Tïtu
1 Teyta Dios akranqankuna creikuyanqanmannö, y llapan shonquntsikwan Diosta imanö sirwinapaq kaqta rikätsikoq rasumpa kaq ninqanmannö, Teyta Diospa sirweqnin y Jesucristupa apostolnin noqa Pablupita. 2 Tsëqa ulikuyta o llullakuyta mana puëdeq+ Teyta Dios unëpitana imëyaqpis kawëta änikunqanchömi patsakashqa këkan.+ 3 Tsënö kaptimpis, Salvamaqnintsik Teyta Dios mandakuptin willakunäpaq carguman churamarmi, dispuninqan tiempuchö palabranta musyatsikurqan.+ 4 Rasumpa tsurï cuenta creikoq mayï Tïtupaq:
Dios Teyta y Señornintsik Cristu Jesus qamwan alläpa alli këkuyätsun, y yamë kanëkipaq yanapëkuyäshuy.
5 Crëtachöqa dejarqaq imapis mana alli këkaqkunata correginëkipaq y cada markachö anciänukunata* churanëkipaqmi, kënö ninqaqta cuentaman churëkur: 6 anciänu* kaqqa imapitapis mana acusashqa y juk warmiyoqllam kanan, y tsurinkunapis cristiänum kayänan y manam lluta kawayanqampita o munayanqanta rurayanqampita acusashqatsu kayänan.+ 7 Sirweqnin kanampaq Teyta Dios churashqa kaptinmi, anciänuqa* imapitapis mana acusashqa kanan, manam orgullösutsu kanan,+ manam rastsu o sastsu cölerakunan,+ manam machakoqtsu kanan, manam lïsutsu* kanan y manam engañakur imatapis ërayëpa tarita munaqtsu kanan. 8 Tsëpa rantinqa, nunakunata shumaq chaskeqmi kanan,+ alli kaqtam kuyanan,+ alli juiciuyoqmi kanan, alli kaqtam ruranan, manam jukkunata dejanantsu+ y controlakuytam yachanan.+ 9 Teyta Diospa confiakuypaq palabran* ninqannömi yachatsikunan,+ tsënöpa alli* yachatsikuykunawan kallpayoq kayänampaq wakinkunata yanapanampaq+ y tsëkunapa contran parlaqkunata correginampaq.+
10 Mëtsikaq nunakunam, y masqa ishpakuyänampa puntanchö señalakuyta väleqpaq churaqkunam,+ munayanqanta rurakuyan, imatapis parlananlla parlayan y jukkunata engañayan. 11 Pëkunatam upällatsinantsik, pëkunaqa engañakur imatapis tarita munarmi, llutankunata yachatsikur familiakunachö llapan markäkoq o yärakoq kayanqanta ushakëkätsiyan. 12 Pëkunapita jukmi, kikinkunapa willakoqninkuna kënö nirqan: “Crëtapita nunakunaqa ulikoq o llullakoq, mana allita rurakoq chukaru animalnö y mëtsikata mikukoq qelakunam kayan”.
13 Tsënö ninqanqa rasumpa kaqllam. Tsëmi imëpis cläru corregir sïgui, tsënöpa markäkuyanqanchö o yärakuyanqanchö alli kayänampaq, 14 judïukuna cuentakuyanqanta mana cäsuyänampaq, y rasumpa kaqpita rakikaq nunakuna mandakuyanqanta mana cäsukuyänampaq. 15 Diospa rikëninchö limpiu këkaqkunapaqqa llapan imëkapis limpium.+ Peru mana limpiu këkaqkunapaq y mana markäkoq o yärakoq kaqkunapaqqa, pensëninkuna y concienciankuna mana limpiu kaptinmi imapis limpiutsu.+ 16 Nunakuna jananchö Teyta Diosta reqiyanqanta nirpis, melanëpaq kar, mana cäsukoq kar y ima allitapis mana rurëta puëdirmi, rurayanqanwanqa Teyta Diosta mana kaqpaq churayan.+