2 Crönicas

6 Tsënam Salomonqa kënö nirqan: “Pukutë rurinchö kanëkipaq kaqtam nirqëki Teyta Jehovä.+ 2 Tsëmi kananqa shumaq wayiki ruramurqö, tsëchö imëyaqpis kanëkipaq”.+

3 Tsëpitanam gobernanti Salomonqa tsëchö llapan israelïtakunata shumaq parlapar,+ 4 kënö nirqan: “Israelpa Diosnin Jehovä alabashqa këkullätsun. Pëqa, papänï Davidta äninqantam cumplishqa. 5 Kënömi nirqan: ‘Egiptupita israelïtakunata pushamunqä junaqpitaqa, manam jutïpa reqishqa kanampaq wayï rurayämunampaq+ Israelchö mëqan kastapa markantapis akrarqätsu. Ni manam juk nunatapis akrashqatsu karqä Israelchö gobernanampaq. 6 Peru kananqa Jerusalen markatam akrarqö+ jutïpa imëyaqpis reqishqa kanampaq, y Davidtam akrarqö Israelchö gobernanampaq’.+ 7 Tsëmi papänï Davidqa Israelpa Diosnin Jehoväpa jutimpa reqishqa kanampaq templuta rurëta munarqan.+ 8 Tsënö kaptimpis papänï Davidtam Jehovä Diosqa kënö nirqan: ‘Jutïpa reqishqa kanampaq wayita rurëta munanqëkiqa allim. 9 Peru manam qamtsu jutïpa reqishqa kanampaq wayitaqa ruratsimunki, sinöqa tsurikim’.+ 10 Tsënö änikunqantaqa Jehovä Dios cumplishqam. Tsëmi Jehovä Dios ninqannö+ papänïpa rantin Israelchö gobernëkä+ y Jehovä Diospa jutimpa reqishqa kanampaq wayitapis ruratsirqö. 11 Tsëmanmi Sagrädu Cäjata churatsirqö. Tsë Sagrädu Cäja rurinchömi këkan, israelïtakunawan Jehovä Dios ruranqan acuerdu”.+

12 Tsënö nirmi Salomonqa Jehovä Diospa altarnin puntanchö y llapan israelïtakuna rikëkäyaptin makinta pallarirqan.*+ 13 Salomonqa patiu chowpinmanmi* cobripita juk patakta churatsishqa karqan.+ Tsë patakpaqa anchumpis y largumpis ishkë metru masmi* karqan y altunnam juk metru mas* karqan. Tsë patakchömi Salomonqa llapan israelïtakunapa puntanman qonqurikuskir makinta pallarirqan.*+ 14 Y Teyta Diosmanmi kënö mañakurqan: “Israelpa Diosnin Jehovä, manam ciëluchö ni kë patsachöpis qamnö Diosqa kantsu. Änikunqëkitaqa cumplirqunkim, y mandakunqëkita cäsukoqkunataqa alläpam kuyanki.+ 15 Papänï Davidta äninqëkitaqa cumplirqunkim.+ Llapan parlanqëkitam kanan cumplirqunki.+ 16 Israelpa Diosnin Jehovä, papänïtaqa kënö nirpis änirqëkim: ‘Qam cäsukunqëkinö tsurikikuna Leynïta cäsukuyaptinqa,+ qampa kastëkipitam Israelchö juk gobernanti imëpis kanqa’. Tsënö ninqëkitapis cumplimunëkipaqmi mañakallämü.+ 17 Israelpa Diosnin Jehovä, sirwishoqniki Davidta äninqëkita cumplïkullë.

18 Teyta Dios, ¿rasumpatsuraq nunakunawan kë patsachö täkunki?*+ Ciëlupis mëtsikan këkar qampaqqa takshallam.+ ¿Tsëtsuraq kë ruratsinqä wayiqa qampaq tinkunman?+ 19 Kananqa mañakamunqäta wiyëkallämë Teyta Jehovä, llapan shonqüwanmi yanapëkallämänëkipaq rogakallämü. 20 Kikikim nirqunki kë templuqa jutikipa reqishqa kanampaq kaqta. Tsëqa mañakamunqäta imëpis wiyëkamänëkipaq paqaspapis+ y junaqpapis kë templuchö këkullë. 21 Kë templupita mañakamuptï y llapan israelïtakuna mañakayämuptimpis wiyëkayämanki.+ Ciëluchö täkunqëkipita* wiyëkayämanki+ y jutsäkunapita* perdonëkayämanki.+

22 Sïkush juk nuna, nuna mayinta mana allita rurarir, ‘manam noqatsu rurarqö’ nir neganqa* y tsënö nir ulikuptinqa o llullakuptinqa Teyta Dios castiguëkunki. Tsënö nikar kë templuykichö+ altarnikiman shamuptinqa, 23 ciëlupita wiyëkunki y justiciata rurëkunki. Mana alli nunataqa castiguëkunki+ y alli ruraq nunataqa yanapëkunki.+

24 Jutsata* rurayanqampita israelïtakunata chikeqninkuna venciyaptinqa,+ capaz israelïtakuna arrepentikurnin kë wayikipita+ mañakayämunqa+ y jutikita alabayanqa.+ 25 Tsëqa ciëlupita wiyëkunki+ y jutsa* rurayanqanta perdonëkullanki. Y unë kastankunapa markankunaman kutïkatsimunki.+

26 Jutsata* rurayanqampita+ alläpa usyawan castigaptiki,+ capaz tsë jutsata rurëta dejaskir kë templuman rikëkamur mañakayämunqa y jutikita alabayanqa.+ 27 Tsëqa ciëlupita wiyëkullanki y sirwishoqniki israelïtakunata perdonëkullanki. Mandakunqëkita cäsukuyänampaq yanapëkunki,+ y entreganqëki markankunaman tamyëkatsillämunki.+

28 Alläpa mallaqë kaptin,+ raslla o saslla wanutsikoq qeshya kaptin,+ alläpa achachëwan plantëkikuna tsakiptin, murukuynikikuna qeshyawan ushakaptin,*+ murukuyanqanta imëka qeshya o imëka pläga* ushaptin,+ mëqan markatapis chikeqninkuna atacayaptin,+ o ima pläga o ima desgracia kaptin+ 29 mañakayämunqanta wiyëkullanki+ (kikinkunam musyayan shonqunkunachö llakikuyanqanta y sufriyanqanta).+ Ima asuntupaqpis+ juk nuna o llapan israelïtakuna kë templuykiman rikëkamur makinkunata pallarkur*+ mañakayämuptinqa, 30 ciëluchö täkunëkipita* wiyëkullanki+ y sirwishoqniki Israel nunakunata perdonëkullanki.+ Qamqa musyankim pëkuna imanö kayanqanta, y imanöpis portakuyanqanmannö yanapëkunki (qamqa allim musyanki shonqunkunachö imanö kayanqanta).+ 31 Tsënöpam unë kastankunata entreganqëki markakunachö täkurnin* mandakunqëkikunata cäsukuyanqa.

32 Mana Israel kaq nunakunapis jutikita, alläpa puëdeq kanqëkita y jutikipis reqishqa kanqanta musyëkurmi+ karu nacionkunapita shayämunqa y kë templuykiman rikëkurmi mañakayämunqa.+ 33 Tsëqa ciëluchö täkunëkipita* wiyëkunki y tsë forastëru nuna mañashunqëkita rurëkullanki. Tsënöpam mëtsë nacionpita nunakuna reqiyäshunki,+ y markëki Israel ruranqannömi respetayäshunki. Y llapanmi musyayanqa kë templuta jutikipa reqishqa kanampaq rurashqa kanqäta.

34 Sirwishoqnikikunata guërraman ëwayänampaq mëpapis mandaptiki,+ kë akranqëki markaman y qampaq shäritsinqä templuman rikëkamur+ qamman rogakayämuptinqa,+ 35 ciëlupita wiyëkunki y venciyänampaq yanapëkullanki.+

36 (Llapampis jutsa* ruraqllam kayan),+ mandakunqëkita mana cäsukur jutsata rurayaptinqa, capaz qamqa cölerakurnin permitinki chikeqninkuna karu markaman o amänun markaman prësu apakuyänanta.+ 37 Tsëchö prësu këkarmi, pëkunaqa qamman kutimuyta munayanqa, y cuentata qokurirmi kënö mañakayämunqa: ‘Jutsata* rurarmi qamta cäsuyarqoqtsu,+ perdonëkayämë’. 38 Pëkunaqa capazchi chikeqninkunapa markanchö këkar arrepentikurnin+ llapan shonqunkunawan y kawëninkunawan* sirwiyäshunki, y unë kastankunata entreganqëki nacionman,+ kë akranqëki markaman y jutikipa reqishqa kanampaq ruratsimunqä templuman rikëkamur mañakayämunqa.+ 39 Tsëqa rogakur mañakayämuptin ciëluchö täkunëkipita* wiyëkullanki, yanapëkullanki,+ y mana cäsukur jutsata* rurayanqampita perdonëkullanki.

40 Teyta Diosnïkuna kë templupita mañakayämuptï rikëkayämë y wiyëkayämë.+ 41 Teyta Jehovä, kananqa qampis y poderyoq Sagrädu+ Cäjëkipis këchö jamatsun. Teyta Jehovä, sacerdötikikuna rikätsikuyätsun nunakunata salvanqëkita. Munanqëkinö kawaqkunapis allikunata ruranqëkipita kushikuyätsun.+ 42 Teyta Jehovä, akranqëki gobernantita, ama despreciëkullëtsu.+ Sirwishoqniki Davidta alläpa kuyanqëkita ama qonqëkullëtsu”.+