Marcus

9 Y kënöpis nirqanmi: “Noqam qamkunata nï,* këchö këkaqkunapita wakinnikiqa manam wanuyankitsu o wañuyankitsu, Diospa Gobiernun gobernëkanqantana* rikäyanqëkiyaq”.+ 2 Tsëpita joqta junaq pasariptinnam Jesusqa Pëdruta, Santiäguta y Juanta pusharkur pëkunallawan juk jatun jirkaman ëwarqan. Pëkunapa puntanchömi Jesusqa jukläya tikrarirqan.+ 3 Janan kaq röpanmi chipapar qallëkurqan, y pï taqshaqpis röpata alli yuraqyätsinqampitapis mas yuraqmi tikrarqan. 4 Tsë höram Moisesta y Elïasta Jesuswan parlëkaqta rikäyarqan. 5 Tsënam Pëdruqa Jesusta kënö nirqan: “Maestru,* ¡alläpa allim këchö këkanqantsikqa! Kima carpata* armashun, jukta qampaq, jukta Moisespaq y juktana Elïaspaq”. 6 Rasumpa kaqchöqa, alläpa mantsakashqa karmi Pëdruqa ima rurëtapis musyarqantsu. 7 Tsëpitanam pukutë yurirkur llapankunata tsaparkurqan, y pukutë rurimpita kënö nimoqtam wiyayarqan:+ “Pëmi kuyë Tsurï.+ Pëta wiyayë”.+ 8 Tsëpitanam illaqpita wakpa këpa rikachakur pitapis rikäyarqannatsu, sinöqa Jesusllatanam.

9 Jirkapita urëkämurnam Jesusqa qateqninkunata mandarqan, Nunapa Tsurin kawarimunqanyaq+ rikäyanqanta pitapis mana willayänampaq.+ 10 Y pëkunaqa tsënö ninqantam cäsukuyarqan,* peru kawarinampaq kaqta ninqan ima ninan kanqantam kikinkunapura parlayarqan. 11 Jesustam kënö tapupäyarqan: “Tsëqa, ¿imanirtan Ley qellqaqkunaqa Elïasraq+ puntata shamunampaq kaqta niyan?”.+ 12 Tsënam pëqa nirqan: “Rasunmi, Elïasqa puntata shamurmi imëkata punta* kanqanman kutitsin.+ Peru, ¿imanirtan Nunapa Tsurin imëka sufrimientukunapa pasanampaq+ y despreciashqa kanampaq kaq qellqarëkan?+ 13 Peru noqam qamkunata nï,* rasumpa kaqchöqa Elïasqa shamushqanam,+ y pëpaq qellqarëkanqannömi munayanqanta pëwan rurayashqa”.+

14 Jesuspa wakin qateqninkuna këkäyanqanman chëkarnam, pëkunapa lädunkunachö mëtsika nunakunata rikäyarqan, y wakin Ley qellqaqkunam pëkunawan discutir këkäyarqan.+ 15 Nunakuna Jesusta rikëkurqa alläpa kushikurmi saludaq cörriyarqan. 16 Tsënam Jesusqa, “¿imatataq pëkunawan discutikäyanki?” nir pëkunata tapurqan. 17 Y tsëchö këkaqkunapita juk nunam kënö contestarqan: “Maestru, müdu* tikratseq mana alli espïrituyoq kaptinmi tsurïta qamman apamurqö.+ 18 Mëchöpis munanqanchö patsaman ishkitsiptinmi, pushuqata jitar y kirunkunata ruchuchütsir kallpannaq quedarin. Tsë demoniuta qarquyänampaqmi qatiräshoqnikikunata rogakurqö, peru manam puëdiyashqatsu”. 19 Tsëta contestarnam Jesusqa nunakunata kënö nirqan: “¡Mana markäkoq o yärakoq nunakuna!+ ¿Imëyaqraq qamkunawan këkäshaq? ¿Imëyaqraq qamkunata aguantayashqëki? Këman apayämuy”.+ 20 Tsënam tsë jövinta pë kaqman apayämurqan, y tsë mana alli espïrituqa Jesusta rikëkurmi jövinta tapsikacharkurqan, tsënam jövinqa patsaman ishkirqan, y qarimpar o qoshpar* y pushuqata jitarmi karqan. 21 Tsënam Jesusqa tsë jövinpa papäninta, “¿imëpitataq tsënö pasan?” nir tapurqan. Pënam kënö contestarqan: “Wamra kanqampitam. 22 Wanutsita munarmi kutin kutin ninaman o yakumampis ishkitsir ushan. Imallatapis rurëta puëdirqa, llakipäyämar* yanapëkayämë”. 23 Jesusnam nirqan: “¿Imanirtan ‘puëdirqa’ ninki? ¡Markäkoq o yärakoq kaqpaqqa llapampis puëdikanmi!”.+ 24 Tsë höram jövinpa papäninqa fuertipa kënö nirqan: “¡Noqaqa markäkümi o yärakümi! Peru ¡mas markäkunäpaq o yärakunäpaq yanapëkamë!”.+

25 Pëkuna këkäyanqanman mëtsika nunakuna cörripa ëwëkaqta rikëkurnam, Jesusqa tsë mana alli espïrituta kënö qayaparqan: “Müdu* tikratsikoq y sorduyätsikoq mana alli espïritu, pëpita yarqunëkipaq y yapëqa manana kutinëkipaqmi mandaq”.+ 26 Tsënam tsë espïrituqa fuertipa qaparïkur y feyupa tapsikacharkur tsë jövinpita yarquskirqan, y tsë jövin wanushqanö quedariptinmi cäsi llapan nunakuna, “¡wanurishqam!” niyarqan. 27 Peru makipita Jesus sutarkamuptinmi tsë jövinqa sharkamurqan. 28 Juk wayiman Jesus yëkuriptinnam qateqninkunaqa japallanllata, “¿imanirtan noqakunaqa tsë demoniuta qarquyta puëdiyarqötsu?” nir tapuyarqan.+ 29 Tsënam pëqa nirqan: “Kënö kaq demoniuqa Teyta Diosman mañakushqaran yarqun”.

30 Tsëpita yarqurnam Galilëa provinciapa pasayarqan, peru pëqa manam ni pï musyananta munarqantsu 31 qateqninkunata kënö yachatsishqa karnin: “Nunapa Tsurinqa nunakunapa makinmanmi entregashqa* kanqa y wanutsiyanqam o wañutsiyanqam,+ peru wanutsiyaptimpis kima junaqtam kawarimunqa”.+ 32 Pëkunaqa manam ninqanta entiendiyarqantsu, peru tapupëtaqa mantsayarqanmi.

33 Capernaumman chärir wayichö këkäyaptinnam, “¿ima asuntupaqtan nänichö discutikäyarqëki?” nir tapurqan.+ 34 Y nänichö pï mas alli kanqampaq discutishqa karmi upälla quedakuyarqan. 35 Tsëmi jamëkur döci apostolninkunata qayëkur kënö nirqan: “Mëqëkipis puntachö këta munarqa, wakinkunapa mas qepanchömi kayänëki y llapankunapa sirweqninkunam kayänëki”.+ 36 Tsëpitanam juk wamrata pëkunapa lädunman shëkatsir,* tsë wamrata waqurkur o makallarkur pëkunata kënö nirqan: 37 “Pï nunapis kë wamrakunapita mëqantapis jutïchö chaskeqqa,+ noqatapis chaskimanmi, y noqata chaskimaqqa, manam noqallatatsu chaskiman, sinöqa mandamaqnïtapis chaskinmi”.+

38 Juanmi nirqan: “Maestru, jutikichö demoniukunata qarquykaqtam juk nunata rikäyarqö, y noqantsikwan mana puriptinmi michëta tïrayarqö”.+ 39 Tsënam Jesusqa kënö nirqan: “Ama michëta tïrayëtsu. Manam ni pï jutïchö milagrukunata* rurëkar noqapaq mana allita parlanmantsu. 40 Contrantsikchö mana këkaqqa, noqantsikwanmi këkan.+ 41 Noqam qamkunata nï,* Cristupa+ qateqnin kayanqëkirëkur juk väsu yakuta qarayäshoqnikikunaqa, manam bendicionninta oqrayanqatsu.+ 42 Peru noqaman markäkoq o yärakoq pishi wamranö kaqkunata creikunqanta dejatseq kaqpaqqa,* ashnu tumatsinqan juknin kaq rumi mulinuta kunkanman warkurkur lamarman jitarkuyanqanmi mas alliqa kanqa.+

43 Imëllapis makiki mana allita ruratsishuptikiqa, roquski. Ishkan makikiwan Gehënachö* o mana ushakaq ninachö ushanëkipitaqa, juk makiyoqllapis kawëta chaskinqëkim mas alliqa kanqa.+ 44 * 45 Y chakiki mana allikunata ruratsishuptikiqa, roquski. Ishkan chakikiwan Gehënachö* ushanëkipitaqa, juk chakiyoqllapis kawëta chaskinqëkim mas alliqa kanqa.+ 46 * 47 Tsënölla nawiki mana allikunata ruratsishuptikipis, jipir karuman jitëkuy.+ Ishkan nawikiwan Gehënachö* ushanëkipitaqa, juk nawiyoqllapis Diospa Gobiernunman yëkunqëkim mas alliqa kanqa.+ 48 Gehënachöqa manam ëtsa kuru wanuntsu ni ninapis upintsu.*+

49 Nunakuna mikuyman kachita jichayanqannömi, Teyta Diosqa kënö nunakunaman ninata chätsimunqa.+ 50 Kachiqa alläpa allim, peru kachi qamläriptinqa,* ¿imanöraq yapë alliyätsiyanman?+ Qamkunapis kachinö kayë,+ y jukniki juknikikuna yamë kawakuyë”.+