1 Tesalonicensis
5 Wawqikuna y panikuna, tiempukunapaq y witsankunapaqqa, manam wanayankitsu* imatapis qamkunaman qellqayämunäta. 2 Qamkunaqa allim musyayanki Teyta Jehovä* nunakunata juzganan tiempuqa+ paqaspa suwa shamoqnö shamunampaq kaqta.+ 3 Pëkuna, “¡yamëna y segürunam këkantsik!” nikäyaptinmi, warmipa wamran yurinampaqna këkaptin nanënin chaqnö, pëkunaman illaqpita ushakë chämunqa+ y manam imanöpapis salvakuyanqatsu. 4 Peru qamkunaqa wawqikuna y panikuna, manam ampichötsu o tsakëchötsu* këkäyanki, tsë junaq ladronkunatanö tariyäshunëkipaq. 5 Qamkunaqa aktsichö y junaqchö kawëkaq nunakunanam kayanki.+ Noqantsikqa manam paqaschötsu ni ampichötsu o tsakëchötsu* këkantsik.+
6 Tsëmi ama wakinkunanöqa punur këkäshuntsu.+ Alkäbu alkäbu këkäshun+ y imëpis alli juiciuyoq këkäshun.+ 7 Punoqkunaqa paqaspam punuyan, y machakoqkunaqa paqaspam machashqa këkäyan.+ 8 Peru noqantsik junaqchö kawëkaqkunaqa, imëpis alli juiciuyoq kashun y markäkoq o yärakoq këta y kuyakoq këta fiërrupita chalëcutanö vistikushun, y shuyaranqantsik salvacionta cascutanö churakushun.+ 9 Awmi, Teyta Diosqa manam castigamänapaqtsu akramarquntsik, sinöqa Señornintsik Jesucristurëkur salvacionta tarinapaqmi.+ 10 Pëqa alkäbu alkäbu këkar o punukashqa* këkarpis, pëwan juntu kawanapaqmi+ noqantsikrëkur wanurqan.+ 11 Tsëmi kanan rurëkäyanqëkinölla, jukniki juknikikuna kallpayoq* kayänëkipaq y alli këkäyänëkipaq yanapanakur këkäyë.+
12 Kananqa wawqikuna y panikuna, qamkunachö alli trabajëkaqkunata y Señorpa kaqchö dirigiyäshoqnikikunata y consejayäshoqnikikunata respetayänëkipaqmi rogayaq. 13 Rurayanqan trabäjurëkur respetar alli tratayë.+ Tsënölla jukniki juknikikuna yamë kawakuyë.+ 14 Wawqikuna y panikuna këtapis rogayaqmi, mana alli portakoqkunata* cläru consejayë,+ llakishqa* këkaqkunata shoqayë, mana alli këkaqkunata yanapayë y llapankunawan pacienciayoq kayë.+ 15 Pï nunatapis mana allita rurayaptin, mana allipa mana kutitsinampaq alkäbu kayë.+ Tsëpa rantinqa, jukniki juknikikunapaq y llapankunapaq allita rurayänëkipaq kallpachakuyë.+
16 Imëpis kushishqa kayë.+ 17 Teyta Diosman imëpis mañakuyë.+ 18 Llapampita Teyta Diosta agradecikuyë.+ Qamkuna, Cristu Jesuspa qateqninkuna tsëta rurayänëkitam Teyta Diosqa munan. 19 Ama santu espïritu qamkunachö imëkata rurananta michäyëtsu.*+ 20 Ama Teyta Dios puntallapitana willakunqanta mana kaqpaq churayëtsu.+ 21 Imëkapitapis alli segurakuyë+ y imëpis alli kaqta rurayë. 22 Ama mana allikunataqa rurayëtsu.+
23 Yamë kë kananta permiteq Teyta Dios, pëpa rikëninchö limpiuta tikratsiyäshuy. Tsënölla wawqikuna y panikuna, imanö kayanqëki,* imanö kawayanqëki* y cuerpuykikunapis, Señornintsik Jesucristu këkämunqan witsanchö culpannaq y imëkachö alli katsun.+ 24 Qamkunata qayayäshoqnikiqa confiakuypaqmi, y pëqa segürum tsëta ruranqa.
25 Wawqikuna y panikuna, noqakunapaq mañakur sïguiyë.+
26 Llapan wawqikunata y panikunata limpiu shonquykikunawan cärachö mutsar saludayë.
27 Señorpa jutinchömi qamkunata cläru mandayaq, kë cartata llapan wawqikunapaq y panikunapaq leyiyänëkipaq.+
28 Señornintsik Jesucristu qamkunawan alläpa alli këkutsun.