Marcus
8 Tsë junaqkunam mëtsikaq nunakuna yapë juntakäyarqan, y mikuyänampaq imankunapis mana kaptinmi qateqninkunata qayëkatsir Jesus kënö nirqan: 2 “Kë nunakunatam alläpa llakipä,*+ kima junaqnam noqawan quedakuyashqa, y manam mikuyänampaq imankunapis kantsu.+ 3 Mallaqllata wayinkunata ëwakuyänampaq nïkuptïqa, capaz mallaqar nänichö ishkiskiyanman, wakinqa alläpa karupitam kayan”. 4 Peru qateqninkunaqa kënömi niyarqan: “Teytë, karu sitiuchömi këkantsik, ¿mëchöraq tantata tarishwan kë mëtsika nunakunapa pachanta juntatsinapaq?”. 5 Tsënam Jesusqa, “¿ëka tantataq kayäpushunki?” nir tapurqan. Pëkunanam, “qanchismi” nir contestayarqan.+ 6 Tsënam nunakunata patsaman jamakuyänampaq mandëkur, qanchis tantata aptarkur Teyta Diosta agradecikurqan, y pakir pakirmi qateqninkunata entregarqan, y pëkunanam nunakunata qarayarqan.+ 7 Juk ishkë taksha pescädukunapis kayäpurqanmi, y Diosta agradecikurirmi tsëtapis nunakunata qarayänampaq nirqan. 8 Llapankunam pacha junta mikuyarqan, y qanchis canasta junta sobranqantam juntayarqan.+ 9 Cuatru milnö ollqukunam mikuyarqan. Tsëpitanam Jesusqa llapankunata ëwakuyänampaq nirqan.
10 Y jinan höra barcuwan ëwakurmi Dalmanüta kinrëman qateqninkunawan chäyarqan.+ 11 Tsëchö këkaptinnam fariseukunaqa discutipar mana alliman chätsita munar, ciëlupita ima señal-llatapis rikätsikunampaq exigiyarqan.+ 12 Tsënam pëqa shonqunchö alläpa llakikur kënö nirqan: “¿Imanirtan kanan witsan nunakunaqa señalta ashiyan?+ Rasuntam qamkunata nï:* kanan witsan nunakunaqa manam ima señaltapis rikäyanqatsu”.+ 13 Tsëpitanam pëkunata dejëkur qochapa wak tsimpanman barcuwan ëwakurqan.
14 Qateqninkunaqa tantata apëtam qonqëkuyarqan, y barcuchöqa jukllëllam tantankuna karqan.+ 15 Jesusqa alli clärum pëkunata kënö nirqan: “Fariseukunapa y Herödispa levadürampita cuidakuyë”.+ 16 Tsëmi tantankuna mana kaptin kikinkunapura discutiyarqan. 17 Tsëta cuentata qokurnam Jesusqa pëkunata kënö nirqan: “¿Imanirtan tantëkikuna mana kanqampaq discutikäyanki? ¿Manaraqku cuentata qokuyanki imapaq parlëkanqäta? ¿Manaraqku entiendiyanki? ¿Chukru shonqullaraq karku imatapis entiendiyankiraqtsu? 18 ‘Qamkunaqa nawikikuna kaptimpis manam rikäyankitsu, y rinrikikuna kaptimpis manam wiyayankitsu’. ¿Manaku yarpäyanki 19 pitsqa tantata cincu mil nunakunapaq pakiptï,+ ëka canasta junta sobranqanta juntayanqëkita?”. Tsënam pëkunaqa, “döcitam”+ niyarqan. 20 “Y qanchis tantata cuatru mil nunakunapaq pakiptï, ¿ëka jatun canasta juntataq sobranqanta juntayarqëki?”. Tsënam pëkunaqa, “qanchistam”+ niyarqan. 21 Tsënam, “¿y manaraqku entiendiyanki?” nir tapurqan.
22 Betsaida markaman chäriyaptinnam nunakunaqa wisku o qapra nunata pëman apamur yatëkunampaq rogayarqan.+ 23 Tsënam tsë wisku o qapra nunata jancharkur tsë caserïupita waqtaman aparqan, tsë nunapa nawinman toqëkurmi+ pëman makinta churar, “¿imallatapis rikankiku?” nir tapurqan. 24 Tsënam, wakpa këpa rikëkur tsë nunaqa kënö nirqan: “Jatun montinö o qerunö purikaq nunakunatam rikä”. 25 Tsë nunapa nawinman makinta yapë churarkuptinmi tsë nunaqa cläruna rikarqan. Awmi, nawin alliyashqana kaptinmi llapantapis allina rikarqan. 26 Tsëmi, “ama kë caserïumanqa yëkuynatsu” nir wayinta ëwakunampaq mandarqan.
27 Tsëpitanam Jesusqa Cesarëa de Filïpuchö caserïukunaman qateqninkunawan charqan, y nänita ëwëkarmi, “¿pï kanqätataq nunakuna niyan?” nir qateqninkunata tapurqan.+ 28 Tsënam pëkunaqa kënö niyarqan: “Wakinmi Bautizakoq Juanmi+ niyan, wakinnam Elïasmi+ niyan, y wakinnam Diospa juk willakoqninchi niyan”. 29 Pënam, “qamkunaqa, ¿pï kanqätataq niyanki?” nirqan. Tsënam Simon Pëdruqa, “qamqa Cristum kanki” nir contestarqan.+ 30 Tsënam pëkunata alli cläru nirqan pitapis mana willayänampaq.+ 31 Tsëpitanam Nunapa Tsurinta sufritsiyänampaq kaqta, y markachö dirigeqkuna, mandakoq sacerdötikuna y Ley qellqaqkuna despreciayänampaq kaqta, wanutsiyänampaq o wañutsiyänampaq kaqta+ y kima junaqta kawarimunampaq kaqta pëkunata willarqan.*+ 32 Tsë llapantam pëkunata alli cläru willarqan. Peru Pëdruqa juk läduman apëkurmi qayaparqan.+ 33 Tsënam Jesusqa tumëkur qateqninkunata rikëkur Pëdruta kënö qayaparqan: “¡Qepäman churakë Satanas! Qamqa manam Dios pensanqannötsu pensëkanki, sinöqa nunakuna pensayanqannömi”.+
34 Tsëpitanam nunakunata y qateqninkunata qayëkur kënö nirqan: “Pï nunapis qatimaqnï këta munarqa, amana kikimpaqqa kawatsunnatsu, sinöqa sufrimientu qerunta* aparkur qepäta shamutsun.+ 35 Vïdanta salvëta munaqqa, wanunqam o wañunqam; peru qatimaqnï kanqanrëkur y alli noticiakunata chaskikunqanrëkur wanoqqa, kawarimunqam.+ 36 Rasumpa kaqchöqa, ¿imataraq juk nuna logranman kë mundupa duëñun karpis, wanunan kaptinqa?+ 37 ¿O imataraq salvakunampaq nuna entreganman?+ 38 Kanan witsan jutsasapa* y Diosta dejareq* nunakunapa puntanchö pï nunapis noqapita y parlanqäkunapita penqakuptinqa, Nunapa Tsurimpis Teytampita chaskinqan poderwan y limpiu angelninkunawan+ shamurmi pëpita penqakunqa”.+