Gälatas

1 Noqa Pablupita, noqataqa manam nunakunatsu ni nunawantsu apostol kanäpaq akrayämashqa, sinöqa Jesucristu+ y pëta wanushqampita kawaritsimoq Teyta Diosmi+ akramashqa. Awmi, noqapita 2 y noqawan këkaq wawqikunapita, Galacia kinrë congregacionchö këkaqkunapaq:

3 Teytantsik Dios y Señornintsik Jesucristu qamkunawan alläpa alli këkuyätsun y yamë kayänëkipaq yanapëkuyäshuy. 4 Pëqa Diosnintsik y Teytantsik munanqanta rurarmi,+ kë mana alli mundupita* salvamänapaq+ wanurqan o wañurqan.+ 5 Teyta Dios imëyaqpis alabashqa katsun. Tsënö kallätsun.*

6 Espantakümi Cristu alläpa alli kanqanrëkur qayayäshoqnikipita raslla o saslla rakikäkurir,* jukläya alli noticiakunata chaskikuyanqëkipita.+ 7 Tsënö nirqa manam juk alli noticiakuna kanqantatsu nikä, sinöqa qamkunawan wakin këkaqkunam mana alliman chëkätsiyäshunki,+ y Cristupita alli noticiakunata cambiëta munayan. 8 Tsënö kaptimpis, mëqäpis o ciëlupita angelpis, willayanqaq alli noticiakunapita jukläyata yachatsiyäshuptikiqa maldïtu katsun. 9 Tsëllaraq niyanqaqtam yapë niyaq:* pillapis chaskiyanqëki alli noticiakunapita jukläyata yachatsiyäshuptikiqa maldïtu katsun.

10 ¿Nunakunapa o Teyta Diospa rikëninchöku alli këta munëkä? ¿Noqaqa nunakunataku kushitsita munëkä? Nunakunata kushitsitaraq munëkarqa, manachi Cristupa sirweqnintsu käman. 11 Wawqikuna y panikuna, musyayänëkitam munä willayanqaq alli noticiakunaqa nunakunapita mana kanqanta.+ 12 Tsëkunataqa manam nunapitatsu chaskirqä ni yachatsiyämarqantsu, sinöqa Jesucristupitam revelacionchö chaskirqä.

13 Rasunmi, qamkunaqa wiyayarqunkim judïukunapa religionninchö këkar imanö portakunqäta.+ Y wiyayarqunkim Diospa congregacionninchö kaqkunata imëkata rurar sufritsinqäta y ushakätsita munanqäta.+ 14 Manam tsëllatsu, judïukunapa religionninchöqa, unë kastäkunapa costumbrinkunata llapan shonqüwan cumplita munarmi, nacionnïchö winë mayïkunapitapis mas punta puntachömi karqä.+ 15 Peru yurikunäta permiteq y noqawan alläpa alli karnin akramaq Teyta Dios+ allitanö rikar, 16 Tsurimpita musyatsikuyta munar, Tsurimpita alli noticiakunata juk nacion nunakunata willakunäpaq akramaptinqa,+ manam tsë höratsu pitapis tsëpaq tapukoq ëwarqä. 17 Y manam noqapita mas puntata apostol kaqkunata rikaqtsu Jerusalenta witsarqä. Tsëpa rantinqa, Arabiatam ëwarqä, tsëpitanam Damascu markaman kutirqä.+

18 Tsëpita kima wata pasariptinnam, Cëfasta* rikaq+ Jerusalenta witsarqä,+ y pëwanmi quinci junaq quedakurqä. 19 Peru wakin apostolkunataqa manam rikarqätsu, sinöqa Señorpa wawqin Santiägullatam.+ 20 Diospa rikëninchömi qamkunata niyaq,* tsë qellqamunqäkunaqa rasumpa kanqanta.

21 Tsëpitanam Siria y Cilicia kinrëta ëwarqä.+ 22 Peru Judëa provincia congregacionkunachö Cristuwan juknölla këkaqkunaqa, manam reqiyämarqantsu. 23 Noqapaq kënö niyanqanllatam wiyashqa kayarqan: “Unë witsan imëkata rurar sufritsimaqnintsik nunam,+ kananqa unë ushakätsita munanqan creenciapita alli noticiakunata willakuykan”.+ 24 Tsëmi pasamanqanta musyarir Teyta Diosta alabar qallëkuyarqan.