Levïticu
6 Tsëpitanam Teyta Jehoväqa Moisesta kënö nirqan: 2 “Mëqëkipis nuna mayikikunata engañar noqa Jehoväpa rikënïpaq jutsata* rurarqa:+ dejapuyäshunqëkita mana cuidar, confiakuyäshunqëkita shumaq mana rikar,+ suwapar o engañarnin imantapis duëñutsakur, 3 imantapis tarikarnin negar o tsënö jutsakunata* rurëkarnin mana rurashqanö jurarqa,+ këtam rurayänëki: 4 jutsata* rurashqa karnin culpayoq karqa, duëñuntam kutitsiyänëki duëñutsakuyanqëkita, suwakuyanqëkita, engañarnin imantapis duëñu tukuyanqëkita, dejapuyäshunqëkita, tarikuyanqëkita 5 o mana rasumpa kaqta jurarnin jukpa imantapis quedatsikuyanqëkita. Awmi, llapantam duëñunta kutitsiyänëki o chaninta pagayänëki,+ y tsë pagayanqëkimanmi cada pitsqa pläta qellëpita juk pläta qellë masta yapayänëki. Tsëtaqa rurayänëki jutsata* rurayanqëki musyakäriptinmi. 6 Noqa Jehoväpa rikënïpaq jutsata* rurayanqëkipitam sänu carnëruta sacerdötiman apayänëki. Tsë carnërutaqa akrayänëki jutsata rurayanqëkipita sacerdöti churanqan chaninta cuentaman churëkurmi.+ 7 Y apayanqëki carnërupa wiranta noqa Jehoväpa rikënïchö sacerdöti rupatsiptinmi, jutsata* rurayanqëkipita perdonashqa kayanki”.+
8 Tsëpitanam Teyta Jehoväqa Moisesta kënö nirqan: 9 “Aarontawan tsurinkunatam këta ninëki: ‘Teyta Diosnintsik kë mandakunqannömi ushakanqanyaq rupatsina qarëkunawan rurayänëki.+ Ushakanqanyaq rupatsina qarëkunataqa entëru paqasmi patsa waranqanyaq altarchö rupatsiyänëki, y manam dejayänëkitsu altarchö nina upinanta.* 10 Y sacerdötiqa lïnu hïlupita shumaq röpantam vistikunan.+ Y vistikunanmi qaranta tsapanampaq lïnu hïlupita trüsantapis.*+ Tsëpitanam rupatsinqan qarëpa uchpanta+ altarpa lädunman jitanan. 11 Y röpanta cambiakuskirmi+ campamentupita karuchö këkaq limpiu sitiuman tsë uchpata apanan.+ 12 Altarchö ninataqa rupëkaqtam katsiyänëki, y manam upinanta* dejayänëkitsu. Cada patsa waraptinmi sacerdötiqa altarman yantata churarkur ninata tsaritsinan,+ y tsëpa jananchömi ushakanqanyaq rupatsina qarëta y Teyta Dioswan amïgu kayanqanta rikätsikur apayämunqan animalkunapa wiranta rupatsinan.+ 13 Altarchö rupëkaq ninaqa manam imëpis upinantsu.*
14 Teyta Diosnintsik mandakunqannömi gränupita rurashqa qarëkunawan rurayänëki.+ Tsë qarëtaqa qamkuna Aaronpa tsurinkunam Teyta Jehoväpa rikëninchö altarman apayänëki. 15 Y juknikim aceitiwan pichushqa alli aqashqa harinata aptarkur yuraq inciensutawan juntu altarchö rupatsiyänëki, tsëqa apayämunqan qarëta Teyta Diosnintsik imëpis yarpänampaqmi kanqa. Y ninawan rupanqanqa Teyta Jehoväta alläpam gustanqa.+ 16 Sobranqantanam levadürannaq tantata rurëkurnin Aaronwan tsurinkuna sagrädu sitiuchö mikuyänan.+ Y carpa* wayipa patiunchömi mikuyänan.+ 17 Kuwayanqëki masamanqa manam levadüran winayänëkitsu.+ Rupatsiyänampaq apayämunqan harinapa sobranqa Aaronpa tsurinkunapaqmi kanqa.+ Jutsëkikunapita* perdonashqa kayänëkipaq qarënölla y culpayoq kayanqampita apayämunqan qarënöllam, tsë qarëpis alläpa sagrädu kanqa.+ 18 Tsëtaqa Aaronpa ollqu tsurinkunallam mikuyänan.+ Teyta Jehoväpaq rupatsiyänampaq apayämunqan qarëkunapita sobraq harinaqa Aaronpa tsurinkunapaq, y tsëpita yureq tsurinkunapaqmi imëpis kanqa.+ Imapis tsë qarëta topaqqa sagrädum tikranqa’”.
19 Tsëpitanam Teyta Jehoväqa Moisesta kënö nirqan: 20 “Aaron carguta chaskinqan junaqmi Aaronwan tsurinkunaqa ishkë litrutanö+ alli aqashqa harinata noqa Jehoväpaq imëpis apayämunan.+ Tsëqa gränupita rurashqa qarëmi kanqa.+ Pullantam patsa waraptin, y pullantanam tardipa noqapaq rupatsiyämunan. 21 Tsëtaqa aceitiwan pichurkurmi läta jananchö ankayänan.+ Tsë ankashqa gränupita rurashqa qarëtaqa atskaman pakirkur y aceitin winarkurmi noqapaq rupatsiyämunan. Y ninawan rupanqanqa noqa Jehoväta alläpam gustamanqa. 22 Aaronpa rantin mëqan tsurin mandakoq sacerdöti yëkurpis tsënöllam ruranan.+ Kë mandakunqätam imëpis cumpliyänan: gränupita rurashqa qarëtaqa ushakanqanyaqmi noqa Jehoväpaq rupatsiyämunan. 23 Kikin sacerdötikuna apayämunqan gränupita rurashqa qarëtaqa llapantam noqapaq rupatsiyämunan, y manam mikuyänantsu”.
24 Tsëpitanam Teyta Jehoväqa Moisesta kënö nirqan: 25 “Aarontawan tsurinkunatam këta ninëki: ‘Jutsankunapita* perdonashqa kayänampaq apayämunqan qarëkunawanqa Teyta Diosnintsik mandakunqannömi rurayänëki. Jutsankunapita perdonashqa kayänampaq apayämunqan qarëtaqa,+ ushakanqanyaq rupatsina qarëta pishtayänan sitiuchömi Teyta Jehoväpa rikëninchö pishtayänëki.+ Tsë qarëqa alläpa sagrädum kanqa. 26 Y Teyta Diospaq rupatseq sacerdötim, sacerdötikunapaq kaq ëtsata sagrädu sitiuchö mikunan.+ Tsë ëtsataqa carpa* wayipa patiunchömi mikunan.+
27 Imapis tsë animalpa ëtsanta topaqqa sagrädum kanqa. Y tsë animalpa yawarnin pipa röpanmampis pillchiptinqa,* sagrädu sitiuchömi tsë röpata taqshayänëki. 28 Tsë ëtsata allpa mankachö yanurqa, tsë mankatam pakir ushakätsiyänëki. Cobripita mankachö yanurqa, tsë mankata alli jichkëkurmi yakuwan awiyänëki.*
29 Tsë ëtsataqa sacerdötikunallam mikuyänëki.+ Tsë qarëqa Teyta Diospaq alläpa sagrädum kanqa.+ 30 Peru jutsankunapita* perdonashqa kayänampaq juk animalta apayämuptin, y perdonashqa kayänampaq tsë animalpa yawarninta carpa* wayichö këkaq sagrädu sitiuman aparqa, manam tsë animalpa ëtsanta mikuyänëkitsu.+ Tsëpa rantinqa ushakanqanyaqmi rupatsiyänëki.