Romänus
5 Tsëmi kananqa markäkoq o yärakoq karnin allita ruraqnö rikashqa këkarqa,+ Señornintsik Jesucristurëkur Teyta Dioswan imëpis yamë kanantsik.+ 2 Përëkurmi markäkoq o yärakoq karnin, Teyta Dios noqantsikwan alläpa alli kanqanta rikëkantsik,+ y Teyta Diospita puëdeq këta chaskinantsik tiemputa shuyararmi alläpa kushikuntsik. 3 Manam tsëllatsu, sufrimientukunapa pasarpis alläpa kushikushun.*+ Noqantsikqa musyantsikmi sufrimientukunapa pasanqantsikqa, alli aguantanapaq yanapamanqantsikta;+ 4 alli aguantanqantsiknam, Teyta Diospa rikëninchö alli kanapaq yanapamantsik;+ Diospa rikëninchö alli kanqantsiknam, änikunqanta shuyänapaq yanapamantsik,+ 5 y änikunqanta shuyararqa manam llakikushuntsu.+ Awmi, Teyta Diosqa kuyamanqantsikta musyanapaqmi, santu espïritunta chaskinantsikta permitishqa.+
6 Rasumpa kaqchöqa jutsata* ruraq këkashqam,+ Cristuqa dispunishqan tiempuchö Teyta Diosta mana respetaq nunakunarëkur wanurqan. 7 Allita ruraq nunapaqqa, manam asïllaqa pï nunapis wanunmantsu, peru alli nunapaqqa, capaz pï nunapis wanuyta valuranman. 8 Tsënö kaptimpis, jutsa* ruraqllaraq këkashqa noqantsikrëkur Cristu wanunanta permitirmi, Teyta Diosqa kuyamanqantsikta musyatsimarquntsik.+ 9 Kananqa yawarninrëkur allita ruraqnö rikashqa karmi,+ Teyta Dios nunakunata castigaptin përëkur salvakushun.+ 10 Teyta Diospa chikeqnin këkar Tsurin wanunqanrëkur Dioswan amishtashqa këkarqa,+ kanan Teyta Dioswan amishtashqana këkarnäqa, Cristupa vïdanwanmi masraq salvashqa kashun. 11 Manam tsëllatsu, Señornintsik Jesucristurëkur Teyta Dioswan amishtashqa karmi, Dioswan alli këkanqantsikpita alläpa kushikuntsik.+
12 Awmi, juk nunapa culpanllam jutsaqa* kë munduchö nunakunaman charqan y jutsarëkurnam nunakunaman wanuy charqan.+ Tsënömi wanuyqa, llapankuna jutsata rurashqa kayaptin llapankunaman charqan.+ 13 Ley manaraqpis kaptinmi, jutsaqa* kë munduchöna këkarqan, peru ley mana kaptinqa manam pitapis jutsata ruranqanta nishwantsu.+ 14 Tsënö kaptimpis, Adan jutsallakunqannö* mana jutsallakushqa këkäyaptinmi, Adanpita Moisespa tiempunyaq wanuyqa nunakunata gobernarqan, y wakin wakinchöqa Adanqa shamoqpaq kaq nunanömi karqan.+
15 Peru Teyta Dios qarakunqan logranqanqa, manam mana allita rurë logranqanwan igualtsu. Juk nuna mana alli ruranqanrëkurlla mëtsikaq wanuykäyaptinqa, Teyta Dios alläpa alli kanqan y juk nuna alläpa alli kanqanrëkurlla,+ awmi Jesucristurëkur+ debaldilla qarakunqanqa, tsëpitapis mas atskaqpaqmi karqan. 16 Juk nunalla jutsata* ruranqanrëkur pasanqannötsu+ manam debaldilla qarakunqanwanqa pasan: juk mana alli rurëpa culpanmi llapan nunakuna condenashqa kayarqan,+ peru debaldi qarëqa, mana allikunata rurayanqanchönam, allita ruraqnö rikashqa kayänampaq mëtsikaq nunakunata yanapashqa.+ 17 Juk nuna mana allita ruranqanrëkurlla wanuy gobernashqa këkaptinqa,+ ¡Teyta Dios alläpa alli kanqampita y alli kaqta rurar debaldilla qarakunqanta chaskishqa kaqkunanäqa,+ juk nunarëkurllam, awmi Jesucristurëkurlla+ kawayanqa y gobernaq kayanqa!+
18 Awmi, juk mana allita rurëpa culpan tukuyläya nunakuna condenashqa kayanqannöllam,+ juk alli rurërëkurlla tukuyläya nunakuna allita ruraqnö rikashqa kayanqa+ y kawëta chaskiyanqa.+ 19 Juk nuna mana cäsukoq kanqanrëkurlla mëtsikaq nunakuna jutsata* ruraq tikrayanqannöllam,+ juk nuna cäsukoq kanqanrëkurlla mëtsikaq nunakuna allita ruraqnö rikashqa kayanqa.+ 20 Leyqa nunakuna mas jutsakunata* rurëkäyanqanta cuentata qokuyänampaqmi karqan,+ peru mas jutsakuna kanqanchöqa, Teyta Dios alläpa alli kanqanmi masraq rikakurqan. 21 ¿Imarëkur? Wanuyta o wañuyta apamoq jutsa* gobernanqannölla,+ Teyta Dios alläpa alli kanqan gobernaptin, Señornintsik Jesucristurëkur imëyaqpis kawëta chaskiyänampaq nunakuna allita ruraqnö rikashqa kayänampaqmi.+