2 Corintius

9 Limpiu nunakunata yanapanapaq ruranqantsikchöqa,+ manam wanayankitsu* qamkunaman qellqamunäta. 2 Noqaqa musyämi yanapakuyänëkipaq listu këkäyanqëkita, tsëmi Acäyapita kaqkuna juk watapitana yanapakuyänëkipaq listu këkäyanqëkipita, Macedonia nunakunachö alabakü. Y manam tsëllatsu, qamkuna yanapakuyänëkipaq listu këkäyanqëkiqa, cäsi llapankunatam tsënö rurayänampaq yanapashqa. 3 Peru kë asuntuchö qamkunapita alabakuyanqä mana ardëlla* kanampaqmi wawqikunata mandëkämü, tsënöpa listu këkäyänëkipaq kaqta ninqänölla, qamkuna rasumpa listu këkäyänëkipaq. 4 Macedonia wawqikuna noqawan shayämuptin qamkuna manaraq listu kayaptikiqa, qamkuna ninäpa rantinmi, noqakuna qamkunaman confiakuyanqäpita penqakuychö ushayäman. 5 Tsëmi wawqikunata nirqö, tiempuwan qamkunaman shamur änikuyanqëki mëtsika qarëkunata alistayänampaq. Tsënömi alli karnin qarakuyanqëkita y mana obligädu rurayanqëkita rikätsikuyanki.

6 Tsë asuntuchöqa, mana munëkar wallkallata muroqqa, wallkallatam cosechanqa, peru mëtsikata muroqqa, mëtsikatam cosechanqa.+ 7 Teyta Diosqa kushi kushilla qarakoqtam kuyan,+ tsëmi cada ünu shonqunchö decidinqannö ruratsun, peru ama mana munëkar o obligashqanöqa.+

8 Tsëpitapis masqa, llapan wanayanqëki* mana faltapuyäshunëkipaq y allikunata rurayänëkipaq mëtsika kapuyäshunëkipaqmi, Teyta Diosqa qamkunawan alläpa alli këta puëdin.+ 9 (Kënö nir qellqarëkanqannö: “Pëqa alli karmi, waktsakunata y pïmëtapis qarëkun. Imëka allikunata ruranqampis manam ushakanqatsu”.+ 10 Muroq mëtsika muruyoq kananta y mikunampaq tantayoq kananta permiteqmi, qamkuna muruyänëkipaq y allita rurayanqëkipita imëka allikunata cosechayänëkipaq, muruykikuna mëtsika kananta permitinqa). 11 Imëkanöpa qarakoq kayänëkipaqmi, qamkunaqa llapanchö imëkayoq këkäyanki, tsë qarakuyanqëkita rakipäyaptïmi nunakuna Teyta Diosta agradecikuyanqa. 12 Yanapakur rurëkanqantsikqa, manam limpiu nunakunata wanayanqanchö* yanapanallapaqtsu,+ sinöqa tsëta ruranqantsikrëkurmi atska nunakuna Teyta Diosta agradecikuyanqa. 13 Yanapakur qarakuyanqëkiqa, qamkuna niyanqëkinömi Cristupita alli noticiakuna ninqannö kawëkäyanqëkita, y pëkunapaq y llapankunapaq rurayanqëkichö qarakoq kayanqëkita rikätsikun, tsërëkurmi pëkunaqa Teyta Diosta alabayan.+ 14 Y qamkunapaq rogakurmi, pëkunaqa Teyta Dios qamkunawan alläpa alli kanqanrëkur, kuyayäshunqëkita rikätsikuyanqa.

15 Alläpa espantëpaq kaptin, entienditsikuyta mana puëdinqantsik debaldilla qarënimpita Teyta Diosta agradecikushun.