinuëvi masran canastakuna karqan. 10 Tsënöllam karqan örupita rurashqa treinta taksha tazonkuna y pläta metalpita rurashqa cuatrocientus diez taksha tazonkuna. Tsëmampis mil cösaskuna masran karqan. 11 Llapanqa karqan örupita y pläta metalpita cincu mil cuatrocientus cösaskunam. Sesbazarqa tsë llapantam aparqan israelïtakunawan+ Babiloniapita Jerusalen markaman kutikurnin.